Energetika sahəsi əməkdaşlığımızda xüsusi yer tutur
Energetika Azərbaycan ilə Mərkəzi Asiya dövlətləri arasında strateji əməkdaşlığın əsas istiqamətlərindən biridir. Ölkələrimizin malik olduğu zəngin enerji resursları, əlverişli coğrafi mövqeyi və formalaşmış infrastruktur imkanları enerji sahəsində qarşılıqlı faydalı tərəfdaşlığın genişləndirilməsi üçün mühüm zəmin yaradır. Son illərdə bu istiqamətdə həyata keçirilən layihələr Azərbaycan ilə Mərkəzi Asiya arasında enerji əlaqələrinin yalnız ikitərəfli çərçivədə deyil, daha geniş regional və beynəlxalq müstəvidə inkişaf etdiyini göstərir. Azərbaycanın enerji sektorunda formalaşdırdığı infrastruktur və nəqliyyat imkanları Mərkəzi Asiya ölkələrinin enerji resurslarının beynəlxalq bazarlara çıxarılması üçün əlavə imkanlar yaradır. Xəzər dənizi bu baxımdan mühüm bağlantı məkanı kimi çıxış edir. Mərkəzi Asiyanın enerji ehtiyatlarının Azərbaycan üzərindən dünya bazarlarına nəql olunması regionun enerji potensialının daha səmərəli reallaşdırılmasına və ixrac marşrutlarının şaxələndirilməsinə xidmət edir.
Azərbaycanın enerji siyasəti yalnız ənənəvi enerji resurslarının nəqli və ixracı ilə məhdudlaşmır. Qlobal enerji gündəliyində baş verən dəyişikliklər, bərpaolunan enerji mənbələrinin rolunun artması və enerji sistemlərinin tədricən daha təmiz mənbələrə istiqamətlənməsi ölkələrimiz qarşısında yeni əməkdaşlıq imkanları açır. Bu baxımdan bərpaolunan enerji sahəsində Azərbaycan ilə Mərkəzi Asiya dövlətləri arasında əlaqələrin genişləndirilməsi xüsusi əhəmiyyət kəsb edir. Azərbaycan günəş, külək və digər bərpaolunan enerji mənbələrinin inkişafı istiqamətində geniş layihələr həyata keçirir. Mərkəzi Asiya dövlətlərinin də bu sahədə malik olduğu böyük potensial nəzərə alınmaqla, enerji istehsalı, ötürülməsi və ixracı üzrə birgə təşəbbüslərin həyata keçirilməsi üçün əlverişli şərait mövcuddur. Belə əməkdaşlıq enerji təhlükəsizliyinin möhkəmləndirilməsi ilə yanaşı, regionun qlobal enerji keçid prosesində mövqeyinin gücləndirilməsinə də töhfə verə bilər.
Bu çərçivədə Azərbaycan, Qazaxıstan və Özbəkistan arasında yaşıl enerji dəhlizinin yaradılması istiqamətində aparılan birgə iş xüsusi əhəmiyyət daşıyır. Sözügedən təşəbbüs bərpaolunan enerji sahəsində mövcud potensialın birləşdirilməsi, elektrik enerjisinin ötürülməsi imkanlarının genişləndirilməsi və gələcəkdə regionun təmiz enerjisinin beynəlxalq bazarlara çıxarılması baxımından strateji perspektivlər yaradır. Yaşıl enerji dəhlizi eyni zamanda ölkələrimiz arasında enerji sistemlərinin daha sıx əlaqələndirilməsi üçün yeni imkanlar formalaşdırır. Bərpaolunan enerji sahəsində əməkdaşlığın inkişafı Azərbaycan və Mərkəzi Asiya dövlətlərinin enerji sektorunda yeni texnologiyaların tətbiqinə, investisiyaların cəlb edilməsinə və enerji infrastrukturunun modernləşdirilməsinə də imkan yaradır. Bu istiqamətdə birgə layihələrin həyata keçirilməsi yalnız elektrik enerjisi istehsalının artırılması baxımından deyil, həm də texnologiya və təcrübə mübadiləsi, yeni ixtisasların formalaşdırılması və yüksək əlavə dəyər yaradan iqtisadi fəaliyyət sahələrinin inkişafı baxımından əhəmiyyətlidir.
Energetika Azərbaycan ilə Mərkəzi Asiya arasında strateji tərəfdaşlığın əsas dayaqlarından biri olaraq qalır. Ənənəvi enerji resurslarının Azərbaycan üzərindən beynəlxalq bazarlara çıxarılması, Xəzər hövzəsində enerji və nəqliyyat infrastrukturunun inkişafı, eləcə də yaşıl enerji dəhlizinin yaradılması istiqamətində görülən işlər əməkdaşlığımızın perspektivlərini daha da genişləndirir. Bu proseslərin uğurlu davamı üçün isə sülh, təhlükəsizlik, siyasi və iqtisadi sabitlik mühüm şərtdir. Məhz belə bir mühit Azərbaycan və Mərkəzi Asiya dövlətlərinin qarşılıqlı fəaliyyətinin möhkəmləndirilməsi, yeni layihələrin həyata keçirilməsi və regionumuzun davamlı inkişafının təmin olunması üçün möhkəm zəmin yaradır.
Çinarə Pirməmmədova- Zərdab rayon Hüseynxanlı kənd körpələr evi-uşaq bağçasının müdiri
