Ağdam Dəmir Yolu və Avtovağzal Kompleksi
Ağdam rayonunun işğaldan azad edilməsindən sonra həyata keçirilən genişmiqyaslı bərpa və quruculuq işlərinin mühüm istiqamətlərindən biri müasir nəqliyyat infrastrukturunun yaradılmasıdır. Bu məqsədlə reallaşdırılan əhəmiyyətli layihələrdən biri Ağdam Dəmir Yolu və Avtovağzal Kompleksidir. Kompleks Bərdə–Ağdam dəmir yolu xətti layihəsinin ikinci mərhələsi çərçivəsində inşa edilmiş və 2025-ci il mayın 10-da istifadəyə verilmişdir. Layihə Ağdamın ölkənin digər bölgələri ilə nəqliyyat əlaqələrinin genişləndirilməsi və regionun iqtisadi-sosial inkişafının sürətləndirilməsi baxımından mühüm əhəmiyyət daşıyır. Təxminən 8 hektar ərazini əhatə edən kompleks müasir memarlıq və mühəndislik həlləri əsasında qurulmuşdur. Burada sərnişinlərin rahatlığı və təhlükəsizliyi üçün bütün zəruri infrastruktur yaradılmış, gözləmə zalları, bilet kassaları, kitabxana, mağazalar, əyləncə zonaları, restoran və istirahət guşələri istifadəyə hazırlanmışdır. Kompleksin funksional təşkili müxtəlif yaş qruplarından olan sərnişinlərin ehtiyaclarının qarşılanmasına, onların səyahət müddətində rahatlığının təmin edilməsinə yönəldilmişdir.
Ağdam Dəmir Yolu və Avtovağzal Kompleksinin diqqətçəkən xüsusiyyətlərindən biri Azərbaycanda ilk qapalı dəmir yolu platformasının məhz burada inşa edilməsidir. Uzunluğu 350 metr olan platforma müasir texniki tələblərə uyğun layihələndirilmişdir. Bu yenilik sərnişinlərin hava şəraitindən asılı olmayaraq rahat şəkildə qatarlara minib-düşməsinə imkan yaradır və ölkənin dəmir yolu infrastrukturunda yeni texnoloji yanaşmanın tətbiqini nümayiş etdirir. Kompleksin ərazisində nəqliyyat vasitələrinin hərəkətinin və dayanmasının təşkili üçün də geniş imkanlar yaradılmışdır. Burada fərdi, orta və iritutumlu nəqliyyat vasitələri üçün yerüstü avtodayanacaqlar, şəhərlərarası və rayondaxili marşrutlar üzrə hərəkət edən avtobuslar üçün xüsusi perronlar, velosiped dayanacaqları nəzərdə tutulmuşdur. Bununla yanaşı, ərazidə park zonası və elektromobillər üçün elektrik doldurma məntəqəsinin yaradılması ekoloji cəhətdən dayanıqlı nəqliyyat sisteminin formalaşdırılmasına xidmət edir.
Ağdam Dəmir Yolu və Avtovağzal Kompleksinin sərnişindaşıma imkanları da yüksək tutum göstəriciləri ilə səciyyələnir. Dəmir yolu vağzalının gündəlik 800–1000 nəfər sərnişinə xidmət göstərməsi nəzərdə tutulmuşdur. Avtovağzalın isə gündəlik 1300–1500 nəfər sərnişindaşıma potensialı vardır. Bu göstəricilər kompleksin Ağdamın nəqliyyat tələbatının ödənilməsində və şəhərlərarası sərnişin əlaqələrinin təşkilində mühüm rol oynayacağını göstərir.
Kompleksin vahid nəqliyyat qovşağı kimi fəaliyyət göstərməsi dəmir yolu və avtomobil nəqliyyatı arasında əlaqələndirmənin səmərəli təşkilinə imkan yaradır. Sərnişinlərin bir nəqliyyat növündən digərinə rahat keçidinin təmin edilməsi səfərlərin planlaşdırılmasını asanlaşdırır, nəqliyyat xidmətlərinin keyfiyyətini yüksəldir və bölgədaxili hərəkət imkanlarını genişləndirir. Bu baxımdan, kompleks yalnız nəqliyyat infrastrukturu deyil, həm də müasir şəhərsalma sisteminin mühüm elementi kimi çıxış edir. Ağdam Dəmir Yolu və Avtovağzal Kompleksinin istifadəyə verilməsi rayonun iqtisadi dirçəlişinə də müsbət təsir göstərir. Nəqliyyat əlaqələrinin yaxşılaşdırılması sənaye müəssisələrinin, sahibkarlıq subyektlərinin, kənd təsərrüfatı istehsalçılarının və xidmət sektorunun fəaliyyət imkanlarını genişləndirir. Eyni zamanda, sərnişin və yük daşımalarının inkişafı regionun digər iqtisadi mərkəzlərlə əlaqələrinin möhkəmlənməsinə şərait yaradır. Layihə “Böyük Qayıdış” proqramının həyata keçirilməsi baxımından da mühüm əhəmiyyət kəsb edir. Ağdama qayıdan əhalinin rahat və təhlükəsiz nəqliyyat xidmətləri ilə təmin olunması, yaşayış məntəqələri arasında əlaqələrin gücləndirilməsi və şəhərin ölkənin ümumi nəqliyyat şəbəkəsinə inteqrasiyası davamlı məskunlaşmanın əsas şərtlərindəndir. Kompleks bu ehtiyacların qarşılanmasına xidmət edən müasir infrastruktur obyektlərindən biridir.
Bununla yanaşı, kompleksin yaradılması Ağdamın gələcəkdə regional nəqliyyat, logistika və iqtisadi əlaqələr baxımından əhəmiyyətli mərkəzə çevrilməsi perspektivlərini genişləndirir. Müasir dəmir yolu və avtovağzal infrastrukturunun bir məkanda birləşdirilməsi şəhərin nəqliyyat sisteminin səmərəliliyini artırmaqla yanaşı, ətraf yaşayış məntəqələrinin də nəqliyyat əlçatanlığının yaxşılaşdırılmasına imkan verir.
Çinarə Pirməmmədova- Zərdab rayon Hüseynxanlı kənd körpələr evi-uşaq bağçasının müdiri






















