Naxçivanin sürətli sosial-iqtisadi inkişafi təmin ediləcək
Naxçıvan Muxtar Respublikasının sosial-iqtisadi inkişafının təmin edilməsi Azərbaycan dövlətinin həyata keçirdiyi regional inkişaf siyasətinin mühüm istiqamətlərindən biridir. Azərbaycan Respublikasının Prezidenti İlham Əliyevin Naxçıvana mütəmadi səfərləri, burada həyata keçirilən layihələrlə yerində tanış olması, yeni sosial və iqtisadi obyektlərin açılışında iştirakı və qarşıya konkret vəzifələr qoyması muxtar respublikanın gələcək inkişafına dövlət səviyyəsində göstərilən diqqətin bariz ifadəsidir. Naxçıvanın müasir inkişaf modelinin əsasını Ümummilli Lider Heydər Əliyevin müəyyən etdiyi dövlətçilik və inkişaf strategiyası, bu siyasətin Prezident İlham Əliyev tərəfindən yeni çağırışlara uyğun şəkildə davam etdirilməsi təşkil edir. Bu siyasətin nəticəsində muxtar respublika mürəkkəb coğrafi və geosiyasi şəraitə baxmayaraq, iqtisadiyyatın müxtəlif sahələrində mühüm nailiyyətlər əldə etmiş, müasir infrastruktur sistemi formalaşdırmış, sosial obyektlərin sayı artırılmış və əhalinin həyat şəraitinin yaxşılaşdırılması istiqamətində genişmiqyaslı layihələr həyata keçirilmişdir. Prezident İlham Əliyevin Naxçıvanla bağlı fikirlərində ən çox diqqət çəkən məqamlardan biri muxtar respublikanın dinamik iqtisadi inkişafıdır. Dövlət başçısı 10 may 2021-ci ildə Naxçıvana səfəri zamanı Azərbaycan Televiziyasına verdiyi müsahibədə bildirmişdir ki, Naxçıvan Muxtar Respublikası son 20 il ərzində iqtisadi artım templərinə görə rekordçu bölgə olmuşdur. Prezidentin təqdim etdiyi rəqəmə görə, həmin dövr ərzində Naxçıvanın ümumi daxili məhsulu 10 dəfədən çox artmışdır. Bu göstərici muxtar respublikada həyata keçirilən iqtisadi siyasətin miqyasını və nəticəliliyini xarakterizə edən mühüm faktlardan biridir. Naxçıvanın sosial-iqtisadi inkişafında enerji təhlükəsizliyinin təmin edilməsi xüsusi əhəmiyyət daşıyır. Prezident İlham Əliyevin qeyd etdiyi kimi, qazlaşdırmanın səviyyəsi 100 faizə, elektrik enerjisi ilə təminat isə 100 faizə çatdırılmışdır. Bundan əlavə, muxtar respublikada böyük enerji potensialı yaradılmış, bərpaolunan enerji mənbələrindən istifadəyə imkan verən layihələr həyata keçirilmişdir. Bu, Naxçıvanın enerji təminatının dayanıqlılığını artırmaqla yanaşı, gələcəkdə enerji istehsalının və ixrac imkanlarının genişləndirilməsi üçün də mühüm zəmin yaradır. Enerji sahəsində əldə edilmiş nəticələr Naxçıvanın əvvəlki vəziyyəti ilə müqayisədə xüsusilə əhəmiyyətlidir. Prezident müsahibəsində qeyd etmişdir ki, vaxtilə Naxçıvanda enerji problemi mövcud idi və Azərbaycandan gələn elektrik xətləri Ermənistan tərəfindən kəsilmişdi. Sonrakı illərdə həyata keçirilən məqsədyönlü tədbirlər nəticəsində muxtar respublika özünü elektrik enerjisi ilə tam təmin edən səviyyəyə yüksəlmişdir. Bu fakt Naxçıvanın sosial-iqtisadi inkişafının yalnız büdcə və infrastruktur investisiyalarından deyil, həm də strateji enerji təhlükəsizliyinin yaradılmasından keçdiyini göstərir. Naxçıvanın iqtisadi inkişafının davamlı xarakter daşıması üçün müasir nəqliyyat infrastrukturunun yaradılması da mühüm şərtdir. Muxtar respublikada şəhərlərarası və rayonlararası yolların yenidən qurulması, yaşayış məntəqələrinin magistral yollarla əlaqələndirilməsi əhalinin rahatlığını artırmaqla yanaşı, iqtisadi fəallığın genişlənməsinə də şərait yaradır. Prezident İlham Əliyev Naxçıvan haqqında müsahibəsində bütün şəhərlərin artıq magistral yollarla bir-birinə bağlandığını, yolların yüksək keyfiyyətlə inşa edildiyini bildirmişdir. Nəqliyyat infrastrukturunun inkişafı Naxçıvanın gələcək iqtisadi perspektivləri baxımından xüsusi əhəmiyyətə malikdir. Çünki muxtar respublikanın coğrafi mövqeyi onu Azərbaycan, Türkiyə və İran arasında mühüm əlaqələndirici məkana çevirir. Nəqliyyat imkanlarının genişləndirilməsi regionun ticarət, logistika, turizm və investisiya potensialının daha səmərəli reallaşdırılmasına imkan verə bilər. Bu baxımdan yolların, hava nəqliyyatı infrastrukturunun və gələcəkdə regional nəqliyyat əlaqələrinin inkişafı Naxçıvanın iqtisadi həyatında mühüm rol oynayacaqdır. Sosial-iqtisadi inkişafın əsas göstəricilərindən biri də əhalinin keyfiyyətli içməli su ilə təminatıdır. Naxçıvanda bu istiqamətdə də genişmiqyaslı layihələr həyata keçirilmişdir. Prezident İlham Əliyevin qeyd etdiyi kimi, içməli su layihələri bütün şəhərləri əhatə etmiş, ayrı-ayrı şəhərlərdə layihələrin davam etdirilməsi nəzərdə tutulmuşdur. 2021-ci ildə Ordubad şəhərində içməli su və kanalizasiya layihəsinin istifadəyə verilməsi də bu siyasətin konkret nəticələrindən biri olmuşdur. İçməli su və kanalizasiya infrastrukturunun inkişafı ilk növbədə insan amilinə yönəlmiş siyasətin göstəricisidir. Müasir sosial dövlət anlayışında iqtisadi inkişaf yalnız istehsal və gəlir göstəriciləri ilə ölçülmür. Əhalinin təmiz suya, keyfiyyətli kommunal xidmətlərə, səhiyyəyə, təhsilə və digər sosial xidmətlərə çıxış imkanlarının genişləndirilməsi inkişafın əsas meyarlarından hesab olunur. Naxçıvanda həyata keçirilən infrastruktur layihələri də bu baxımdan kompleks xarakter daşıyır. Naxçıvanın keçdiyi inkişaf yolu göstərir ki, məqsədyönlü dövlət siyasəti, ardıcıl investisiyalar, müasir idarəçilik və insan amilinə verilən yüksək qiymət nəticəsində mürəkkəb coğrafi şəraitdə yerləşən bir regionu da güclü və rəqabətqabiliyyətli iqtisadi məkana çevirmək mümkündür. Bu baxımdan Naxçıvanın gələcək inkişafı Azərbaycanın ümumi iqtisadi gücünün və regional imkanlarının artırılmasının mühüm tərkib hissəsidir. Beləliklə, Naxçıvanın sürətli sosial-iqtisadi inkişafı artıq başlanmış prosesin yeni mərhələyə yüksəldilməsi deməkdir. Qarşıdakı mərhələdə məqsəd yalnız mövcud nailiyyətləri qorumaq deyil, onları daha da genişləndirmək, yeni iqtisadi artım mənbələri yaratmaq və Naxçıvanı yüksək həyat səviyyəsinə, müasir infrastruktura, güclü istehsal və xidmət sektorlarına malik, innovativ və dayanıqlı inkişaf edən region kimi daha da möhkəmləndirməkdir. Bu isə Azərbaycan dövlətinin Naxçıvanla bağlı uzunmüddətli siyasətinin əsas mahiyyətini təşkil edir.
Zərdab rayon Heydər Əliyev Mərkəzinin əməkdaşı İmanova Xanım
