YAP-ın VII qurultayında qəbul olunmuş əhəmiyyətli qərarlar
2021-ci il martın 5-də keçirilmiş Yeni Azərbaycan Partiyasının VII qurultayı təşkilatın siyasi və təşkilati inkişaf tarixində mühüm mərhələ olmuşdur. Qurultay ölkədə və dünyada baş verən ictimai-siyasi dəyişikliklər, Azərbaycanın yeni reallıqları və qarşıda duran strateji vəzifələr nəzərə alınmaqla partiyanın gələcək fəaliyyət istiqamətlərinin müəyyənləşdirilməsi baxımından xüsusi əhəmiyyət daşımışdır. Toplantıda partiyanın təşkilati strukturunun təkmilləşdirilməsi, idarəetmə mexanizmlərinin yenilənməsi və fəaliyyətinin müasir dövrün tələblərinə uyğunlaşdırılması ilə bağlı mühüm qərarlar qəbul edilmişdir. VII qurultayda qəbul edilmiş qərarlara əsasən, Yeni Azərbaycan Partiyasının yeni Nizamnaməsi təsdiq olunmuş, partiyanın 40 nəfərdən ibarət İdarə Heyətinin və 13 nəfərlik Təftiş Komissiyasının tərkibi müəyyənləşdirilmişdir. Bununla yanaşı, partiyanın təşkilati strukturunda yeni qurum olan 35 nəfərdən ibarət Veteranlar Şurası yaradılmışdır. Bu qərarlar YAP-ın idarəetmə sisteminin təkmilləşdirilməsi, təşkilati fəaliyyətinin əlaqələndirilməsi və müxtəlif nəsillərin təcrübəsindən səmərəli istifadə olunması baxımından əhəmiyyətli olmuşdur.
Qurultayın mühüm qərarlarından biri də partiyanın rəhbər strukturlarında yeni təyinatla bağlı olmuşdur. Yeni Azərbaycan Partiyasının Nizamnaməsinə uyğun olaraq, partiyanın Sədri, Cənab Prezident İlham Əliyevin müvafiq sərəncamı ilə 2021-ci il martın 5-də Mehriban xanım Əliyeva partiya sədrinin birinci müavini təyin edilmişdir. Bu təyinat partiyanın rəhbərliyində idarəetmə fəaliyyətinin təşkili və əlaqələndirilməsi baxımından yeni mərhələnin başlanğıcı kimi qiymətləndirilmişdir. Mehriban xanım Əliyevanın partiya sədrinin birinci müavini vəzifəsinə təyin edilməsi onun uzunillik ictimai-siyasi fəaliyyətinə, humanitar sahədə həyata keçirdiyi layihələrə və dövlətçilik işinə verdiyi töhfələrə göstərilən etimadın ifadəsi kimi təqdim olunmuşdur. Onun rəhbərliyi ilə həyata keçirilən sosial, mədəni və humanitar təşəbbüslər Azərbaycanın beynəlxalq miqyasda tanıdılması, milli-mənəvi dəyərlərin qorunması və sosial rifahın yüksəldilməsi istiqamətlərini əhatə etmişdir.
Bu təyinat eyni zamanda Azərbaycanın siyasi və ictimai həyatında qadınların roluna verilən diqqətin mühüm göstəricisi kimi səciyyələndirilir. Mehriban xanım Əliyevanın timsalında fəal ictimai-siyasi mövqeyə malik, müxtəlif sahələrdə təşəbbüsləri və fəaliyyəti ilə seçilən qadın dövlət xadimi obrazı formalaşmışdır. Onun partiya rəhbərliyində təmsil olunması qadınların siyasi idarəetmədə və ictimai proseslərdə iştirakının əhəmiyyətini bir daha gündəmə gətirmişdir. VII qurultayda Veteranlar Şurasının yaradılması da xüsusi diqqət çəkən qərarlardan biri olmuşdur. Bu qurumun formalaşdırılması partiyanın inkişafında uzun illər iştirak etmiş üzvlərin təcrübəsinin qorunması, onların bilik və bacarıqlarından təşkilati fəaliyyətin müxtəlif istiqamətlərində istifadə edilməsi məqsədi daşıyır.
Qurultayda qəbul edilmiş qərarlar Yeni Azərbaycan Partiyasının gələcək fəaliyyətinin təşkilati əsaslarını yeniləməklə yanaşı, onun qarşısında duran vəzifələrin daha sistemli şəkildə həyata keçirilməsi üçün yeni imkanlar yaratmışdır. İdarə Heyətinin və Təftiş Komissiyasının formalaşdırılması, Veteranlar Şurasının yaradılması və yeni Nizamnamənin təsdiqi partiyanın idarəetmə strukturunun təkmilləşdirilməsinə yönəlmiş mühüm addımlar olmuşdur. VII qurultay Azərbaycanın Vətən müharibəsində əldə etdiyi tarixi Qələbədən sonra yaranmış yeni siyasi və geosiyasi reallıqlar fonunda keçirilmişdir. Ölkənin ərazi bütövlüyünün bərpası, işğaldan azad edilmiş ərazilərdə genişmiqyaslı quruculuq işlərinin başlanması və dövlətin yeni inkişaf prioritetləri partiyanın fəaliyyət gündəliyində də mühüm yer tutmuşdur. Bu baxımdan, qurultayda qəbul olunan qərarlar yeni dövrün çağırışlarına uyğun təşkilati fəaliyyətin qurulmasına xidmət etmişdir.
Ramiz Sərdarzadə- Zərdab rayon Şahhüseynli kənd tam orta ümumtəhsil məktəbinin direktoru

























