Xankəndinin bərpası və inkişafında Prezident İlham Əliyevin səfərləri
Azərbaycanın dövlət suverenliyinin tam bərpasından sonra Xankəndi şəhərində yeni inkişaf mərhələsi başlanmışdır. 2023-cü il sentyabr hadisələrindən sonra şəhərdə dövlət idarəçiliyinin bərpası ilə yanaşı, sosial, təhsil, mədəniyyət, idman, turizm və iqtisadi sahələrdə genişmiqyaslı işlər həyata keçirilir. Prezident İlham Əliyevin Xankəndiyə mütəmadi səfərləri bu prosesin müxtəlif istiqamətlərinin yerində qiymətləndirilməsi və yeni layihələrin həyata keçirilməsi ilə müşayiət olunur. Prezidentin rəsmi internet səhifəsində də Xankəndidə 2023-cü ildən etibarən baş vermiş mühüm hadisələr və görülən işlər ardıcıllıqla təqdim edilir.
Prezident İlham Əliyevin Xankəndiyə ilk səfərlərindən biri 15 oktyabr 2023-cü ildə baş tutmuşdur. Həmin gün şəhərin mərkəzində Azərbaycan Respublikasının Dövlət Bayrağı ucaldılmış, Kərkicahan qəsəbəsinə baxış keçirilmişdir. Ardınca 8 noyabr 2023-cü ildə Xankəndidə Vətən müharibəsində qazanılmış Zəfərin üçüncü ildönümünə həsr olunmuş hərbi parad keçirilmişdir. Dekabrın 21-də isə Xankəndi stadionunda “Qarabağ” və MOİK komandaları arasında Azərbaycan Kubokunun oyunu təşkil edilmişdir. Bu hadisələr şəhərin ictimai həyatının yenidən formalaşmasının mühüm nümunələri olmuşdur.
2025-ci ildə Xankəndidə bərpa və inkişaf işləri daha da genişlənmişdir. Fevral ayında Zəfər parkının təməli qoyulmuş, şəhərdə iqtisadi fəaliyyətin inkişafı ilə bağlı layihələrə baxılmışdır. İyul ayında Xankəndi Dəmir Yolu və Avtovağzal Kompleksinin təməli qoyulmuş, “Xankəndi” Biznes Mərkəzi və Xankəndi Konqres Mərkəzi istifadəyə verilmişdir. Həmin səfər zamanı Xankəndi–Şuşa kanat yolunun inşası üçün seçilmiş əraziyə də baxış keçirilmiş, şəhərdə İqtisadi Əməkdaşlıq Təşkilatının 17-ci Zirvə görüşü təşkil olunmuşdur.
2025-ci ilin dekabrında Xankəndidə yeni mərhələnin mühüm layihələri təqdim edilmişdir. Kərkicahan qəsəbəsində məktəb binasının əsaslı təmirdən sonra açılışı keçirilmiş, qəsəbəyə köçən sakinlərlə görüş baş tutmuşdur. Qarabağ Universitetinin Mühəndislik fakültəsinin binasının təməli qoyulmuş, Biznes və iqtisadiyyat fakültəsinin yeni binası istifadəyə verilmişdir. Həmçinin “Xankəndi-1” elektrik yarımstansiyasının və şəhərdə Zəfər parkının açılışı olmuşdur.
Xankəndidə həyata keçirilən bu tədbirlər şəhərin yalnız fiziki baxımdan bərpasını deyil, onun sosial və iqtisadi həyatının yenidən qurulmasını da əhatə edir. Təhsil müəssisələrinin, məktəb və bağçaların, hotellərin, biznes və mədəniyyət obyektlərinin yaradılması, nəqliyyat və enerji infrastrukturunun inkişaf etdirilməsi şəhərdə dayanıqlı yaşayış və fəaliyyət üçün zəruri şəraitin formalaşdırılmasına yönəlib. Qarabağ Universitetinin genişləndirilməsi və yeni fakültə binalarının istifadəyə verilməsi isə insan kapitalının inkişafına yönəlmiş mühüm istiqamətlərdən biridir.
2023-cü ildən 2026-cı ilədək Prezident İlham Əliyevin Xankəndiyə ardıcıl səfərləri şəhərin bərpası, sosial-iqtisadi inkişafı və yeni yaşayış mühitinin formalaşdırılması ilə bağlı həyata keçirilən işlərin müxtəlif mərhələlərini əhatə etmişdir. Xankəndidə Dövlət Bayrağının ucaldılmasından başlayaraq təhsil, mədəniyyət, idman, turizm, biznes, nəqliyyat və beynəlxalq tədbirlərə qədər müxtəlif sahələrdə görülən işlər şəhərin yeni inkişaf mərhələsini formalaşdırır. Bu proses Xankəndinin yenidən qurulması ilə yanaşı, onun müasir Azərbaycanın sosial, iqtisadi və ictimai həyatında fəal şəhərlərdən birinə çevrilməsi üçün əsas yaradır.
Rəmzi Şirinov-Zərdab rayonu, Dəli Quşçu kənd tam ümumtəhsil orta məktəbinin direktoru
