Strateji tərəfdaşlıq haqqında Birgə Bəyannamə əlaqələrimizi keyfiyyətcə yeni səviyyəyə qaldıran mühüm sənəd oldu
Beynəlxalq münasibətlər sistemində dövlətlər arasında əməkdaşlığın dərinləşdirilməsi yalnız siyasi dialoqla məhdudlaşmır. Bu proses qarşılıqlı maraqların uzlaşdırılmasını, iqtisadi imkanların səfərbər edilməsini və uzunmüddətli tərəfdaşlıq mexanizmlərinin yaradılmasını tələb edir. Azərbaycan ilə Vyetnam arasında münasibətlərin strateji tərəfdaşlıq səviyyəsinə yüksəlməsi də məhz bu baxımdan xüsusi əhəmiyyət daşıyır.
2025-ci ilin mayında Vyetnam Kommunist Partiyası Mərkəzi Komitəsinin Baş katibi To Lamın Azərbaycana ilk dövlət səfəri ikitərəfli əlaqələrin inkişafında mühüm tarixi hadisə olub. Səfər çərçivəsində keçirilən görüşlər və aparılan danışıqlar iki ölkənin əməkdaşlıq gündəliyini əhəmiyyətli dərəcədə genişləndirib.
Energetika, investisiya, müdafiə, kibertəhlükəsizlik və digər istiqamətləri əhatə edən müzakirələr qarşılıqlı fəaliyyətin yeni imkanlarını üzə çıxarıb. Nəticədə Strateji tərəfdaşlıq haqqında Birgə Bəyannamənin imzalanması Azərbaycan-Vyetnam münasibətlərinin məzmununa və siyasi mahiyyətinə yeni keyfiyyət gətirib.
Bu sənəd iki dövlətin bir-birinin suverenliyinə, müstəqilliyinə və milli maraqlarına hörmət əsasında əməkdaşlığı daha da dərinləşdirmək əzmini nümayiş etdirir. Strateji tərəfdaşlıq münasibətlərin yalnız bugünkü inkişafını deyil, həm də gələcək perspektivlərini müəyyənləşdirən mühüm siyasi çərçivədir.
Əlaqələrin möhkəmlənməsində hökumətlərarası komissiyaların, parlamentlərarası dostluq qruplarının və siyasi partiyalar arasında əməkdaşlığın da mühüm rolu var. Yeni Azərbaycan Partiyası ilə Vyetnam Kommunist Partiyası arasında inkişaf edən münasibətlər bu baxımdan diqqətəlayiqdir.
Eyni zamanda, Azərbaycan və Vyetnam beynəlxalq təşkilatlar çərçivəsində də qarşılıqlı fəaliyyət göstərirlər. BMT, Qoşulmama Hərəkatı və AQEM kimi platformalarda əməkdaşlıq iki ölkənin beynəlxalq məsələlərə dair dialoqunu gücləndirir.
Prezident İlham Əliyevin müsahibəsində vurğulandığı kimi, Azərbaycan-Vyetnam münasibətləri bərabərhüquqluluq və qarşılıqlı maraqların nəzərə alınması prinsiplərinə əsaslanır. Strateji tərəfdaşlıq haqqında Birgə Bəyannamə isə bu dostluğun daha geniş miqyaslı və nəticəyönümlü əməkdaşlığa çevrilməsi üçün möhkəm zəmin yaradır.
Aqil Mehdiyev – Zərdab rayonu Alıcanlı kənd sakini

























