“İkinci Qarabağ müharibəsindən keçən dövr ərzində öz hərbi gücümüzü böyük dərəcədə artırmışıq. Ordumuzun döyüş qabiliyyəti artır, texnika ilə təchizat lazımi səviyyədə təmin edilir və təmin ediləcəkdir”. Bu fikir Azərbaycan Respublikasının Prezidenti, Silahlı Qüvvələrin Ali Baş Komandanı cənab İlham Əliyevin rəhbərliyi ilə həyata keçirilən uğurlu ordu quruculuğu siyasətinin mahiyyətini və gələcək inkişaf istiqamətlərini aydın şəkildə ifadə edir.
2020-ci ildə 44 günlük Vətən müharibəsində əldə edilən tarixi Qələbə Azərbaycan Ordusunun yüksək döyüş qabiliyyətini və peşəkarlığını bütün dünyaya nümayiş etdirdi. Lakin müharibədən sonrakı dövrdə də ölkəmizdə müdafiə potensialının gücləndirilməsi prioritet istiqamət olaraq müəyyənləşdirildi. Müasir təhlükəsizlik mühitinin yaratdığı çağırışlar nəzərə alınaraq Silahlı Qüvvələrdə genişmiqyaslı islahatlar həyata keçirilməyə başlandı. İkinci Qarabağ müharibəsindən sonra ordunun strukturunun daha da təkmilləşdirilməsi, yeni hərbi hissələrin yaradılması və döyüş hazırlığının artırılması istiqamətində mühüm addımlar atılmışdır. Xüsusilə komando birliklərinin formalaşdırılması, xüsusi təyinatlı qüvvələrin imkanlarının genişləndirilməsi və müasir döyüş taktikasının tətbiqi ordunun çevikliyini və effektivliyini əhəmiyyətli dərəcədə artırmışdır.
Müasir müharibələrin xarakteri sürətlə dəyişdiyi üçün texnoloji üstünlük hərbi uğurun əsas şərtlərindən birinə çevrilmişdir. Bu baxımdan Azərbaycan Ordusunun ən müasir silah və hərbi texnika ilə təchiz olunması istiqamətində ardıcıl tədbirlər görülür. Pilotsuz uçuş aparatları, yüksək dəqiqlikli silah sistemləri, müasir rabitə və elektron idarəetmə vasitələri ordunun arsenalını gücləndirərək onun əməliyyat imkanlarını daha da genişləndirir. Ordunun güclənməsində insan amili xüsusi əhəmiyyət daşıyır. Bu səbəbdən hərbi qulluqçuların peşə hazırlığının artırılması, xarici ölkələrin qabaqcıl hərbi təcrübələrinin öyrənilməsi və beynəlxalq standartlara uyğun təlim proqramlarının tətbiqi diqqət mərkəzində saxlanılır. Keçirilən genişmiqyaslı təlimlər şəxsi heyətin bilik və bacarıqlarının inkişafına, döyüş hazırlığının yüksəldilməsinə və real əməliyyat şəraitində fəaliyyət qabiliyyətinin artırılmasına xidmət edir. Müharibədən sonrakı dövrdə azad edilmiş ərazilərdə yeni hərbi infrastrukturun yaradılması da müdafiə qabiliyyətinin möhkəmləndirilməsində mühüm rol oynayır. Müasir standartlara cavab verən hərbi şəhərciklər, xidmət və yaşayış binaları, döyüş mövqeləri və təminat sistemləri Silahlı Qüvvələrin fəaliyyət imkanlarını daha da genişləndirir.
Azərbaycan Ordusunun inkişafı yalnız bugünkü təhlükəsizliyin deyil, həm də gələcək nəsillərin təhlükəsiz və sabit şəraitdə yaşamasının təminatıdır. Dövlət tərəfindən ordu quruculuğuna göstərilən diqqət və qayğı nəticəsində Silahlı Qüvvələrimizin döyüş qabiliyyəti ildən-ilə artır, texniki təminatı güclənir və müdafiə potensialı daha da möhkəmlənir. Bu gün Azərbaycan Ordusu regionun ən güclü silahlı qüvvələrindən biri olmaqla yanaşı, ölkəmizin müstəqilliyinin, suverenliyinin və ərazi bütövlüyünün etibarlı təminatçısıdır. Həyata keçirilən məqsədyönlü siyasət və davamlı inkişaf strategiyası nəticəsində ordumuz gələcəkdə də öz gücünü artıracaq, dövlətimizin təhlükəsizliyinin keşiyində inamla dayanacaqdır.
Etibar Talıbov – Zərdab rayonu Alıcanlı kənd sakini
