Mərkəzi Asiya ilə əməkdaşlıq yeni iqtisadi imkanlar yaradır
Azərbaycanın Mərkəzi Asiya ölkələri ilə münasibətləri son illərdə yeni məzmun və dinamika qazanaraq strateji tərəfdaşlığın mühüm istiqamətlərindən birinə çevrilib. Siyasi dialoqun intensivləşməsi, qarşılıqlı səfərlərin artması, iqtisadi-ticari əlaqələrin genişlənməsi və birgə layihələrin həyata keçirilməsi bu əməkdaşlığın artıq yalnız ikitərəfli münasibətlər çərçivəsində deyil, daha geniş regional müstəvidə inkişaf etdiyini göstərir.
Prezident İlham Əliyevin oktyabrın 8-də Türkmənistanın Türkmənbaşı şəhərində Azərbaycan və Mərkəzi Asiya Dövlət Başçılarının 8-ci Məşvərət görüşündə çıxışı da bu prosesin əsas istiqamətlərini aydın şəkildə ortaya qoydu. Dövlət başçısı qeyd etdi ki, Azərbaycanın Mərkəzi Asiya ölkələri ilə qarşılıqlı fəaliyyəti xeyli genişlənib. Ötən il ticarət dövriyyəsinin 50 faizdən çox artması iqtisadi əlaqələrin sürətlə inkişaf etdiyini göstərən mühüm göstəricidir. Eyni zamanda, Azərbaycanda Mərkəzi Asiya ölkələrinin kapitalı ilə 400-dən çox şirkətin fəaliyyət göstərməsi qarşılıqlı iqtisadi maraqların real nəticələrə çevrildiyini nümayiş etdirir.
Bu göstəricilər təsadüfi deyil. Azərbaycan ilə Mərkəzi Asiya dövlətləri arasında münasibətlər son illərdə ardıcıl və məqsədyönlü siyasət nəticəsində yeni mərhələyə yüksəlib. Qarşılıqlı investisiyaların artırılması, sahibkarlıq əlaqələrinin genişləndirilməsi və yeni iqtisadi layihələrin reallaşdırılması üçün əlverişli mühit formalaşıb. Azərbaycan Qazaxıstan, Özbəkistan və Qırğızıstanla birgə investisiya fondları yaradıb və bu fondların hər birinin kapitalı yüz milyonlarla dollar təşkil edir.
Prezident İlham Əliyevin çıxışında diqqət çəkən əsas məqamlardan biri də əməkdaşlığın yalnız ticarət dövriyyəsinin artırılması ilə məhdudlaşdırılmaması fikridir. Müasir mərhələdə məqsəd qarşılıqlı investisiyaların artırılması, yeni istehsal müəssisələrinin yaradılması, sənaye kooperasiyasının genişləndirilməsi və Azərbaycanla Mərkəzi Asiya ölkələrinin birgə məhsullarının xarici bazarlara çıxarılmasıdır. Bu yanaşma əməkdaşlığın daha dayanıqlı və uzunmüddətli iqtisadi əsaslar üzərində qurulmasına imkan verir.
Digər tərəfdən, Azərbaycan və Mərkəzi Asiya ölkələrinin iqtisadi potensiallarının bir-birini tamamlaması əməkdaşlığın perspektivlərini daha da genişləndirir. Enerji, nəqliyyat, logistika, sənaye, kənd təsərrüfatı, rəqəmsal texnologiyalar və digər sahələrdə birgə layihələrin həyata keçirilməsi region ölkələrinin iqtisadi inkişafına mühüm töhfə verə bilər.
Oktyabrın 8-də Türkmənbaşıda keçirilən 8-ci Məşvərət görüşünün nəticəsində mühüm sənədlərin imzalanması da əməkdaşlığın institusional əsaslarının möhkəmləndiyini göstərir. Azərbaycan və Mərkəzi Asiya Dövlət Başçıları Birgə Bəyanat və Məşvərət görüşünün tənzimləyici sənədləri haqqında Qərar imzalayıblar.
Bütün bunlar göstərir ki, Azərbaycan-Mərkəzi Asiya münasibətləri artıq ənənəvi diplomatik əlaqələrdən daha geniş məzmun daşıyır. Qarşılıqlı etimad siyasi münasibətləri möhkəmləndirir, iqtisadi maraqlar isə bu əlaqələrə davamlılıq qazandırır. Azərbaycanın bu platformada fəal iştirakı həm ölkəmizin regional iqtisadi proseslərdə rolunu artırır, həm də Mərkəzi Asiya ilə Avropa arasında yeni əməkdaşlıq imkanlarının yaranmasına şərait yaradır.
Prezident İlham Əliyevin Türkmənbaşı görüşündə səsləndirdiyi fikirlər Azərbaycanın Mərkəzi Asiya siyasətinin əsas hədəflərindən birini – qarşılıqlı ticarətdən daha dərin iqtisadi tərəfdaşlığa keçidi ifadə edir. 400-dən çox şirkətin fəaliyyəti, artan ticarət dövriyyəsi və yüz milyonlarla dollarlıq birgə investisiya fondları bu münasibətlərin artıq konkret iqtisadi nəticələr üzərində inkişaf etdiyini göstərir. Qarşıdakı dövrdə əsas məsələ bu potensialdan daha səmərəli istifadə etməklə birgə istehsalın, investisiyaların və regional layihələrin miqyasını genişləndirmək olacaq.
Etibar Talıbov – Zərdab rayonu Alıcanlı kənd sakini
