Kənd Təsərrüfatının İnkişafı Dövlət Siyasətinin Prioritetidir
Azərbaycanda kənd təsərrüfatının inkişafı daim dövlət siyasətinin əsas istiqamətlərindən biri olmuşdur. Bu sahəyə göstərilən diqqət ölkənin ərzaq təhlükəsizliyinin təmin olunması, regionların sosial-iqtisadi inkişafı, məşğulluğun artırılması və kənd əhalisinin rifahının yüksəldilməsi baxımından xüsusi əhəmiyyət daşıyır. Dövlət tərəfindən həyata keçirilən məqsədyönlü proqramlar nəticəsində kənd təsərrüfatında mühüm nailiyyətlər əldə edilmişdir.
Hələ ilk dəfə prezident vəzifəsinə seçildikdən sonra dövlət başçısı tərəfindən irəli sürülən əsas təşəbbüslərdən biri regionların sosial-iqtisadi inkişaf proqramı olmuşdur. 2004-cü ilin əvvəlində qəbul edilən ilk beşillik proqram ölkənin müxtəlif bölgələrində infrastrukturun yenilənməsinə, kənd təsərrüfatının inkişafına və yeni iş yerlərinin açılmasına böyük töhfə verdi. Bu proqram çərçivəsində yollar çəkildi, su və enerji təminatı yaxşılaşdırıldı, fermerlərə dövlət dəstəyi artırıldı. İlk proqramın uğurlu nəticələri göstərdi ki, regionların inkişafı davamlı xarakter daşımalıdır. Buna görə də sonrakı illərdə bir neçə beşillik regional inkişaf proqramı qəbul edildi və həyata keçirildi. Bu proqramlar kənd təsərrüfatında müasir texnologiyaların tətbiqinə, aqrar sahədə sahibkarlığın genişlənməsinə, məhsuldarlığın artırılmasına və ixrac imkanlarının genişləndirilməsinə şərait yaratdı.
Dövlət tərəfindən fermerlərə subsidiyaların verilməsi, güzəştli kreditlərin ayrılması və texnika təminatının yaxşılaşdırılması kənd təsərrüfatının inkişafını daha da sürətləndirdi. Eyni zamanda aqroparkların yaradılması, meliorasiya və suvarma sistemlərinin yenilənməsi kənd təsərrüfatı məhsullarının keyfiyyətinin və istehsal həcminin artmasına səbəb oldu. Bu gün Azərbaycan kənd təsərrüfatı sahəsində mühüm uğurlar əldə etmiş ölkələrdən biri hesab olunur. Aqrar sahənin inkişafı yalnız iqtisadi göstəricilərin yüksəlməsinə deyil, həm də kənd yerlərində yaşayan insanların sosial rifahının yaxşılaşmasına xidmət edir. Gələcəkdə də bu sahəyə göstərilən diqqət və dövlət dəstəyi kənd təsərrüfatının daha da inkişaf etməsinə, ölkənin iqtisadi gücünün artmasına mühüm töhfə verəcəkdir.
Şamil Babayev -Zərdab Gənclər evi, Dərnək rəhbəri
