Mədəniyyətlərarası Dialoq Forumu yalnız fikir mübadiləsi aparılan tədbir deyil, həm də daha təhlükəsiz dünyanın qurulmasına xidmət edən mühüm təşəbbüsdür
Mədəniyyətlərarası dialoq müxtəlif xalqların, dinlərin və mədəniyyətlərin nümayəndələrinin bir-birini daha yaxşı anlaması, fərqliliklərə hörmətlə yanaşması və ortaq dəyərlər ətrafında birləşməsi deməkdir. Bu, sadəcə müxtəlif ölkələrin nümayəndələrinin bir yerdə görüşməsi deyil. Əsas məsələ insanların bir-birinin fikirlərini dinləməsi, fərqli baxışları qəbul etməyi öyrənməsi və problemləri qarşılıqlı anlaşma yolu ilə həll etməsidir.
Dünyada hər bir xalqın özünəməxsus adət-ənənələri, dili, dini inancları və həyat tərzi var. Bu fərqliliklər bəşəriyyətin zənginliyidir. Lakin insanlar bir-birini tanımadıqda, fərqli mədəniyyətlər haqqında yanlış təsəvvürlərə malik olduqda anlaşılmazlıqlar yarana bilər. Bəzən bu anlaşılmazlıqlar ayrı-seçkiliyə, düşmənçiliyə və hətta münaqişələrə gətirib çıxarır.
Dialoq isə bu cür problemlərin qarşısının alınmasına kömək edir. İnsanlar bir-birinin mədəniyyətini və dünyagörüşünü tanıdıqca ortaq cəhətləri daha yaxşı görür, fərqliliklərə daha anlayışla yanaşırlar. Bu baxımdan Ümumdünya Mədəniyyətlərarası Dialoq Forumu yalnız fikir mübadiləsi aparılan tədbir deyil, həm də daha dinc və təhlükəsiz dünyanın qurulmasına xidmət edən mühüm təşəbbüsdür.
Forumda müzakirə olunan məsələlər müxtəlif ölkələrdə yaşayan insanların gündəlik həyatına da təsir göstərir. Çünki sülh, təhlükəsizlik, təhsil, insan hüquqları, dini dözümlülük və ayrı-seçkiliyə qarşı mübarizə bütün cəmiyyətlər üçün aktual məsələlərdir. Bu problemlərin həlli isə dövlətlərin və beynəlxalq təşkilatların səyləri ilə yanaşı, insanların öz aralarında qarşılıqlı hörmət və anlaşma yaratmasından da asılıdır. Forumun əhəmiyyətini artıran əsas xüsusiyyətlərdən biri onun inklüziv xarakter daşımasıdır. İnklüzivlik müxtəlif fikir və baxışlara malik insanların dialoq prosesində iştirak etməsi, öz mövqelərini ifadə edə bilməsi və müzakirələrdə nəzərə alınması deməkdir.
Mədəniyyətlərarası dialoq yalnız müəyyən ölkələrin və ya ayrı-ayrı qrupların iştirakı ilə məhdudlaşmamalıdır. Bu prosesdə müxtəlif dinlərin, millətlərin, yaş qruplarının və sosial təbəqələrin nümayəndələrinin iştirakı vacibdir. Çünki dünyada mövcud problemlərə dair fərqli baxışların dinlənilməsi daha düzgün nəticələrin əldə olunmasına imkan verir.
Ümumdünya Mədəniyyətlərarası Dialoq Forumu bu baxımdan geniş iştirakçılıq üçün imkan yaradır. Burada dövlət nümayəndələri ilə yanaşı, alimlər, müəllimlər, jurnalistlər, gənclər, qeyri-hökumət təşkilatlarının təmsilçiləri və digər iştirakçılar öz fikirlərini bölüşə bilirlər. Bu cür yanaşma mədəniyyətlərarası münasibətlərin yalnız siyasi səviyyədə deyil, cəmiyyətin müxtəlif təbəqələri arasında da inkişafına kömək edir. İnklüzivliyin digər mühüm tərəfi odur ki, heç bir xalqın və ya mədəniyyətin digərindən üstün tutulmaması, hər birinin özünəməxsusluğuna hörmətlə yanaşılması təşviq olunur. İnsanların dili, dini və milli mənsubiyyəti fərqli olsa da, onların sülh şəraitində yaşamaq, təhlükəsiz gələcək qurmaq və öz mədəniyyətlərini qorumaq istəyi ortaqdır.Bu baxımdan Forumun əsas mesajı sadədir: fərqli olmaq ayrılmaq üçün səbəb deyil. Əksinə, fərqliliklər qarşılıqlı öyrənmə, inkişaf və əməkdaşlıq üçün imkan yaradır.
Fərid Qurbanov – Zərdab rayonu, Təzəkənd kənd sakini, fəal gənc
