Ağdam rayonunun yaradılması
Azərbaycanın qədim yaşayış məskənlərindən olan Ağdam tarixən Qarabağın ictimai, iqtisadi və mədəni həyatında mühüm yer tutub. Əlverişli coğrafi mövqeyi, münbit torpaqları, zəngin təbii ehtiyatları və əməksevər əhalisi bu bölgənin inkişafında əsas amillərdən olub.
Ağdam rayonu 1930-cu ildə yaradılıb. 1094 kvadratkilometr ərazini əhatə edən rayon Qarabağ dağ silsiləsinin şimal-şərq ətəklərində, Kür-Araz ovalığının qərbində yerləşir. Ərazinin relyefi əsasən düzənlik, qismən isə dağlıqdır. Bu coğrafi xüsusiyyətlər burada kənd təsərrüfatının, xüsusilə əkinçilik və heyvandarlığın inkişafı üçün əlverişli şərait yaradıb.
Ağdam uzun illər Azərbaycanın mühüm kənd təsərrüfatı rayonlarından biri kimi tanınıb. Pambıqçılıq, taxılçılıq, üzümçülük, heyvandarlıq və digər təsərrüfat sahələri rayon iqtisadiyyatının əsas istiqamətlərini təşkil edib. Burada istehsal olunan kənd təsərrüfatı məhsulları respublikanın ərzaq təminatında da mühüm rol oynayıb. Rayonun inkişafı yalnız iqtisadi göstəricilərlə ölçülmürdü. Ağdam həm də zəngin mədəni həyatı, təhsil müəssisələri, sənaye obyektləri və ictimai infrastrukturu ilə seçilirdi. Şəhərdə və kəndlərdə fəaliyyət göstərən məktəblər, mədəniyyət evləri, kitabxanalar, müəssisələr insanların sosial və mənəvi həyatının formalaşmasına xidmət edirdi.
Ağdamın strateji əhəmiyyəti onun coğrafi mövqeyi ilə də bağlı idi. Qarabağın mərkəzi hissəsində yerləşməsi şəhəri regionun mühüm nəqliyyat, ticarət və kommunikasiya qovşaqlarından birinə çevirmişdi. Bu xüsusiyyətlər Ağdamın iqtisadi və ictimai əhəmiyyətini daha da artırırdı. Lakin Ermənistanın hərbi təcavüzü nəticəsində rayonun inkişaf yolu 1993-cü ildə ağır zərbə aldı. İşğal nəticəsində şəhər və kəndlər dağıdıldı, iqtisadi potensial məhv edildi, yüz minlərlə insan doğma yurd-yuvasından didərgin düşdü. Bir vaxtlar həyatın qaynadığı Ağdam uzun illər viran edilmiş şəhər kimi qaldı.
2020-ci ildə Vətən müharibəsində Azərbaycanın qazandığı tarixi Zəfər Ağdamın taleyində yeni mərhələnin başlanğıcını qoydu. Noyabrın 20-də rayonun işğal altında olan əraziləri Azərbaycana qaytarıldı. Bu gün Ağdamın yenidən qurulması dövlət siyasətinin prioritet istiqamətlərindən biridir. Müasir şəhərsalma prinsipləri əsasında həyata keçirilən layihələr, infrastrukturun yaradılması, sənaye və kənd təsərrüfatı potensialının bərpası bölgənin gələcək inkişafına möhkəm zəmin yaradır.
Ağdamın yenidən qurulması onun əvvəlki iqtisadi və mədəni mövqeyinin bərpası ilə yanaşı, Qarabağın ümumi inkişafına da mühüm töhfə verəcək. Bu qədim Azərbaycan torpağı yenidən regionun aparıcı yaşayış və iqtisadi mərkəzlərindən birinə çevrilməkdədir.
Aqil Mehdiyev – Zərdab rayonu Alıcanlı kənd sakini






















