Naxçıvanın turizm potensialı çox zəngindir.
Naxçıvan Azərbaycanın ən qədim və gözəl diyarlarından biridir. Bu qədim torpaq zəngin tarixi, mədəniyyəti, təbiəti və müalicəvi imkanları ilə turistlər üçün böyük maraq doğurur. Prezident İlham Əliyevin Naxçıvana səfəri zamanı səsləndirdiyi fikirlərdə də turizmin regionun gələcək inkişafında mühüm istiqamətlərdən biri olduğu vurğulanıb. Naxçıvanın Baş Planının hazırlanması ilə yanaşı, turizm sahəsinin inkişafı da qarşıya qoyulan əsas vəzifələr sırasındadır.
Naxçıvanı turistlər üçün cəlbedici edən ilk növbədə onun təbiətidir. Burada uca dağlar, yaylaqlar, meşələr, mineral bulaqlar və gözəl mənzərələr var. Batabat yaylağı, Duzdağ, Ordubadın füsunkar təbiəti və digər yerlər insanların istirahəti üçün böyük imkanlar yaradır. Regionun təbii sərvətləri ekoturizm, dağ turizmi və istirahət turizminin inkişafı üçün əlverişli şərait yaradır.
Naxçıvanın başqa bir üstünlüyü onun qədim tarixidir. Bu torpaqda min illər ərzində müxtəlif mədəniyyətlər formalaşıb. Möminə Xatın türbəsi, qədim qalalar, məscidlər və digər tarixi abidələr Naxçıvanın keçmişindən xəbər verir. Qədim qalaların və yaşayış məskənlərinin mövcudluğu regionun tarixinin nə qədər dərin olduğunu göstərir. Bu abidələr həm yerli, həm də xarici turistlər üçün maraqlı ünvanlardır. Naxçıvanda sağlamlıq turizmi üçün də böyük imkanlar var. Duzdağın təbii duz mağaraları və mineral suları ilə tanınan müxtəlif bölgələr insanların diqqətini çəkir. Duzdağ artıq istirahət və müalicə məqsədilə tanınan məkanlardan biridir. Regionda sağlamlıq turizminin daha da inkişaf etdirilməsi üçün imkanlar genişdir. Naxçıvanın turizm imkanları yalnız yay mövsümü ilə məhdudlaşmır. Dağlıq ərazilər qış turizminin, yaylaqlar və meşələr isə təbiət və piyada gəzinti turizminin inkişafı üçün əlverişlidir. Kənd turizmi də bölgənin gələcək turizm istiqamətlərindən biri ola bilər. Dövlət Proqramında turizm və rekreasiya zonalarının yaradılması, sağlamlıq, qış, kənd və ekoturizmin inkişafı prioritet istiqamətlər kimi müəyyən edilib. Naxçıvan mətbəxi də turistlər üçün ayrıca maraq mənbəyidir. Burada hazırlanan milli yeməklər, yerli məhsullar, mineral sular və digər nemətlər bölgənin özünəməxsusluğunu göstərir. Turist üçün səfər yalnız tarixi yerləri görmək deyil, həm də həmin bölgənin insanları ilə tanış olmaq, onun mətbəxini dadmaq və həyat tərzini yaxından görməkdir.
Bu gün əsas məsələ Naxçıvanın zəngin turizm imkanlarını daha geniş tanıtmaqdır. Bunun üçün tarixi abidələr, təbiət məkanları, müalicə və istirahət mərkəzləri haqqında məlumatların ölkə daxilində və xaricdə daha çox yayılması vacibdir. Turizm marşrutlarının hazırlanması, xidmət səviyyəsinin yüksəldilməsi və turistlər üçün rahat şəraitin yaradılması da mühüm əhəmiyyət daşıyır. Naxçıvanın hər daşı, hər abidəsi və hər təbii guşəsi özündə bir tarix yaşadır. Bu zənginliyi dünyaya tanıtmaq isə həm Naxçıvanın, həm də bütövlükdə Azərbaycanın turizm imkanlarının daha geniş şəkildə təqdim olunmasına xidmət edəcək.
Zərdab rayon Əlibəyli kənd tam orta ümumtəhsil məktəbinin direktoru-Kəmalə Əliyeva
