Qəbul edilmiş proqramlar və qərarlar böyük dönüşə səbəb olub
Prezident İlham Əliyev kənd təsərrüfatı məsələlərinə həsr olunmuş müşavirədə çıxışı zamanı aqrar sahənin ölkə iqtisadiyyatı üçün strateji əhəmiyyət daşıdığını xüsusi vurğulayıb. Dövlət başçısı qeyd edib ki, son illərdə həyata keçirilən proqramlar, qəbul edilən qərarlar və dövlət dəstəyi mexanizmləri kənd təsərrüfatında müəyyən dönüş yaradıb, regionlarda yeni təsərrüfatlar formalaşıb, fermerlərin fəaliyyət imkanları genişlənib və istehsal potensialı artıb. Bununla belə, Prezident son bir neçə il ərzində kənd təsərrüfatının inkişaf tempində müşahidə olunan durğunluğun ciddi narahatlıq doğurduğunu bildirib. Onun sözlərinə görə, mövcud problemlərin aradan qaldırılması və aqrar sektorun daha sürətli inkişafının təmin edilməsi məqsədilə yeni Dövlət Proqramı hazırlanıb və yaxın zamanda qəbul ediləcək.
Prezident çıxışında bəzi statistik göstəricilərə də toxunaraq bildirib ki, kənd təsərrüfatının inkişafı ilə bağlı qarşıya qoyulan hədəflərə çatmaq üçün həm dövlət qurumları, həm də özəl sektor üzərinə düşən məsuliyyəti dərindən dərk etməlidir. Dövlət başçısı xüsusilə özəl sektor nümayəndələrinə mesaj ünvanlayaraq qeyd edib ki, aqrar sahənin inkişafında biznes dairələrinin iştirakı daha da genişlənməlidir. Onun fikrincə, sahibkarlar yalnız şəxsi gəlir əldə etmək məqsədi ilə deyil, həm də ölkənin iqtisadi inkişafına töhfə vermək məsuliyyəti ilə fəaliyyət göstərməlidirlər. Prezident vurğulayıb ki, Azərbaycanda kənd təsərrüfatının potensialı olduqca böyükdür və bu imkanlardan tam istifadə olunması üçün yerli investorların aqrar sektora marağı artırılmalıdır.
Dövlət başçısı bildirib ki, hökumət kənd təsərrüfatının inkişafını stimullaşdırmaq məqsədilə müxtəlif iqtisadi və maliyyə alətlərindən istifadə etməyə davam edəcək. Xüsusilə güzəştli kreditlərin verilməsi, subsidiya mexanizmlərinin təkmilləşdirilməsi, texnika təminatının gücləndirilməsi və fermerlərin maliyyə resurslarına çıxış imkanlarının artırılması əsas istiqamətlərdən biri olacaq. Prezident qeyd edib ki, dövlət tərəfindən yaradılan imkanlar sahibkarların kənd təsərrüfatına daha böyük həcmdə sərmayə qoymasına şərait yaradacaq və bu da nəticə etibarilə məhsuldarlığın artmasına, yeni iş yerlərinin açılmasına və regionların sosial-iqtisadi inkişafına müsbət təsir göstərəcək.
Çıxış zamanı aqrar sahədə mövcud problemlərə də toxunan Prezident bəzi hallarda torpaqlardan səmərəsiz istifadə olunduğunu, müasir texnologiyaların tətbiqinin zəif olduğunu və istehsal zəncirində koordinasiya problemlərinin mövcudluğunu bildirib. O vurğulayıb ki, kənd təsərrüfatında innovativ yanaşmaların tətbiqi, müasir suvarma sistemlərinin qurulması və rəqabətqabiliyyətli məhsul istehsalının artırılması qarşıdakı dövrün əsas prioritetlərindən olacaq. Prezidentin sözlərinə görə, ərzaq təhlükəsizliyinin təmin olunması hər bir dövlət üçün strateji məsələdir və Azərbaycan da bu istiqamətdə öz daxili istehsal imkanlarını genişləndirməlidir.
Prezident İlham Əliyev çıxışının sonunda bildirib ki, kənd təsərrüfatının inkişafı yalnız iqtisadi məsələ deyil, həm də sosial sabitliyin və regionların inkişafının əsas amillərindən biridir. Aqrar sektorun gücləndirilməsi kənd yerlərində məşğulluğun artırılmasına, əhalinin rifah halının yaxşılaşmasına və qeyri-neft sektorunun inkişafına mühüm töhfə verəcək. Dövlət başçısı bütün aidiyyəti qurumları və sahibkarları qarşıya qoyulan vəzifələrin icrasında daha fəal və məsuliyyətli olmağa çağırıb.
Firdovsi Məmmədov – Zərdab rayonu Alıcanlı kənd sakini
