image-media-qanunla-reklam-49zqr58lyeum0wphsf12
image-17635921405517137424_1200x630

Ağdam – Zəfərdən quruculuğa uzanan yol

image-legitimaz-810x90

Ağdam – Zəfərdən quruculuğa uzanan yol

Azərbaycanın hər bir bölgəsi öz tarixi, adət-ənənələri və yetirdiyi tanınmış insanlarla ölkəmizin ümumi mənzərəsində xüsusi yer tutur. Qarabağın qədim yaşayış məskənlərindən olan Ağdam isə öz zəngin keçmişi, mədəni irsi və insanların doğma torpağa bağlılığı ilə seçilir. Bu gün Ağdam haqqında danışarkən yalnız onun tarixini deyil, həm də yenidən dirçələn gələcəyini xatırlayırıq. 20 Noyabr – Ağdam Şəhəri Günü Azərbaycanın müasir tarixində mühüm hadisələrdən birinin ildönümüdür. 2020-ci ilin həmin günü Ağdam şəhəri işğaldan azad edildi. Bu hadisə uzun illər doğma yurdlarından ayrı yaşayan insanların qəlbində böyük sevinc yaratdı. Ağdamlılar üçün bu tarix evə qayıdışın, doğma küçələri yenidən görmək ümidinin gerçəkləşməsinin başlanğıcı oldu.

Ağdamın keçmişi zəngin və maraqlıdır. Şəhər vaxtilə özünün ticarət həyatı, sənətkarlığı, mədəniyyət müəssisələri və fəal ictimai həyatı ilə seçilirdi. Burada yaşayan insanlar zəhmətkeşliyi, qonaqpərvərliyi və el-obaya bağlılığı ilə tanınırdılar. Ağdam həm də Azərbaycanın milli-mədəni həyatında mühüm rol oynayan şəxsiyyətlərin yetişdiyi torpaqlardandır. İşğal illərində şəhərin üzləşdiyi dağıntılar hər bir azərbaycanlının yaddaşında ağrılı iz buraxdı. Lakin Ağdamın taleyi bununla bitmədi. 44 günlük Vətən müharibəsində qazanılan tarixi Qələbə və şəhərin azad olunması yeni mərhələnin əsasını qoydu. Bu gün həmin mərhələ böyük quruculuq işləri ilə davam edir. Hazırda Ağdamda aparılan işlərin əsas məqsədi şəhəri yenidən yaşayış üçün əlverişli, müasir və inkişaf etmiş məkana çevirməkdir. Yeni yolların çəkilməsi, yaşayış məhəllələrinin salınması, məktəblərin və digər sosial obyektlərin tikilməsi bu məqsədə xidmət edir. Şəhərin iqtisadi potensialının bərpası, sənaye və kənd təsərrüfatı imkanlarının genişləndirilməsi də diqqət mərkəzindədir.

Ağdamın inkişafı yalnız tikinti və abadlıq işləri ilə məhdudlaşmır. Burada sosial həyatın bərpası, təhsilin, mədəniyyətin və ənənələrin yenidən canlandırılması da böyük əhəmiyyət daşıyır. Doğma yurda qayıdan ailələrin rahat yaşaması, uşaqların məktəbə getməsi, gənclərin öz bölgələrində işləməsi və yeni imkanlar əldə etməsi şəhərin gələcəyini müəyyən edən əsas amillərdəndir.

Ağdamın yenidən qurulması bütün ölkəmiz üçün mühüm əhəmiyyət daşıyır. Çünki azad edilmiş ərazilərin inkişafı Azərbaycanın gücünü, quruculuq imkanlarını və gələcəyə olan inamını nümayiş etdirir. Bu gün Ağdamda görülən işlər sabahın daha firavan həyatına hesablanıb. 20 Noyabr münasibətilə bütün ağdamlıları və xalqımızı təbrik edirik. Bu torpağın azadlığı uğrunda canından keçən qəhrəmanlarımızı ehtiramla yad edir, doğma yurda qayıdan sakinlərə əmin-amanlıq və xoşbəxtlik arzulayırıq. Ağdamın qarşısında yeni imkanlar, yeni hədəflər və böyük inkişaf yolu var. Əminik ki, bu qədim şəhər gələcəkdə yenidən öz canlı həyatı, gözəlliyi və uğurları ilə seçiləcək.

 

 

Zərdab rayon Gəlmə kənd ümumi orta ümumtəhsil məktəbinin direktoru-Rəşad İsmayılov


  • whatsapp
  • messenger
  • telegram
  • vkontakte
  • odnoklassniki