İstiqlal Bəyannaməsi xalqımızın müstəqillik hisslərini daha da gücləndirdi.
1918-ci il mayın 28-də Azərbaycan tarixində ən mühüm hadisələrdən biri baş verdi. Həmin gün Azərbaycan Xalq Cümhuriyyəti yaradıldı və İstiqlal Bəyannaməsi qəbul edildi. Bu sənəd xalqımızın azadlıq və müstəqillik arzularını bütün dünyaya bəyan etdi. Azərbaycan Şərqdə və müsəlman dünyasında ilk demokratik dövlət kimi tarixə düşdü.
İstiqlal Bəyannaməsində Azərbaycanın müstəqil dövlət olduğu elan edilirdi. Sənəddə bütün vətəndaşların hüquq bərabərliyi, azad yaşamaq hüququ və demokratik idarəetmə prinsipləri öz əksini tapmışdı. Bu, xalqın dövlətinə olan inamını artırdı və müstəqillik hisslərini daha da gücləndirdi.
Azərbaycan Xalq Cümhuriyyəti qısa müddətdə bir çox mühüm işlər gördü. Parlament yaradıldı, dövlət bayrağı qəbul edildi, milli ordu quruldu və təhsil sahəsində yeniliklər həyata keçirildi. Ana dili dövlət dili elan edildi. Bütün bunlar xalqın milli ruhunun yüksəlməsinə səbəb oldu. Cümhuriyyət dövründə qadınlara da seçki hüququ verildi. Bu addım Azərbaycanın nə qədər müasir və demokratik dövlət olduğunu göstərirdi. Həmin dövrdə müxtəlif millətlərin nümayəndələri parlamentdə təmsil olunurdu və ölkədə bərabərlik prinsipi qorunurdu.
Azərbaycan Xalq Cümhuriyyətinin qurucuları xalqın azad və xoşbəxt gələcəyi üçün böyük fədakarlıq göstərmişlər. Məmməd Əmin Rəsulzadə və digər görkəmli şəxsiyyətlər müstəqil dövlət qurmaqla xalqımızın tarixində silinməz iz qoymuşlar. Bu gün Azərbaycan Respublikası həmin Cümhuriyyətin davamçısıdır. İstiqlal Bəyannaməsi isə xalqımızın azadlıq mübarizəsinin ən dəyərli sənədlərindən biri kimi böyük hörmətlə yad edilir. 28 May – Müstəqillik Günü hər il ölkəmizdə qürur hissi ilə qeyd olunur.
Zərdab rayon Əlibəyli kənd tam orta ümumtəhsil məktəbinin direktoru-Kəmalə Əliyeva
