Türkiyə və Azərbaycan kimi iki ölkəyə veriləcək mesaj yalnız dostluq və qardaşlıqdır.
IV Şuşa Qlobal Media Forumu bir daha göstərdi ki, Şuşa artıq yalnız Azərbaycanın tarixi və mədəni irsinin rəmzi deyil, həm də beynəlxalq dialoq və strateji müzakirələrin keçirildiyi mühüm platformaya çevrilib. Dünyanın müxtəlif ölkələrindən media nümayəndələrinin, ekspertlərin və ictimai rəy liderlərinin iştirak etdiyi forumda Prezident İlham Əliyevin çıxışı regional və qlobal əhəmiyyət kəsb edən məsələlərə aydın münasibəti ilə diqqət çəkdi. Dövlət başçısının “Türkiyə və Azərbaycan kimi iki ölkəyə veriləcək mesaj yalnız dostluq və qardaşlıqdır” fikri isə Azərbaycan–Türkiyə münasibətlərinin mahiyyətini və gələcək inkişaf istiqamətlərini dolğun şəkildə ifadə etdi.
Azərbaycan ilə Türkiyə arasında münasibətlər ortaq tarixə, dilə, mədəniyyətə və mənəvi dəyərlərə söykənir. Bu münasibətlər illər ərzində qarşılıqlı etimada əsaslanan strateji tərəfdaşlıq səviyyəsinə yüksəlib. İki dövlət arasında siyasi, iqtisadi, hərbi, enerji, nəqliyyat, elm, təhsil və mədəniyyət sahələrində həyata keçirilən layihələr bu əməkdaşlığın davamlı və çoxşaxəli xarakter daşıdığını təsdiqləyir. Prezident İlham Əliyevin forumdakı çıxışında səsləndirdiyi fikirlər bir daha nümayiş etdirdi ki, Azərbaycan və Türkiyə münasibətləri situativ maraqlara deyil, sarsılmaz qardaşlıq prinsiplərinə əsaslanır. Dövlət başçısının vurğuladığı kimi, bu münasibətlərin əsas mesajı qarşılıqlı dəstək, etimad və həmrəylikdir. Məhz buna görə də iki ölkə regional və beynəlxalq məsələlərdə əksər hallarda vahid mövqedən çıxış edir və bir-birinin milli maraqlarını ardıcıl şəkildə müdafiə edir.
Son illərdə Azərbaycan–Türkiyə əməkdaşlığı yeni mərhələyə qədəm qoyub. Xüsusilə Qarabağın bərpası, regionda kommunikasiyaların açılması, enerji təhlükəsizliyi, Orta Dəhlizin inkişafı və Türk dünyasının inteqrasiyası istiqamətində həyata keçirilən birgə təşəbbüslər iki qardaş dövlətin strateji baxışının ortaq olduğunu göstərir. Bu əməkdaşlıq təkcə iki ölkənin deyil, bütövlükdə regionun sabitliyi və inkişafı üçün mühüm amilə çevrilib. Şuşada keçirilən beynəlxalq forumun belə bir mesajın səsləndirilməsi üçün seçilməsi də təsadüfi deyil. Şuşa Azərbaycanın zəfərinin, milli birliyinin və dirçəlişinin simvoludur. Məhz bu şəhərdən dünya ictimaiyyətinə ünvanlanan dostluq və qardaşlıq çağırışı regionda davamlı sülhün və qarşılıqlı əməkdaşlığın möhkəmləndirilməsinə xidmət edir.
Azərbaycan və Türkiyə arasında mövcud olan yüksək səviyyəli əməkdaşlıq “Bir millət, iki dövlət” fəlsəfəsinin real həyatda uğurla həyata keçirildiyini təsdiqləyir. Bu prinsip təkcə siyasi şüar deyil, iki xalqın gündəlik münasibətlərində, dövlətlərarası əməkdaşlıqda və beynəlxalq platformalarda qarşılıqlı dəstək siyasətində öz əksini tapır. Qarşılıqlı etimad və strateji tərəfdaşlıq sayəsində həyata keçirilən layihələr gələcək nəsillər üçün də möhkəm əməkdaşlıq təməli yaradır. Şuşadan dünyaya ünvanlanan bu çağırış bir daha təsdiq edir ki, qardaşlıq, həmrəylik və qarşılıqlı dəstək Azərbaycan ilə Türkiyənin münasibətlərinin dəyişməz əsasını təşkil edir.
Zərdab rayon Əlibəyli kənd tam orta ümumtəhsil məktəbinin direktoru-Kəmalə Əliyeva
