Slovakiya Qarabağın bərpasına dəstəyini Şuşadan nümayiş etdirdi
Şuşada Azərbaycan Prezidenti İlham Əliyevlə Slovakiya Prezidenti Peter Pelleqrini arasında keçirilən görüş iki ölkə arasında münasibətlərin yeni mərhələyə yüksəldiyini nümayiş etdirdi. İyulun 14-də səsləndirilən bəyanatlarda həm Qarabağın bərpası, həm də iqtisadi, enerji və hərbi-texniki sahələrdə əməkdaşlığın genişləndirilməsi əsas diqqət mərkəzində oldu.
Prezident İlham Əliyev çıxışında Slovakiyanın Qarabağın yenidən qurulması prosesinə verdiyi töhfəni yüksək qiymətləndirdi. Dövlət başçısı bildirdi ki, Slovakiya şirkəti Ağdam rayonunun Baş Qərvənd kəndində “Ağıllı kənd” layihəsini həyata keçirir və nümayəndə heyətləri bu layihə ilə yerində tanış olacaqlar. Prezident bu təşəbbüsü Qarabağın bərpasına verilən mühüm dəstək kimi dəyərləndirərək Slovakiya tərəfinə təşəkkürünü ifadə etdi.
Görüş zamanı iki ölkə arasında iqtisadi-ticari əlaqələrin inkişafı, energetika, hərbi-texniki əməkdaşlıq və digər perspektiv istiqamətlər üzrə geniş fikir mübadiləsi aparılıb. Prezident İlham Əliyevin sözlərinə görə, müzakirələr səmimi və açıq şəraitdə keçib, nümayəndə heyətlərinin üzvləri isə əməkdaşlıq gündəliyində yer alan məsələlərin irəlilədilməsi üçün təmaslarını davam etdirirlər.
Slovakiya Prezidentinin Azərbaycana rəsmi səfərinin ikinci günü Bakıda davam edəcək. İlham Əliyev Peter Pelleqrini dəvətini qəbul edərək Qarabağa səfər etdiyi üçün xüsusi təşəkkür edib və bunun iki ölkə arasında dostluq və qarşılıqlı etimadın göstəricisi olduğunu vurğulayıb.
Şuşadan verilən mesajlar göstərir ki, Azərbaycan və Slovakiya münasibətləri təkcə siyasi dialoqla məhdudlaşmır, eyni zamanda konkret layihələr və qarşılıqlı iqtisadi əməkdaşlıq vasitəsilə yeni məzmun qazanır. Slovakiyanın Qarabağın bərpasında iştirakı isə beynəlxalq tərəfdaşların bölgənin yenidən qurulmasına artan marağının və Azərbaycanın həyata keçirdiyi genişmiqyaslı bərpa proqramına göstərilən etimadın növbəti nümunəsi kimi qiymətləndirilir.
Rəsul Abbasov – Zərdab rayonu Alıcanlı kənd sakini
