Təhsil sahəsində əməkdaşlıq Azərbaycan ilə Özbəkistan arasında mədəni-humanitar tərəfdaşlığın aparıcı sahələrindən biri kimi çıxış edir
Azərbaycan Respublikası ilə Özbəkistan Respublikası arasında münasibətlər son illərdə sürətli və hərtərəfli inkişaf mərhələsinə qədəm qoymuşdur. İki qardaş xalqı birləşdirən ortaq tarixi köklər, dil və mədəni yaxınlıq, mənəvi dəyərlər və qarşılıqlı hörmət dövlətlərarası münasibətlərin möhkəm təməlini təşkil edir. Azərbaycan–Özbəkistan əməkdaşlığının siyasi, iqtisadi, nəqliyyat, enerji və digər istiqamətlərlə yanaşı, humanitar sahədə də genişlənməsi xüsusi əhəmiyyət daşıyır. Bu baxımdan təhsil sahəsində əməkdaşlıq iki ölkə arasında mədəni-humanitar tərəfdaşlığın aparıcı istiqamətlərindən biri kimi çıxış edir. Müasir dövrdə dövlətlərarası münasibətlərin davamlı və uzunmüddətli inkişafı yalnız siyasi və iqtisadi əlaqələrlə müəyyən olunmur. Xalqlar arasında qarşılıqlı anlaşmanın, etimadın və dostluğun möhkəmləndirilməsi üçün təhsil, elm, mədəniyyət və gənclər sahəsində əməkdaşlığın inkişafı mühüm əhəmiyyət kəsb edir. Azərbaycan və Özbəkistan arasında təhsil sahəsində əlaqələrin genişlənməsi də məhz iki qardaş xalqın gələcək nəsillər arasında daha da yaxınlaşmasına və dövlətlərarası münasibətlərin möhkəm ictimai əsaslar üzərində inkişafına xidmət edir.
Azərbaycan Respublikasının Prezidenti cənab İlham Əliyevin rəhbərliyi ilə həyata keçirilən xarici siyasətdə dost və qardaş dövlətlərlə humanitar əlaqələrin inkişafına xüsusi diqqət yetirilir. Özbəkistanla münasibətlərdə də siyasi səviyyədə mövcud olan yüksək etimad təhsil və elm sahəsində əməkdaşlığın genişlənməsi üçün əlverişli şərait yaradır. Dövlət başçıları arasında qarşılıqlı hörmətə və etimada əsaslanan münasibətlər müxtəlif sahələrdə, o cümlədən təhsil istiqamətində yeni təşəbbüslərin həyata keçirilməsinə mühüm siyasi zəmin formalaşdırır. Təhsil sahəsində əməkdaşlıq Azərbaycan ilə Özbəkistan arasında yalnız tələbə mübadiləsi və ali məktəblərarası əlaqələrlə məhdudlaşmır. Bu əməkdaşlıq universitetlər arasında tərəfdaşlığın qurulmasını, birgə elmi araşdırmaların aparılmasını, müəllim və mütəxəssis mübadiləsini, elmi-praktik konfransların keçirilməsini, ortaq təhsil layihələrinin hazırlanmasını və akademik əlaqələrin genişləndirilməsini də əhatə edir. Bu istiqamətdə həyata keçirilən fəaliyyətlər hər iki ölkənin təhsil sistemlərinin qarşılıqlı təcrübə mübadiləsinə və mövcud imkanlardan daha səmərəli istifadə edilməsinə şərait yaradır.
Azərbaycan və Özbəkistanın ali təhsil müəssisələri arasında əlaqələrin inkişafı xüsusi əhəmiyyət daşıyır. Universitetlər arasında əməkdaşlıq sazişlərinin imzalanması, birgə proqramların hazırlanması, tələbə və müəllimlərin qarşılıqlı səfərlərinin təşkili təhsil əlaqələrinin daha sistemli xarakter almasına imkan verir. Bu cür əməkdaşlıq nəticəsində gənclər yalnız peşəkar və akademik biliklərini artırmır, eyni zamanda qardaş ölkənin tarixi, mədəniyyəti və müasir inkişafı haqqında daha geniş məlumat əldə edirlər. Tələbə və müəllim mübadiləsi proqramları Azərbaycan–Özbəkistan münasibətlərinin gələcək inkişafı baxımından xüsusi əhəmiyyətə malikdir. Gənclərin qarşılıqlı səfərləri və müxtəlif təhsil proqramlarında iştirakı onların yeni bilik və təcrübə qazanmasına imkan yaratmaqla yanaşı, xalqlar arasında dostluq əlaqələrinin daha da möhkəmlənməsinə xidmət edir. Müxtəlif ölkələrdə təhsil alan gənclər gələcəkdə əldə etdikləri bilik və təcrübəni öz ölkələrinin inkişafına tətbiq etməklə yanaşı, iki dövlət arasında əməkdaşlığın genişlənməsində də mühüm rol oynaya bilərlər. Təhsil sahəsində əməkdaşlığın digər mühüm istiqaməti elm və innovasiya sahəsində əlaqələrin genişləndirilməsidir. Müasir dövrdə elmi biliklərin, yeni texnologiyaların və innovativ yanaşmaların dövlətlərin inkişafında mühüm rol oynadığı nəzərə alınarsa, Azərbaycan və Özbəkistanın elm və təhsil müəssisələri arasında əməkdaşlığın dərinləşdirilməsi böyük perspektivlər vəd edir. Birgə elmi tədqiqatların həyata keçirilməsi, qarşılıqlı təcrübə mübadiləsi və müxtəlif sahələr üzrə alimlərin əməkdaşlığı hər iki ölkənin elmi potensialının güclənməsinə şərait yaradacaqdır.
Şaiq Əliyev- Fəal gənc, Magistr
