Enerji təhlükəsizliyi milli təhlükəsizliyin əsas amillərindəndir
Azərbaycan Prezidenti İlham Əliyev Avropa Komissiyasının Prezidenti Ursula Fon der Lyayenin 2026-cı il iyulun 1-də Azərbaycana səfəri çərçivəsində verdiyi bəyanatda ölkənin enerji və nəqliyyat sahəsində həyata keçirdiyi strateji layihələrin əhəmiyyətini vurğulayıb. Dövlət başçısı bildirib ki, müasir dövrdə enerji təhlükəsizliyi hər bir ölkənin milli təhlükəsizliyinin ayrılmaz tərkib hissəsinə çevrilib və bu istiqamətdə etibarlı tərəfdaşlıq beynəlxalq əməkdaşlığın əsas prioritetlərindən biridir.
Prezident qeyd edib ki, Azərbaycan uzun illər ərzində enerji resurslarının dünya bazarlarına təhlükəsiz və dayanıqlı şəkildə çatdırılması üçün mühüm siyasi və diplomatik səylər göstərib. Bununla yanaşı, ölkə neft və təbii qazın ixracını təmin edən genişmiqyaslı infrastrukturun yaradılmasına böyük maliyyə vəsaitləri yatırıb. Onun sözlərinə görə, Cənub Qaz Dəhlizi bu uğurlu əməkdaşlığın ən parlaq nümunələrindən biridir. Hazırda 3500 kilometrlik vahid boru kəməri sistemi Azərbaycanın təbii qazını Avropa bazarına çatdıran əsas enerji arteriyası kimi fəaliyyət göstərir və qitənin enerji təhlükəsizliyinə mühüm töhfə verir.
Dövlət başçısı çıxışında nəqliyyat və logistika sahəsində əməkdaşlığın da xüsusi əhəmiyyət daşıdığını diqqətə çatdırıb. O bildirib ki, Azərbaycan regionda həyata keçirilən iri nəqliyyat layihələrinin təşəbbüskarlarından və fəal iştirakçılarından biridir. Şərq–Qərb və Şimal–Cənub beynəlxalq nəqliyyat dəhlizlərinin ölkə ərazisindən keçməsi Azərbaycanın geostrateji mövqeyini daha da gücləndirir. Prezident vurğulayıb ki, qonşu dövlətlərlə və daha geniş region ölkələri ilə qurulan qarşılıqlı etimada əsaslanan münasibətlər bütün tərəflər üçün faydalı olan əməkdaşlıq mühitinin formalaşmasına şərait yaradıb.
İlham Əliyev bildirib ki, son illərdə Azərbaycandan keçən tranzit yüklərin həcmi bütün istiqamətlər üzrə davamlı şəkildə artır. Bu dinamika ölkədə və regionda nəqliyyat infrastrukturunun daha da inkişaf etdirilməsini zəruri edir. Onun sözlərinə görə, Azərbaycan dəmir yollarının, dəniz limanlarının və digər logistika obyektlərinin modernləşdirilməsinə böyük investisiyalar yatırıb və bu proses davam etdirilir. Yeni geosiyasi reallıqlar fonunda isə ticarət marşrutlarına artan tələbat dəniz limanlarının və dəmir yolu şəbəkəsinin imkanlarının genişləndirilməsini daha da aktuallaşdırır.
Prezident vurğulayıb ki, bütün bu layihələr ölkənin təsdiq edilmiş inkişaf planına və maliyyə imkanlarına uyğun şəkildə mərhələli şəkildə həyata keçirilir. Onun sözlərinə görə, enerji və nəqliyyat sahələrində həyata keçirilən strateji təşəbbüslər Azərbaycanın beynəlxalq tərəfdaş kimi etibarlılığını möhkəmləndirməklə yanaşı, regional iqtisadi əməkdaşlığın genişlənməsinə və Avrasiyada dayanıqlı əlaqələrin inkişafına da mühüm töhfə verir.
Etibar Talıbov – Zərdab rayonu Alıcanlı kənd sakini
