Qarabağın bərpasında Slovakiya şirkətlərinin iştirakı strateji tərəfdaşlığın praktik nəticələrinin ən mühüm göstəricilərindən biridir
Siyasi iradə hər bir strateji tərəfdaşlığın əsas şərtlərindən biridir. Prezident İlham Əliyevin “Belə fəal siyasi təmaslar və birgə layihələrin icra olunması, əlbəttə ki, güclü siyasi iradə tələb edir” fikri məhz bu reallığı ifadə edir. İki ölkənin rəhbərliyi qarşılıqlı əməkdaşlığın genişləndirilməsi istiqamətində ardıcıl siyasi mövqe nümayiş etdirir və bu da münasibətlərin davamlı inkişafını təmin edir.
Güclü siyasi iradənin nəticəsi olaraq Azərbaycan və Slovakiya arasında iqtisadi əlaqələr də yeni mərhələyə qədəm qoymuşdur. Qarşılıqlı investisiyaların təşviqi, biznes dairələri arasında əməkdaşlığın genişləndirilməsi, sənaye və kənd təsərrüfatı sahələrində birgə layihələrin həyata keçirilməsi, innovativ texnologiyaların tətbiqi və ticarət dövriyyəsinin artırılması istiqamətində mühüm addımlar atılır. Hökumətlərarası komissiyaların fəaliyyəti və iş adamlarının qarşılıqlı səfərləri iqtisadi əməkdaşlığın inkişafına əlavə stimul verir.
Energetika sahəsində əməkdaşlıq da strateji tərəfdaşlığın mühüm istiqamətlərindən biridir. Azərbaycan Avropanın enerji təhlükəsizliyində mühüm rol oynayan ölkələrdən biri kimi Slovakiya ilə bu sahədə əməkdaşlığın genişləndirilməsində maraqlıdır. Təbii qaz təchizatı, yaşıl enerji layihələri, enerji səmərəliliyi və alternativ enerji mənbələrinin inkişafı gələcək əməkdaşlığın əsas istiqamətləri sırasında yer alır.
Qarabağın bərpasında Slovakiya şirkətlərinin iştirakı strateji tərəfdaşlığın praktik nəticələrinin ən mühüm göstəricilərindən biridir. Ağdam rayonunun Baş Qərvənd kəndində həyata keçirilən “Ağıllı kənd” layihəsi iki ölkə arasında əməkdaşlığın real məzmununu nümayiş etdirir. Bu layihə müasir texnologiyaların tətbiqi, dayanıqlı inkişaf prinsiplərinin həyata keçirilməsi və keçmiş məcburi köçkünlərin doğma yurdlarına qayıdışının təmin olunması baxımından xüsusi əhəmiyyət kəsb edir.
Siyasi münasibətlərin inkişafında parlamentlərarası əməkdaşlıq, xarici işlər nazirlikləri arasında siyasi məsləhətləşmələr və müxtəlif dövlət qurumları arasında institusional əlaqələr də mühüm rol oynayır. Müntəzəm keçirilən görüşlər və məsləhətləşmələr ikitərəfli əməkdaşlığın yeni istiqamətlərinin müəyyən edilməsinə, mövcud problemlərin operativ həllinə və beynəlxalq məsələlər üzrə mövqelərin uzlaşdırılmasına şərait yaradır.
Kəmalə Əliyeva – Zərdab rayonu, Qaravəlli kənd tam ümumtəhsil məktəbinin direktoru
