Peter Pelleqrininin Azərbaycana növbəti səfəri: siyasi etimadın və münasibətlərin davamlılığının göstəricisi
Azərbaycan ilə Slovakiya arasında münasibətlər son illərdə yüksələn xətt üzrə inkişaf edir. İki ölkə arasında siyasi dialoqun intensivləşməsi, qarşılıqlı səfərlərin artması və müxtəlif sahələrdə əməkdaşlığın genişlənməsi tərəfdaşlığın yeni mərhələyə qədəm qoyduğunu göstərir. Slovakiya Prezidenti Peter Pelleqrininin Azərbaycana səfəri də məhz bu inkişafın növbəti mühüm təzahürüdür. Bu səfərin diqqətçəkən cəhətlərindən biri isə Peter Pelleqrininin Azərbaycana ilk dəfə gəlməməsidir. Onun Azərbaycanla təmasları uzun illərə söykənir və müxtəlif dövlət vəzifələrində həyata keçirdiyi səfərlərlə yadda qalıb. Bu baxımdan demək olar ki, Peter Pelleqrini Slovakiyadan olan yüksəkvəzifəli şəxslər arasında unikal siyasi yol keçmiş dövlət xadimlərindən biridir. O, hələ əvvəlki vəzifələrində Azərbaycana səfər edib, daha sonra isə həm Slovakiya Milli Şurasının sədri, həm də Slovakiyanın Baş naziri kimi ölkəmizdə rəsmi səfərlərdə iştirak edib. Bu ardıcıllıq təsadüfi deyil. Müxtəlif dövlət vəzifələrində Azərbaycanla əlaqələri davam etdirmək Peter Pelleqrininin ölkələrimiz arasında əməkdaşlığa verdiyi önəmin göstəricisi kimi qiymətləndirilə bilər. Eyni zamanda, bu fakt Slovakiyanın Azərbaycana münasibətdə ardıcıl və praqmatik siyasi xətt yürütməsinin də ifadəsidir. Pelleqrininin müxtəlif statuslarda Bakıya səfərləri zamanı ikitərəfli siyasi münasibətlər, iqtisadi əməkdaşlıq, enerji təhlükəsizliyi, nəqliyyat və logistika layihələri, Avropa ilə Cənubi Qafqaz arasında əlaqələrin inkişafı kimi məsələlər müzakirə olunub. Bu mövzular bu gün də Azərbaycan–Slovakiya gündəliyinin əsas istiqamətlərini təşkil edir. Onun bu dəfə artıq Slovakiya Prezidenti kimi Azərbaycana gəlməsi isə münasibətlərin keyfiyyətcə yeni mərhələyə qədəm qoyduğunu göstərir. Prezident səviyyəsində keçirilən görüşlər iki ölkə arasında strateji dialoqun genişlənməsinə, iqtisadi əlaqələrin dərinləşməsinə və regional məsələlər üzrə əməkdaşlığın möhkəmlənməsinə əlavə təkan verir.
Beynəlxalq praktikada eyni siyasətçinin müxtəlif ali dövlət vəzifələrində eyni ölkəyə rəsmi səfərlər etməsi tez-tez rast gəlinən hal deyil. Bu baxımdan Peter Pelleqrininin siyasi fəaliyyəti xüsusi maraq doğurur. Onun əvvəlcə parlament sədri, sonra Baş nazir, indi isə Prezident kimi Azərbaycana səfərləri iki ölkə arasında münasibətlərin davamlı xarakter daşıdığını və qarşılıqlı etimadın illər ərzində formalaşdığını nümayiş etdirir. Azərbaycan və Slovakiya arasında əməkdaşlığın perspektivləri kifayət qədər genişdir. Enerji təhlükəsizliyi, yaşıl enerji, nəqliyyat dəhlizləri, ticarət, sənaye, innovasiya və humanitar əlaqələr gələcək əməkdaşlığın əsas istiqamətlərini təşkil edir. Peter Pelleqrininin Prezident kimi Azərbaycana səfəri də bu istiqamətdə yeni imkanların dəyərləndirilməsi baxımından mühüm siyasi hadisə hesab oluna bilər. Bu səfər uzun illər ərzində formalaşmış siyasi dialoqun məntiqi davamı, qarşılıqlı etimadın göstəricisi və Azərbaycan–Slovakiya münasibətlərinin gələcək inkişafına xidmət edən mühüm addım kimi qiymətləndirilə bilər. Onun müxtəlif ali dövlət vəzifələrində Azərbaycana etdiyi səfərlər isə Slovakiya ilə Azərbaycan arasında münasibətlərin sabitliyini və davamlılığını əks etdirən diqqətəlayiq siyasi nümunələrdən biridir.
Ziya Nağıyev –Zərdab rayon Dəli Quşçu kənd sakini
