Müasir dünyada hər bir dövlətin təhlükəsizliyi onun iqtisadi gücü ilə yanaşı, hərbi potensialından da asılıdır
Azərbaycan dövlətinin müstəqilliyinin qorunması, ərazi bütövlüyünün təmin olunması və milli təhlükəsizliyin möhkəmləndirilməsi hər zaman ölkənin əsas prioritetlərindən biri olub. Bu baxımdan Azərbaycan Silahlı Qüvvələrinin gücləndirilməsi və müasir tələblərə uyğun inkişaf etdirilməsi dövlət siyasətinin mühüm istiqamətlərindən birinə çevrilib. Prezident İlham Əliyev hakimiyyətə gəldiyi ilk gündən ordu quruculuğunu ölkənin strateji vəzifəsi kimi müəyyən edib və bu sahənin inkişafını daim diqqət mərkəzində saxlayıb.
Müasir dünyada hər bir dövlətin təhlükəsizliyi onun iqtisadi gücü ilə yanaşı, hərbi potensialından da asılıdır. Azərbaycan mürəkkəb geosiyasi regionda yerləşdiyindən milli təhlükəsizliyin təmin olunması xüsusi əhəmiyyət daşıyır. Prezident İlham Əliyev dəfələrlə çıxışlarında bildirib ki, güclü dövlətin əsas şərtlərindən biri güclü və peşəkar ordunun mövcudluğudur.
Bu məqsədlə son illər ərzində Azərbaycan Silahlı Qüvvələrinin maddi-texniki bazasının möhkəmləndirilməsi, şəxsi heyətin sosial müdafiəsinin gücləndirilməsi, hərbi hissələrin yenidən qurulması və müasir silah-sursatla təmin edilməsi istiqamətində ardıcıl tədbirlər həyata keçirilib.
Prezident İlham Əliyevin rəhbərliyi ilə həyata keçirilən uğurlu iqtisadi siyasət nəticəsində ölkənin maliyyə imkanları genişlənib və bunun mühüm hissəsi müdafiə sahəsinə yönəldilib. Hərbi büdcənin ildən-ilə artırılması Silahlı Qüvvələrin inkişafına böyük təkan verib.
Azərbaycan dünyanın müxtəlif ölkələrindən ən müasir silah və texnikalar əldə edib, eyni zamanda yerli hərbi sənaye kompleksinin inkişafına xüsusi diqqət yetirib. Nəticədə Azərbaycan Ordusu regionun ən güclü ordularından birinə çevrilib.
Tanklar, artilleriya sistemləri, raket kompleksləri, pilotsuz uçuş aparatları, hava hücumundan müdafiə sistemləri və digər müasir hərbi texnikaların alınması ordunun döyüş qabiliyyətini əhəmiyyətli dərəcədə artırıb.
Ordu quruculuğunda mühüm istiqamətlərdən biri də yerli hərbi sənayenin yaradılması olub. Prezident İlham Əliyevin təşəbbüsü ilə ölkədə hərbi sənaye müəssisələri formalaşdırılıb və müxtəlif növ hərbi təyinatlı məhsulların istehsalına başlanılıb.
Bu gün Azərbaycanda müxtəlif silahlar, döyüş sursatları, hərbi avadanlıqlar və xüsusi texnikalar istehsal edilir. Yerli istehsal həm Silahlı Qüvvələrin ehtiyaclarının ödənilməsinə, həm də ölkənin müdafiə sənayesinin inkişafına xidmət edir.
Müasir ordunun əsas gücü yalnız texnika ilə deyil, həm də peşəkar insan resursları ilə ölçülür. Buna görə də Prezident İlham Əliyevin rəhbərliyi dövründə hərbi təhsil sisteminin inkişafına xüsusi önəm verilib.
Hərbi məktəblərin fəaliyyəti genişləndirilib, zabit hazırlığı sistemi təkmilləşdirilib, xarici ölkələrin nüfuzlu hərbi təhsil müəssisələri ilə əməkdaşlıq gücləndirilib. Müasir döyüş təcrübəsinə əsaslanan hazırlıq proqramları tətbiq olunub.
Azərbaycan hərbçilərinin beynəlxalq təlimlərdə iştirakı onların peşəkarlıq səviyyəsinin yüksəlməsinə və müasir döyüş taktikalarının mənimsənilməsinə imkan yaradıb.
Kəmalə Əliyeva – Zərdab rayonu, Qaravəlli kənd ümumtəhsil tam orta məktəbin direktoru
