Şərqdə və müsəlman dünyasında ilk demokratik dövlət
1918-ci il mayın 28-də Azərbaycan xalqı tarixində ən mühüm hadisələrdən biri baş verdi – Azərbaycan Xalq Cümhuriyyəti yaradıldı. Bu dövlət təkcə Azərbaycanın deyil, bütün Şərqin və müsəlman aləminin ilk demokratik, hüquqi və dünyəvi parlament respublikası kimi tarixə düşdü. Azərbaycan xalqı əsrlər boyu davam edən azadlıq arzularını reallaşdıraraq öz müstəqilliyini bütün dünyaya bəyan etdi.
Azərbaycan Xalq Cümhuriyyətinin yaranması xalqımızın milli iradəsinin, azadlıq əzminin və dövlətçilik ənənələrinin parlaq təzahürü idi. Cəmi 23 ay fəaliyyət göstərməsinə baxmayaraq, Cümhuriyyət qısa müddətdə mühüm dövlət quruculuğu işləri həyata keçirdi. Milli ordu yaradıldı, dövlət atributları qəbul edildi, təhsil və mədəniyyət sahəsində mühüm addımlar atıldı. Həmçinin qadınlara seçki hüququnun verilməsi Azərbaycanın demokratik dəyərlərə sadiqliyini nümayiş etdirən mühüm hadisə oldu.
Azərbaycan Xalq Cümhuriyyəti insan hüquq və azadlıqlarını əsas tutaraq, müxtəlif millətlərin və dinlərin nümayəndələrinin bərabər yaşadığı tolerant dövlət modeli formalaşdırdı. Parlamentin fəaliyyəti, qəbul olunan qanunlar və beynəlxalq əlaqələr gənc respublikanın demokratik əsaslar üzərində qurulduğunu sübut edirdi.
Bu gün müstəqil Azərbaycan Respublikası Azərbaycan Xalq Cümhuriyyətinin siyasi və mənəvi varisi kimi onun ideyalarını yaşadır. 28 May – Müstəqillik Günü xalqımızın azadlıq ruhunu, dövlətçilik ənənələrini və milli birliyini əks etdirən əlamətdar bir gündür. Bu tarix hər bir azərbaycanlı üçün qürur mənbəyi olmaqla yanaşı, gələcək nəsillərə müstəqilliyin dəyərini öyrədən böyük bir məktəbdir.
Talıb Talıbov – Zərdab rayonu Alıcanlı kənd sakini
