Türkmənistan tərəfinə Azərbaycanın Mərkəzi Asiya Dövlət Başçılarının Məşvərət Şurasına tamhüquqlu üzv qəbul edilməsində fəal dəstəyinə görə bir daha təşəkkürümü bildirmək istərdim.
Azərbaycan son illərdə Mərkəzi Asiya ölkələri ilə siyasi, iqtisadi, nəqliyyat, enerji və humanitar sahələrdə əməkdaşlığın genişləndirilməsinə xüsusi diqqət yetirir. Tarixi İpək Yolunun mühüm hissəsi olan regionla əlaqələrin möhkəmləndirilməsi Bakı üçün strateji əhəmiyyət daşıyır. Ortaq tarix, dil və mədəni dəyərlər üzərində qurulan münasibətlər Türk dünyasının inteqrasiyasına töhfə verməklə yanaşı, Avrasiya məkanında yeni əməkdaşlıq imkanları yaradır. Azərbaycanın Mərkəzi Asiya dövlətləri ilə inkişaf edən tərəfdaşlığı regional sabitliyin, iqtisadi əlaqələrin və nəqliyyat-logistika marşrutlarının gücləndirilməsi baxımından mühüm rol oynayır.
İyunun 22-də Türkmənistan Prezidenti Sərdar Berdiməhəmmədovun Azərbaycana səfəri çərçivəsində keçirilən görüşlər bu istiqamətdə əməkdaşlığın daha da dərinləşdirilməsi üçün yeni imkanlar açdı. Səfər zamanı tərəflər ikitərəfli və çoxtərəfli münasibətlərin perspektivlərini müzakirə etdilər, regional əməkdaşlığın gücləndirilməsi ilə bağlı fikir mübadiləsi apardılar. Xüsusilə nəqliyyat dəhlizlərinin inkişafı, ticarət əlaqələrinin genişləndirilməsi və beynəlxalq platformalarda qarşılıqlı dəstək məsələləri diqqət mərkəzində oldu.
Cənab Prezident İlham Əliyev mətbuata bəyanatında Azərbaycanın Mərkəzi Asiya məkanında artan roluna və Türkmənistanın göstərdiyi dəstəyə toxunaraq bildirib: “Türkmənistan tərəfinə Azərbaycanın Mərkəzi Asiya Dövlət Başçılarının Məşvərət Şurasına tamhüquqlu üzv qəbul edilməsində fəal dəstəyinə görə bir daha təşəkkürümü bildirmək istərdim. Mən buna tarixi hadisə kimi baxıram, çünki coğrafi olaraq Mərkəzi Asiyanın bir hissəsi olmasaq da, mədəni və tarixi əlaqələrimiz, həmçinin bu gün regional qarşılıqlı əlaqə və nəqliyyat-logistika problemləri ilə bağlı həll etdiyimiz konkret məsələlər təbii olaraq böyük Mərkəzi Asiyanın vahid geosiyasi və geoiqtisadi bölgə kimi qəbul edilməsi üçün ilkin şərtlər yaradır. Təbii ki, biz ilk gündən çoxtərəfli formatda fəal qarşılıqlı fəaliyyət göstərməyə başladıq.”
Dövlət başçısının qeyd etdiyi bu məqam Azərbaycanın Mərkəzi Asiya ilə münasibətlərində yeni mərhələnin başlandığını göstərir. Azərbaycanın Məşvərət Şurasına tamhüquqlu üzv kimi qoşulması ölkənin region dövlətləri ilə əlaqələrinin institusional əsasda daha da güclənməsinə imkan yaradır. Bu addım həm də Xəzər dənizi vasitəsilə Şərq-Qərb nəqliyyat marşrutlarının inkişafına, ticarət dövriyyəsinin artırılmasına və regional iqtisadi inteqrasiyanın dərinləşməsinə xidmət edir.
Azərbaycanın Mərkəzi Asiya ölkələri ilə əməkdaşlığının genişlənməsi yalnız ikitərəfli münasibətlər baxımından deyil, bütövlükdə Türk dünyasının birliyinin möhkəmlənməsi və Avrasiya məkanında yeni geoiqtisadi imkanların formalaşması baxımından da böyük əhəmiyyət daşıyır. Türkmənistan Prezidentinin Azərbaycana səfəri zamanı aparılan müzakirələr və əldə olunan razılaşmalar gələcək dövrdə bu əməkdaşlığın daha da genişlənəcəyindən xəbər verir.
Babək Mikayılov – Zərdab Peşə liseyinin direktoru
