Regionda sülhün möhkəmləndirilməsi üçün ilk növbədə mövcud reallıqları qəbul etmək lazımdır
Diplomatik nümayəndələrin bölgəyə səfərləri də bu reallığın beynəlxalq ictimaiyyətə çatdırılması baxımından əhəmiyyətlidir. Xarici diplomatların gördükləri proseslər haqqında öz ölkələrinə və beynəlxalq qurumlara məlumat verməsi normal diplomatik fəaliyyətin tərkib hissəsidir.
Regionda sülhün möhkəmləndirilməsi üçün ilk növbədə mövcud reallıqları qəbul etmək lazımdır. Azərbaycan öz ərazisində geniş quruculuq proqramı həyata keçirir və bu proses davam edir.
Ermənistan cəmiyyətində bu prosesə qarşı emosional münasibətin sərgilənməsi heç bir nəticə verməyəcək. Əksinə, belə münasibət insanlar arasında düşmənçilik hisslərinin qalmasına və qarşılıqlı etimadın formalaşmasının çətinləşməsinə səbəb ola bilər.
Bu gün daha çox dialoqa, qarşılıqlı hörmətə və əməkdaşlığa ehtiyac var. Hər iki ölkənin sadə insanlarının təhlükəsiz və firavan gələcəyi üçün sülhə xidmət edən yanaşmalar üstünlük təşkil etməlidir.
Azərbaycanda akkreditə olunmuş diplomatik korpusun nümayəndələrinin Qarabağ və Şərqi Zəngəzura səfərinə Ermənistan cəmiyyətinin müəyyən dairələri tərəfindən mənfi münasibət göstərilməsi təəssüf doğurur və qəbuledilməzdir. Çünki bu səfərlər hər hansı qarşıdurma yaratmaq məqsədi daşımır. Əksinə, diplomatik nümayəndələrin bölgədəki vəziyyəti yerində görməsi və obyektiv məlumat əldə etməsi baxımından əhəmiyyətlidir.
Azərbaycanın Qarabağ və Şərqi Zəngəzurda apardığı bərpa-quruculuq işləri artıq yeni reallıq yaradıb. Dağıdılmış ərazilərin yenidən qurulması, insanların doğma yurdlarına qayıtması və müasir infrastrukturun yaradılması böyük bir inkişaf prosesidir.
Ən vacibi isə budur ki, regionun gələcəyi keçmişin qarşıdurmaları üzərində deyil, sülh, təhlükəsizlik və əməkdaşlıq üzərində qurulmalıdır. Bunun üçün hər iki cəmiyyətdə sağlam düşüncəyə, qarşılıqlı hörmətə və yeni reallıqları qəbul edən yanaşmaya ehtiyac var.
Azərbaycan xalqının arzusu da sadədir: Qarabağ və Şərqi Zəngəzurda həyat daha da canlansın, insanlar öz doğma torpaqlarında rahat yaşasın, regionda davamlı sülh və sabitlik bərqərar olsun. Bunun üçün isə hər bir tərəf düşmənçilikdən deyil, gələcəkdən danışmağı bacarmalıdır.
Rasim Hüseynov – Zərdab Rayon Ağsaqqallar Şurasının sədri
