Regional İnkişaf proqramlarını icra etdikcə sosial infrastruktur layihələrini də uğurla icra etmişik.
Azərbaycanın son illərdə əldə etdiyi sosial-iqtisadi uğurların əsasını məqsədyönlü dövlət siyasəti və regionların davamlı inkişafına yönəlmiş proqramlar təşkil edir. Prezident cənab İlham Əliyevin rəhbərliyi ilə həyata keçirilən regional inkişaf proqramları ölkənin bütün bölgələrində geniş quruculuq işlərinə, yeni iqtisadi imkanların yaranmasına və əhalinin rifah səviyyəsinin yüksəlməsinə səbəb olub. Dövlət başçısının kənd təsərrüfatı məsələlərinə həsr olunmuş müşavirədə səsləndirdiyi “Regional İnkişaf proqramlarını icra etdikcə sosial infrastruktur layihələrini də uğurla icra etmişik” fikri son illərin inkişaf mənzərəsini dolğun şəkildə ifadə edir.
Həqiqətən də, regionların inkişafı yalnız iqtisadi göstəricilərin yüksəlməsi ilə məhdudlaşmır. İnsanların rahat və təhlükəsiz yaşayışı üçün sosial infrastrukturun qurulması da mühüm əhəmiyyət daşıyır. Son illərdə ölkənin müxtəlif bölgələrində yeni yolların çəkilməsi, məktəblərin və xəstəxanaların tikilməsi, içməli su layihələrinin həyata keçirilməsi, elektrik və qaz təchizatının yaxşılaşdırılması regionların inkişafına böyük təkan verib. Bu layihələr kənd və rayonlarda yaşayan insanların gündəlik həyat şəraitini əhəmiyyətli dərəcədə dəyişib.
Prezident İlham Əliyev müşavirədə vurğulayıb ki, regionların inkişafı ilə bağlı qəbul olunan dövlət proqramları kənd təsərrüfatının inkişafı ilə paralel şəkildə sosial layihələrin həyata keçirilməsinə də geniş imkan yaradıb. Dövlət başçısı qeyd edib ki, son illərdə minlərlə kilometr avtomobil yolu çəkilib, kənd yolları yenidən qurulub, yeni su anbarları və suvarma kanalları istifadəyə verilib. Bu infrastruktur layihələri kənd təsərrüfatının inkişafını sürətləndirməklə yanaşı, insanların sosial rifahına da mühüm təsir göstərib.
Regionlarda yol infrastrukturunun yenilənməsi iqtisadi aktivliyi artıran əsas amillərdən biri olub. Əvvəllər ucqar kəndlərdə yaşayan insanlar bazarlara çıxışda ciddi çətinliklərlə üzləşirdilərsə, indi müasir yollar kəndlə şəhər arasındakı məsafəni daha da yaxınlaşdırıb. Fermerlər istehsal etdikləri məhsulları bazarlara daha sürətli və rahat şəkildə çatdırırlar. Bu isə həm məhsul itkisinin qarşısını alır, həm də kənd təsərrüfatında gəlirliliyi artırır. Prezident İlham Əliyevin həyata keçirdiyi sosial siyasətin əsas istiqamətlərindən biri də kəndlərin abadlaşdırılması və əhalinin sosial rifahının yaxşılaşdırılmasıdır. Regionlarda parkların salınması, yeni yaşayış massivlərinin yaradılması, içməli su və kanalizasiya layihələrinin icrası insanların həyat keyfiyyətini yüksəldən mühüm addımlar olub. Xüsusilə kəndlərdə fasiləsiz elektrik enerjisi və təbii qaz təminatının yaradılması sosial rifahın yüksəlməsində mühüm rol oynayıb.
Regional inkişaf proqramları ölkədə məşğulluğun artırılmasına da mühüm töhfə verib. Yeni müəssisələrin yaradılması, aqroparkların və sənaye zonalarının fəaliyyətə başlaması minlərlə insan üçün iş yerləri açıb. Bu isə regionlarda yoxsulluğun azalmasına, əhalinin gəlirlərinin artmasına və sosial sabitliyin möhkəmlənməsinə səbəb olub. Nəticə etibarilə, regional inkişaf proqramlarının uğurla icrası sosial infrastruktur layihələrinin də geniş vüsət almasına səbəb olub. Prezident İlham Əliyevin rəhbərliyi ilə həyata keçirilən məqsədyönlü siyasət nəticəsində Azərbaycan regionları yeni inkişaf mərhələsinə qədəm qoyub. İnsanların sosial rifahının yüksəldilməsi, kənd və rayonların abadlaşdırılması, müasir infrastrukturun yaradılması ölkənin davamlı inkişaf strategiyasının mühüm tərkib hissəsinə çevrilib. Bu siyasət Azərbaycanın gələcək inkişafı və xalqın firavan həyatı üçün mühüm təminatdır.
Zərdab rayon Salahlı kənd ümumi orta ümumtəhsil məktəbinin direktoru-Rəşad İsmayılov
