Mərkəzi Asiya və Azərbaycanın vahid geosiyasi və geoiqtisadi məkan kimi inkişafı
Müasir dövrdə Mərkəzi Asiya və Azərbaycan arasında siyasi, iqtisadi, nəqliyyat və humanitar əlaqələrin sürətlə inkişaf etməsi regionun qlobal proseslərdə rolunun daha da artmasına mühüm zəmin yaradır. Tarixi, mədəni və mənəvi yaxınlığa malik ölkələrin qarşılıqlı əməkdaşlığının genişlənməsi yeni iqtisadi imkanların formalaşmasına və regional inteqrasiyanın dərinləşməsinə xidmət edir.
Azərbaycan Respublikasının Prezidenti İlham Əliyevin qeyd etdiyi kimi, Mərkəzi Asiya və Azərbaycan böyük potensiala, eyni zamanda, bundan daha böyük inkişaf imkanlarına malik vahid geosiyasi və geoiqtisadi region kimi formalaşır. Bu yanaşma regionun mövcud resurslarının, iqtisadi imkanlarının və əlverişli coğrafi mövqeyinin qarşılıqlı əməkdaşlıq çərçivəsində daha səmərəli şəkildə reallaşdırılmasının əhəmiyyətini göstərir.
Azərbaycanın Mərkəzi Asiya dövlətləri ilə münasibətlərinin inkişafı son illərdə xüsusi dinamika qazanmışdır. Ölkəmizin region dövlətləri ilə siyasi dialoqun gücləndirilməsi, qarşılıqlı səfərlərin intensivləşdirilməsi, iqtisadi və investisiya əlaqələrinin genişləndirilməsi istiqamətində atdığı addımlar yeni əməkdaşlıq platformalarının yaranmasına imkan verir. Bu prosesdə Özbəkistan ilə münasibətlər xüsusi əhəmiyyət daşıyır.
Azərbaycan və Özbəkistan arasında strateji tərəfdaşlığın möhkəmləndirilməsi regional əməkdaşlığın inkişafına da mühüm təsir göstərir. İki ölkə arasında ticarət, investisiya, sənaye, kənd təsərrüfatı, energetika, nəqliyyat və logistika sahələrində əməkdaşlığın genişləndirilməsi qarşılıqlı iqtisadi potensialın daha səmərəli istifadəsinə şərait yaradır. Həyata keçirilən birgə layihələr və yeni təşəbbüslər Azərbaycan ilə Özbəkistanın regional inkişaf proseslərində fəal iştirakını təmin edir.
Mərkəzi Asiya ölkələri ilə Azərbaycan arasında nəqliyyat və logistika əlaqələrinin inkişafı xüsusilə mühüm istiqamətlərdən biridir. Azərbaycanın Şərq–Qərb və Şimal–Cənub nəqliyyat dəhlizlərində mühüm mövqeyə malik olması Mərkəzi Asiya dövlətlərinin dünya bazarlarına çıxış imkanlarının genişləndirilməsi baxımından böyük əhəmiyyət daşıyır. Xəzər dənizi üzərindən həyata keçirilən daşımaların inkişafı, liman və dəmir yolu infrastrukturunun təkmilləşdirilməsi regionun tranzit potensialının artırılmasına xidmət edir.Bu baxımdan Azərbaycan–Özbəkistan əməkdaşlığı xüsusi əhəmiyyət kəsb edir. İki ölkə arasında möhkəmlənən münasibətlər yalnız ikitərəfli əlaqələrin inkişafına deyil, bütövlükdə Mərkəzi Asiya ilə Cənubi Qafqaz arasında əməkdaşlığın dərinləşməsinə də mühüm töhfə verir. Azərbaycan və Özbəkistanın qarşılıqlı fəaliyyətinin genişlənməsi regionda yeni iqtisadi və geosiyasi reallıqların formalaşmasına müsbət təsir göstərir.
Mərkəzi Asiya və Azərbaycanın getdikcə daha sıx inteqrasiya olunan vahid geosiyasi və geoiqtisadi məkan kimi formalaşması regional sabitlik və davamlı inkişaf baxımından böyük əhəmiyyət daşıyır. Bu regionun ümumi müsbət inkişaf dinamikası Azərbaycan və Özbəkistan arasında mövcud olan sıx qarşılıqlı əlaqələrdən də əhəmiyyətli dərəcədə asılıdır.
Qarşılıqlı etimada, dostluğa və strateji tərəfdaşlığa əsaslanan Azərbaycan–Özbəkistan münasibətləri gələcəkdə də regional əməkdaşlığın əsas dayaqlarından biri olacaqdır. İki qardaş ölkənin birgə səyləri Mərkəzi Asiya və Azərbaycanın potensialının daha geniş şəkildə reallaşdırılmasına, regionun iqtisadi və geosiyasi əhəmiyyətinin artmasına, eləcə də sülh, sabitlik və davamlı inkişafın möhkəmlənməsinə mühüm töhfə verəcəkdir.
Fuad Eyvazov – Məmmədqasımlı kənd sakini, sahibkar
