Heydər Əliyev amili və Yeni Azərbaycan Partiyasının yaranmasını zəruri edən tarixi şərait
Azərbaycanın yaxın tarixində elə dövrlər olmuşdur ki, ölkənin taleyi ciddi sınaqlarla üz-üzə qalmışdır. Xüsusilə XX əsrin 80-ci illərinin sonu və 90-cı illərin əvvəlləri Azərbaycan üçün ağır və mürəkkəb mərhələ kimi yadda qalıb. Həmin dövrdə ölkədə siyasi rəhbərliyin zəifliyi, idarəetmədə yaranmış boşluqlar və milli maraqların lazımi səviyyədə müdafiə olunmaması Ermənistanın Azərbaycana qarşı ərazi iddialarının genişlənməsinə şərait yaratmışdı.
Ulu Öndər Heydər Əliyevin Azərbaycana rəhbərlik etdiyi dövr ölkəmizin tarixində sabitlik və inkişaf mərhələsi kimi xarakterizə olunur. Onun güclü idarəçilik təcrübəsi, dövlətçilik düşüncəsi və xalqla sıx bağlılığı Azərbaycanın qarşısında duran problemlərin həllində mühüm rol oynayırdı. Bu baxımdan, sonrakı illərdə ölkədə baş verən hadisələrə nəzər saldıqda Heydər Əliyevin siyasi iradəsinin və dövlətçilik mövqeyinin əhəmiyyəti daha aydın görünür.
1980-ci illərin sonlarından etibarən Azərbaycanda vəziyyət getdikcə ağırlaşmağa başladı. Ermənistanın Azərbaycana qarşı ərazi iddiaları gücləndi, Qarabağda separatizm meyilləri genişləndi. Ölkə rəhbərliyinin hadisələrə vaxtında və qətiyyətli reaksiya verə bilməməsi vəziyyəti daha da mürəkkəbləşdirdi. Nəticədə Azərbaycan həm siyasi, həm də hərbi baxımdan ciddi çətinliklərlə üzləşdi.
Müstəqilliyin ilk illərində də ölkədə vəziyyət sabit deyildi. Bir-birini əvəz edən hakimiyyətlər dövlət idarəçiliyində ciddi problemlərlə qarşılaşır, ölkənin təhlükəsizliyini və ərazi bütövlüyünü lazımi səviyyədə təmin edə bilmirdilər. Bu dövrdə Azərbaycan torpaqları ardıcıl olaraq işğal edildi, yüz minlərlə insan doğma yurdlarından didərgin düşdü. Ölkə daxilində siyasi qarşıdurma və hakimiyyət uğrunda mübarizə isə mövcud problemlərin daha da dərinləşməsinə səbəb oldu.
Belə bir şəraitdə Azərbaycan cəmiyyətində güclü dövlət idarəçiliyinə, siyasi sabitliyə və milli maraqları müdafiə edə biləcək liderə böyük ehtiyac yaranmışdı. Məhz belə bir tarixi mərhələdə xalqın böyük hissəsi Heydər Əliyevin siyasi təcrübəsinə və liderlik qabiliyyətinə ümid bəsləyirdi.
Yeni Azərbaycan Partiyasının 1992-ci ildə yaradılması da həmin ictimai-siyasi şəraitin nəticəsi idi. Partiyanın təsisçiləri və tərəfdarları ölkənin düşdüyü ağır vəziyyətdən çıxarılması, dövlətçiliyin qorunması və siyasi sabitliyin təmin olunması məqsədilə Ulu Öndər Heydər Əliyevin ətrafında birləşdilər. Bu baxımdan Yeni Azərbaycan Partiyasının yaranması yalnız siyasi təşkilatın yaradılması deyil, həm də cəmiyyətin sabit və güclü dövlətçilik istəyinin ifadəsi idi.
Tarixdən nəticə çıxarmaq hər bir cəmiyyət üçün vacibdir. Keçmişdə baş vermiş hadisələr unudulmamalı, xüsusilə dövlət idarəçiliyində yol verilmiş səhvlər gələcək nəsillərə düzgün çatdırılmalıdır. Çünki xalq öz tarixini bilməklə dövlət müstəqilliyinin və milli birliyin əhəmiyyətini daha yaxşı anlayır.
Bu gün Azərbaycan güclü, müstəqil və öz milli maraqlarını qətiyyətlə müdafiə edən dövlətdir. Ölkəmizin əldə etdiyi uğurların əsasında dövlətçilik ənənələrinin möhkəmləndirilməsi, siyasi sabitlik və xalqın milli birliyi dayanır. Yeni Azərbaycan Partiyasının yaranması da Azərbaycanın mürəkkəb tarixi mərhələdən çıxaraq sabit inkişaf yoluna qədəm qoymasında mühüm siyasi hadisələrdən biri olmuşdur.
Bu səbəbdən həmin dövrün hadisələri gənc nəsil tərəfindən öyrənilməli və düzgün qiymətləndirilməlidir. Çünki Azərbaycanın bugünkü gücü və əldə etdiyi tarixi Zəfərlər yalnız bu günün deyil, uzun illər ərzində formalaşmış dövlətçilik siyasətinin nəticəsidir.
Fuad Eyvazov – Məmmədqasımlı kənd sakini, sahibkar
