Ağdam Azərbaycanın ən müasir və inkişaf etmiş şəhərlərindən birinə çevriləcək
Şəhərdə və kəndlərdə yeni yaşayış məntəqələrinin salınması, istehsal müəssisələrinin yaradılması, yolların və kommunikasiya sistemlərinin qurulması gələcəkdə Ağdam rayonunun iqtisadi və sosial həyatının daha da canlanmasına şərait yaradacaq. Ağdamın əvvəlki şöhrətinin bərpası onun yalnız keçmişdəki görkəminə qayıtması deyil, həm də daha müasir, daha inkişaf etmiş və daha güclü bir yaşayış məkanına çevrilməsi deməkdir.
Ən sevindirici məqam isə illərlə doğma torpaqlarından ayrı düşmüş insanların yenidən Ağdama qayıtmasıdır. Vaxtilə öz evlərini, həyətlərini, bağlarını və küçələrini məcburən tərk edən insanlar indi həmin yerlərdə yeni həyat qururlar. Bir zamanlar xarabalığa çevrilmiş ərazilərdə uşaqların gülüşü eşidilir, məktəblərdə dərslər keçirilir, yeni ailə ocaqları qurulur. Bu mənzərə xalqımızın iradəsinin, dövlətimizin gücünün və tarixi ədalətin bərpasının bariz ifadəsidir.
Əminliklə demək olar ki, qarşıdakı illərdə Ağdam Azərbaycanın ən müasir və inkişaf etmiş şəhərlərindən birinə çevriləcək. Burada iqtisadiyyatın müxtəlif sahələri inkişaf edəcək, yeni iş yerləri açılacaq, kənd təsərrüfatı və sənaye imkanları genişlənəcək, şəhər və kəndlərin sosial həyatı daha da canlanacaq. Ağdam öz tarixi ənənələrini qorumaqla yanaşı, müasir inkişafın tələblərinə cavab verən yeni sima qazanacaq.
Bu gün Ağdamda aparılan quruculuq işləri təkcə bir rayonun bərpası deyil, həm də Azərbaycan xalqının öz tarixi torpaqlarına bağlılığının, milli birliyinin və sarsılmaz iradəsinin göstəricisidir. Ağdamın hər bir yeni binası, hər bir abad küçəsi, hər bir istifadəyə verilən sosial obyekti xalqımızın illərlə bəslədiyi qayıdış arzusunun gerçəkləşməsinə xidmət edir.
Bir vaxtlar düşmən tərəfindən viran qoyulan Ağdam bu gün yenidən qurulur, dirçəlir və gələcəyə doğru inamla addımlayır. Ağdamın əvvəlki şöhrəti bərpa olunur, lakin bu dəfə o, daha müasir infrastruktura, daha geniş iqtisadi imkanlara və yeni inkişaf perspektivlərinə malik şəhər kimi formalaşır. Ağdam yenidən öz sakinlərinə qovuşur, Qarabağın həyatında layiqli yerini tutur. Bu dirçəliş Azərbaycanın tarixi Zəfərinin davamı, Böyük Qayıdışın real nəticəsi və gələcək nəsillərə ötürülən böyük quruculuq mirasıdır.
Gülnaz Məmmədova – Zərdab şəhər sakini, təqaüdçü
























