Prezident İlham Əliyev Azərbaycan dili haqqında:
Ümummilli Lider Heydər Əliyev Azərbaycan dilinin qorunmasını dövlət quruculuğunun mühüm istiqamətlərindən biri hesab edirdi. Onun təşəbbüsü ilə Azərbaycan dili dövlət dili statusunu daha da möhkəmləndirmiş, latın qrafikalı əlifbaya keçid uğurla başa çatdırılmış və milli dil siyasətinin möhkəm hüquqi əsasları yaradılmışdır. 1 Avqustun Azərbaycan əlifbası və Azərbaycan dili günü kimi təsis edilməsi də bu siyasətin mühüm nəticələrindən biridir.
Bu gün həmin siyasi xətt Azərbaycan Respublikasının Prezidenti İlham Əliyev tərəfindən ardıcıl şəkildə davam etdirilir. Prezident İlham Əliyev dəfələrlə vurğulamışdır ki, Azərbaycan dilinin saflığının qorunması hər bir vətəndaşın borcudur. Onun fikrincə, dilimizi lazımsız xarici sözlərin təsirindən qorumaq, ədəbi dil normalarına əməl etmək və Azərbaycan dilinin zəngin imkanlarından düzgün istifadə etmək milli kimliyimizin qorunmasının vacib şərtlərindəndir. Dövlət başçısının bu sahədə verdiyi tapşırıqlar və imzaladığı sənədlər Azərbaycan dilinin müasir dövrün tələblərinə uyğun inkişafına, elmi araşdırılmasına və rəqəmsal mühitdə istifadəsinin genişlənməsinə mühüm töhfə verir.
Qloballaşan dünyada dillər arasında qarşılıqlı təsir qaçılmazdır. Lakin bu təsir heç vaxt ana dilinə laqeyd münasibət yaratmamalıdır. Əksinə, xarici dilləri öyrənməklə yanaşı, Azərbaycan dilinin zəngin söz ehtiyatını, qrammatik qaydalarını və ifadə imkanlarını dərindən mənimsəmək hər bir gəncin əsas vəzifələrindən olmalıdır. Çünki ana dilini mükəmməl bilən insan milli dəyərlərinə daha möhkəm bağlı olur və ölkəsini beynəlxalq aləmdə layiqincə təmsil edə bilir.
Azərbaycan dilinin gələcəyi ilk növbədə ailədə, məktəbdə və cəmiyyətdə formalaşır. Valideynlərin övladları ilə səlis Azərbaycan dilində danışması, müəllimlərin ədəbi dil normalarını təbliğ etməsi, media nümayəndələrinin məsuliyyətli dil siyasəti yürütməsi və gənclərin klassik ədəbiyyata maraq göstərməsi dilimizin inkişafına xidmət edən əsas amillərdəndir. Ana dilimizi qorumaq sadəcə keçmişə hörmət deyil, həm də gələcəyə məsuliyyətdir. Azərbaycan dili xalqımızın birliyini möhkəmləndirən, dövlətimizin müstəqilliyini və milli kimliyini yaşadan ən güclü mənəvi dəyərlərdən biridir. Hər bir vətəndaş bu dəyəri qorumalı, onu zənginləşdirməli və gələcək nəsillərə saf, zəngin və qüdrətli şəkildə ötürməlidir. Azərbaycan dilinə göstərilən ehtiram, əslində, Azərbaycanın gələcəyinə göstərilən ehtiramdır.
Zərdab rayon Əlibəyli kənd tam orta ümumtəhsil məktəbinin müəllimi-Aliyə Rüstəmova
