Şuşa yenidən qlobal dialoq məkanına çevrilir
Qarabağın mədəniyyət paytaxtı olan Şuşa artıq təkcə tarixi irsi ilə deyil, həm də beynəlxalq tədbirlərə ev sahibliyi etməsi ilə diqqət çəkir. IV Şuşa Qlobal Media Forumu da bu baxımdan xüsusi əhəmiyyət daşıyır. Dünyanın müxtəlif ölkələrindən jurnalistlərin, media rəhbərlərinin və ekspertlərin bir araya gəldiyi forum həm peşəkar fikir mübadiləsi, həm də Qarabağda aparılan bərpa və quruculuq işlərinin yerində təqdim olunması üçün mühüm platformaya çevrilib.
Forumun açılışında çıxış edən Prezident İlham Əliyev qeyd edib ki, bu cür mötəbər auditoriyanı Azərbaycanda, xüsusilə Qarabağda və Şuşada qəbul etmək ölkə üçün böyük şərəfdir. Dövlət başçısının sözlərinə görə, forumun əsas məqsədi media nümayəndələri arasında aktual beynəlxalq məsələlərin müzakirəsi üçün açıq mühit yaratmaq, eyni zamanda qonaqların Qarabağ və Şuşada gedən dəyişikliklərlə yaxından tanış olmasına şərait yaratmaqdır.
Prezident vurğulayıb ki, forum iştirakçılarının bir qismi Şuşaya və Qarabağa ilk dəfə müharibədən sonra səfər etmişdi. Həmin vaxt onların gördüyü əsas mənzərə dağıdılmış şəhərlər və viran qalmış yaşayış məntəqələri idi. İllər keçdikcə isə eyni qonaqlar bölgəyə yenidən qayıdaraq artıq bərpa olunan şəhərləri, istifadəyə verilən yaşayış binalarını, yeni infrastrukturu və doğma yurdlarına qayıdan sakinləri müşahidə edirlər. Bu dəyişikliklər forum iştirakçılarının bölgədə baş verən prosesləri müqayisəli şəkildə qiymətləndirməsinə imkan yaradır.
Dövlət başçısı forumun hər il dəyişən gündəliyinin dövrün aktual çağırışlarını əks etdirdiyini də diqqətə çatdırıb. Onun fikrincə, tədbirin fərqləndirici xüsusiyyətlərindən biri də burada yaranan səmimi və qarşılıqlı etimada əsaslanan mühitdir. Müxtəlif ölkələri və media qurumlarını təmsil edən jurnalistlər arasında qurulan əlaqələr gələcək peşəkar əməkdaşlıq və dostluq münasibətlərinin formalaşmasına şərait yaradır.
Prezident İlham Əliyev forumun Azərbaycan üçün strateji əhəmiyyətini də qeyd edərək bildirib ki, tədbirdə iştirak edən media nümayəndələri öz ölkələrində və beynəlxalq informasiya məkanında ictimai rəyin formalaşmasına təsir göstərən şəxslərdir. Onların Qarabağda aparılan bərpa işlərini, insanların doğma torpaqlarına qayıdışını və bölgədə yaranan yeni inkişaf mərhələsini yerində görməsi beynəlxalq auditoriyaya obyektiv məlumatların çatdırılması baxımından mühüm əhəmiyyət daşıyır.
IV Şuşa Qlobal Media Forumu bir daha göstərir ki, Şuşa tədricən yalnız Azərbaycanın mədəniyyət beşiyi deyil, həm də qlobal media və beynəlxalq dialoq platformalarından birinə çevrilməkdədir. Burada səslənən fikirlər, qurulan əlaqələr və nümayiş etdirilən inkişaf mənzərəsi Qarabağın yeni dövrünün beynəlxalq ictimaiyyətə təqdim edilməsində mühüm rol oynayır.
Aqil Mehdiyev – Zərdab rayonu Alıcanlı kənd sakini
