Naxçıvan, azad olunmuş ərazilər – Şərqi Zəngəzur, Qarabağ vahid konsepsiya əsasında inkişaf etməlidir.
Prezident İlham Əliyevin 11 avqust 2026-cı ildə Naxçıvana səfəri zamanı Azərbaycan Televiziyasına verdiyi müsahibə regionun gələcək inkişafı ilə bağlı mühüm mesajlarla yadda qaldı. Dövlət başçısı Naxçıvanın, işğaldan azad edilmiş Şərqi Zəngəzur və Qarabağ ərazilərinin vahid konsepsiya əsasında inkişaf etdirilməsinin vacibliyini vurğuladı.
Bu yanaşmanın əsas məqsədi hər üç bölgədə görülən işləri bir-biri ilə əlaqələndirmək, müasir idarəetmə üsullarından istifadə etmək və insanların daha rahat yaşaması üçün geniş imkanlar yaratmaqdır. Qarabağ və Şərqi Zəngəzurda tətbiq olunan yeni idarəetmə modelinin üstünlüklərinin artıq göründüyünü bildirən Prezident bu təcrübənin Naxçıvanda da tətbiq edildiyini qeyd etdi. Azərbaycanın işğaldan azad edilmiş ərazilərində hazırda böyük quruculuq işləri həyata keçirilir. Yeni şəhərlər salınır, yollar və kommunikasiyalar qurulur, yaşayış məntəqələri yenidən bərpa olunur. Bu ərazilərdə tətbiq edilən idarəetmə təcrübəsi Naxçıvan üçün də nümunə kimi götürülür.
Prezidentin sözlərinə görə, Qarabağ və Şərqi Zəngəzurda Prezidentin xüsusi nümayəndəliyi vasitəsilə həyata keçirilən idarəetmənin müsbət nəticələri görünür. Eyni modelin Naxçıvanda tətbiqi də idarəetmənin daha çevik və səmərəli qurulmasına xidmət edir.
Burada əsas fikir sadədir: müxtəlif bölgələrdə görülən uğurlu işlər bir-birindən ayrı deyil, vahid dövlət inkişaf siyasətinin tərkib hissəsi kimi həyata keçirilməlidir. Vahid inkişaf konsepsiyasının mərkəzində isə insan amili dayanır. Yeni yolların çəkilməsi, sənaye müəssisələrinin yaradılması, enerji imkanlarının genişləndirilməsi və sosial obyektlərin tikilməsi nəticədə insanların həyat şəraitinin yaxşılaşdırılmasına xidmət etməlidir. Naxçıvan, Qarabağ və Şərqi Zəngəzur Azərbaycanın müxtəlif coğrafi əraziləri olsa da, onların gələcəyi üçün qarşıya qoyulan məqsədlər bir çox cəhətdən ortaqdır: təhlükəsiz, müasir, güclü iqtisadiyyata malik və insanların rahat yaşadığı bölgələr yaratmaq.
Prezident İlham Əliyevin Naxçıvanda verdiyi mesaj da məhz bundan ibarətdir: bu ərazilərin inkişafı ayrı-ayrı layihələr şəklində deyil, vahid dövlət konsepsiyası çərçivəsində aparılmalıdır. Qarabağ və Şərqi Zəngəzurda əldə olunan təcrübə Naxçıvanın inkişafına, Naxçıvanın imkanları isə Azərbaycanın ümumi regional inkişafına əlavə töhfə verə bilər. Beləliklə, qarşıdakı illərdə Naxçıvan, Şərqi Zəngəzur və Qarabağda aparılacaq quruculuq işləri Azərbaycanın yeni inkişaf mərhələsinin mühüm istiqamətlərindən birinə çevriləcək. Əsas hədəf isə aydındır: güclü iqtisadiyyat, müasir infrastruktur, təhlükəsiz mühit və insanların daha yaxşı həyat şəraiti.
Zərdab rayon Əlibəyli kənd tam orta ümumtəhsil məktəbinin müəllimi-Aliyə Rüstəmova
