Vətən müharibəsinin ən mühüm xüsusiyyətlərindən biri Azərbaycan xalqının vahid amal ətrafında birləşməsi idi
Azərbaycan xalqının tarixində elə hadisələr var ki, onların əhəmiyyəti illər, hətta əsrlər keçsə də, heç vaxt unudulmur. Vətən müharibəsi də xalqımızın yaddaşında belə möhtəşəm və qürurverici hadisələrdən biri kimi yaşayacaqdır. Bu müharibə Azərbaycanın ərazi bütövlüyünün və suverenliyinin bərpası uğrunda aparılan mübarizənin ən mühüm mərhələlərindən biri olmuşdur.
Vətən müharibəsi Azərbaycan xalqının gücünü, həmrəyliyini, vətən sevgisini və milli iradəsini bütün dünyaya göstərdi. Müharibə günlərində cəmiyyətin bütün təbəqələri – hərbçilər, mülki şəxslər, yaşlılar, gənclər, qadınlar və uşaqlar böyük birlik nümayiş etdirdilər. Hamının düşüncəsində və dilində eyni fikir var idi: Vətən bizimdir və Vətən uğrunda hər bir fədakarlığa hazırıq.
Bu Qələbənin əldə olunmasında Azərbaycan Ordusunun qəhrəman əsgər və zabitlərinin müstəsna rolu olmuşdur. Onlar ən ağır döyüşlərdə böyük şücaət göstərərək torpaqlarımızın azadlığı uğrunda canlarından keçmiş, sağlamlıqlarını itirmiş və Azərbaycan tarixinin ən şərəfli səhifələrini yazmışlar.
Vətən müharibəsinin ən mühüm xüsusiyyətlərindən biri Azərbaycan xalqının vahid amal ətrafında birləşməsi idi. Müharibənin ilk günlərindən etibarən xalqımız Azərbaycan Ordusunun yanında olduğunu açıq şəkildə nümayiş etdirdi.
Ölkənin müxtəlif bölgələrində yaşayan insanlar cəbhədə döyüşən hərbçilərimizə mənəvi dəstək göstərir, arxa cəbhədə isə öz imkanları daxilində Vətənə xidmət etməyə çalışırdılar. İnsanlar əsgərlər üçün müxtəlif yardımlar göstərir, şəhid ailələrinin və yaralı hərbçilərin yanında olurdular.
Bu birlik təsadüfi deyildi. Azərbaycan xalqı uzun illər ərzində torpaqlarımızın işğaldan azad olunacağı günü gözləmişdi. Ona görə də Vətən müharibəsi başlayanda hər bir Azərbaycan vətəndaşı bu mübarizəni öz mübarizəsi kimi qəbul etdi.
Müharibə göstərdi ki, xalqın ən böyük gücü onun birliyidir. Xalq və ordu birliyi, milli həmrəylik və Vətən sevgisi Qələbəyə aparan əsas mənəvi amillərdən biri oldu.
Vətən müharibəsində Azərbaycan əsgəri böyük qəhrəmanlıq nümunəsi göstərdi. Əsgər və zabitlərimiz mürəkkəb döyüş şəraitində, dağlıq və çətin relyefdə, güclü müqavimətlə üzləşərək qarşıya qoyulan döyüş tapşırıqlarını yerinə yetirdilər.
Onların hər biri Vətənin müdafiəsini şəxsi həyatından üstün tutdu. Bir çox hərbçimiz son nəfəsinə qədər döyüşərək şəhidlik zirvəsinə ucaldı. Digərləri isə ağır yaralanaraq qazi oldular.
Şəhidlərimizin hər birinin həyat hekayəsi Azərbaycan xalqının qəhrəmanlıq tarixinin bir parçasıdır. Onlar öz canlarını Vətən üçün fəda etməklə gələcək nəsillərə əvəzsiz miras qoydular. Bu gün biz rahat və təhlükəsiz şəraitdə yaşayırıqsa, bunun arxasında Azərbaycan əsgərinin fədakarlığı dayanır. Ona görə də şəhidlərimizin xatirəsini yaşatmaq hər birimizin mənəvi borcudur.
Cavid Məlikov- Zərdab şəhər sakini, fəal gənc
