Müasir dünyada xalqlar və dövlətlər arasında qarşılıqlı hörmətin, anlaşmanın və əməkdaşlığın gücləndirilməsi böyük əhəmiyyət daşıyır
Müxtəlif mədəniyyətlərə və dinlərə mənsub insanların bir-birini anlaması, fərqli düşüncələrə hörmətlə yanaşması dünyada sülhün və sabitliyin qorunmasına mühüm töhfə verir. Təəssüf ki, bu gün dünyanın bir sıra bölgələrində dini və milli zəmində qarşıdurmalar, ayrı-seçkilik və dözümsüzlük halları hələ də mövcuddur. Belə bir şəraitdə mədəniyyətlərarası və dinlərarası dialoqun inkişaf etdirilməsi hər zamankından daha vacibdir.
Azərbaycan bu istiqamətdə özünəməxsus mövqeyi ilə seçilir. Ölkəmiz tarixən müxtəlif xalqların, dinlərin və mədəniyyətlərin birgə yaşadığı məkan olub. Müxtəlif dini inanclara sahib insanların qarşılıqlı hörmət və anlaşma şəraitində yaşaması Azərbaycan cəmiyyətinin əsas xüsusiyyətlərindən biridir. Bu gün də ölkəmizdə milli və dini müxtəlifliyə hörmət, tolerantlıq və multikultural dəyərlərin qorunması dövlət siyasətinin mühüm istiqamətlərindən hesab olunur.
Prezident İlham Əliyev VII Ümumdünya Mədəniyyətlərarası Dialoq Forumunda çıxışı zamanı mədəniyyətlərarası və dinlərarası münasibətlərlə bağlı məsələlərin gündəliyimizin əsas hissəsini tutduğunu bildirib. Bu fikir Azərbaycanın sözügedən sahəyə verdiyi əhəmiyyəti və dünyada qarşılıqlı anlaşmanın gücləndirilməsində fəal iştirak etmək istəyini aydın şəkildə ifadə edir.
Azərbaycanın mədəniyyətlərarası və dinlərarası münasibətlər sahəsində qazandığı təcrübə ölkəmizin tarixi ənənələrinə və cəmiyyətin mənəvi dəyərlərinə əsaslanır. Əsrlər boyu müxtəlif dinlərin və mədəniyyətlərin nümayəndələri Azərbaycan torpağında birgə yaşayıb, ölkənin ictimai və mədəni həyatının formalaşmasında iştirak ediblər. Bu ənənələr bu gün də qorunub saxlanılır.
Ölkəmizdə məscidlər, kilsələr və sinaqoqlar fəaliyyət göstərir. Müxtəlif dini icmalar öz inanclarına uyğun şəkildə dini ayinlərini yerinə yetirə bilirlər. Bu, cəmiyyətdə dini müxtəlifliyə və vicdan azadlığına göstərilən hörmətin mühüm nümunəsidir.
Tolerantlıq yalnız müxtəlif dinlərə mənsub insanların bir yerdə yaşaması demək deyil. Tolerantlıq, eyni zamanda, başqasının düşüncəsinə hörmət etmək, fərqli mədəniyyətləri qəbul etmək, heç kəsi dini və milli mənsubiyyətinə görə ayırmamaqdır. İnsanlar arasında qarşılıqlı hörmətin olması cəmiyyətdə sağlam münasibətlərin qurulmasına və ictimai birliyin möhkəmlənməsinə kömək edir.
Azərbaycanın bu sahədəki təcrübəsi göstərir ki, müxtəliflik cəmiyyət üçün problem deyil, əksinə, düzgün yanaşma olduqda zənginlik və inkişaf mənbəyidir. Fərqli mədəniyyətlərin bir-birini tamamlaması insanların dünyagörüşünü genişləndirir, qarşılıqlı etimadı artırır və cəmiyyətin mənəvi həyatını zənginləşdirir.
Azərbaycanın ev sahibliyi etdiyi Ümumdünya Mədəniyyətlərarası Dialoq Forumu dünyada mədəniyyətlərarası münasibətlərin inkişafına xidmət edən mühüm beynəlxalq tədbirlərdən biridir. Forum müxtəlif ölkələrin nümayəndələrini, siyasətçiləri, alimləri, din xadimlərini və beynəlxalq təşkilatların təmsilçilərini bir araya gətirərək ümumi problemlərin müzakirəsi üçün imkan yaradır.
Belə tədbirlərin əsas məqsədi müxtəlif xalqlar və mədəniyyətlər arasında dialoqu gücləndirmək, qarşılıqlı anlaşmanı artırmaq və mövcud problemlərin həlli yollarını müəyyənləşdirməkdir. İnsanlar bir-birinin mədəniyyətini və dünyagörüşünü daha yaxından tanıdıqca yanlış təsəvvürlərin və əsassız stereotiplərin aradan qaldırılması üçün də şərait yaranır.
Cavid Nuriyev – Zərdab şəhər sakini, fəal gənc
