Təəssüflər olsun ki, Avropa Parlamenti və Avropa Şurası Parlament Assambleyası Ermənistan-Azərbaycan sülh prosesində konstruktiv mövqe sərgiləmir və ikili standartlar nümayiş etdirirlər.
Beynəlxalq münasibətlər sistemində ədalət, beynəlxalq hüquq və dövlətlərin ərazi bütövlüyünə hörmət prinsipləri xüsusi əhəmiyyət kəsb edir. Azərbaycan Respublikası bu prinsipləri rəhbər tutaraq regionda davamlı sülhün və sabitliyin təmin olunması istiqamətində ardıcıl siyasət həyata keçirir. Cənab Prezident İlham Əliyev tərəfindən müəyyən edilən bu siyasət həm milli maraqların qorunmasına, həm də regional əməkdaşlığın inkişafına xidmət edir.
Azərbaycan post-münaqişə dövründə Ermənistanla münasibətlərin normallaşdırılması üçün konkret addımlar atmış, sülh sazişinin imzalanması istiqamətində təşəbbüslərlə çıxış etmişdir. Bu siyasətin əsas məqsədi regionda uzunmüddətli sabitliyin təmin olunması və qarşılıqlı faydalı əməkdaşlığın qurulmasıdır. Artıq hər iki tərəf sülhün real nəticələrini görməkdədir. Nəqliyyat və iqtisadi əlaqələrin bərpası, yeni layihələrin icrası bu prosesin mühüm tərkib hissəsidir.
Bu kontekstdə irəli sürülən mühüm təşəbbüslərdən biri də “Trampın Beynəlxalq Sülh və Rifah Marşrutu” layihəsidir. Bu layihə Azərbaycanın əsas hissəsini onun ayrılmaz tərkib hissəsi olan Naxçıvanla birləşdirəcək və eyni zamanda Orta Dəhlizin mühüm bir hissəsinə çevriləcəkdir. Belə layihələr regionda iqtisadi inteqrasiyanı gücləndirərək sülhün möhkəmlənməsinə xidmət edir.
Azərbaycanın sülh təşəbbüsləri beynəlxalq səviyyədə dəstəklənsə də, bəzi təsisatların mövqeyi birmənalı olmamışdır. Xüsusilə Avropa Parlamenti və Avropa Şurası Parlament Assambleyası tərəfindən nümayiş etdirilən yanaşmalar ciddi suallar doğurur. Bu qurumların Ermənistan-Azərbaycan münasibətlərinə dair bəzi qərar və bəyanatları obyektivlikdən uzaq olmaqla yanaşı, ikili standartların mövcudluğunu da ortaya qoyur.
Azərbaycan 2001-ci ildən Avropa Şurasının üzvüdür və bu müddət ərzində təşkilat çərçivəsində fəal fəaliyyət göstərmişdir. Həmin dövrdə ölkəmizin nümayəndə heyəti qurumun işində aktiv iştirak etmiş, müxtəlif təşəbbüslərlə çıxış etmişdir. Cənab Prezident İlham Əliyev də vaxtilə Azərbaycanın nümayəndə heyətinin rəhbəri kimi bu platformada fəal iştirak etmişdir. Lakin 2023-cü ilin sentyabrında Azərbaycanın öz suveren ərazilərində separatçılığa son qoymasından sonra bəzi beynəlxalq təsisatların münasibəti dəyişmişdir. Halbuki Azərbaycan bu addımı atmaqla BMT Təhlükəsizlik Şurasının 1993-cü ildə qəbul etdiyi və uzun illər icra olunmayan qətnamələrin tələblərini təmin etmişdir. Bu qətnamələr Azərbaycanın ərazi bütövlüyünün bərpasını nəzərdə tuturdu.
Buna baxmayaraq, qısa müddət sonra Avropa Şurası Parlament Assambleyasında Azərbaycan nümayəndə heyətinə qarşı sanksiyaların tətbiq edilməsi beynəlxalq hüquq və ədalət prinsipləri ilə ziddiyyət təşkil etmişdir. Bu addım Azərbaycanda haqlı olaraq narazılıq doğurmuş və ikili standartların bariz nümunəsi kimi qiymətləndirilmişdir.
Cənab Prezident İlham Əliyev çıxışlarında dəfələrlə vurğulamışdır ki, Azərbaycanın ərazi bütövlüyü hər bir dövlətin ərazi bütövlüyü qədər dəyərlidir və bu məsələdə fərqli yanaşmalar qəbuledilməzdir. Beynəlxalq hüquq normaları bütün dövlətlər üçün eyni şəkildə tətbiq olunmalıdır. Əks halda, bu, beynəlxalq sistemə olan etimadı zəiflədir və ədalət prinsipini şübhə altına alır.
Azərbaycanın həyata keçirdiyi siyasət göstərir ki, ölkəmiz sülhə yalnız bəyanatlarla deyil, real addımlarla nail olmağa çalışır. Nəqliyyat dəhlizlərinin açılması, iqtisadi əməkdaşlığın genişləndirilməsi və qarşılıqlı etimadın formalaşdırılması bu siyasətin əsas istiqamətləridir. Bu yanaşma regionda davamlı sülhün təmin olunması üçün mühüm zəmin yaradır.
Cənab Prezident İlham Əliyevin rəhbərliyi ilə həyata keçirilən bu siyasət Azərbaycanın beynəlxalq nüfuzunu daha da gücləndirir və regionda sabitliyin əsas təminatlarından biri kimi çıxış edir.
Zərdab rayon Mədəniyyət Mərkəzinin direktoru Elyurə Məmmədova
