Daşkənd və bütün Özbəkistan yüksəliş dövrünü yaşayır
Prezident İlham Əliyevin 23 avqust 2026-cı ildə Özbəkistana dövlət səfəri çərçivəsində Daşkənddə mətbuata verdiyi bəyanatda səsləndirdiyi “Bu gün Daşkənd və bütün Özbəkistan yüksəliş dövrünü yaşayır” fikri ölkədə son illərdə həyata keçirilən genişmiqyaslı islahatların və sosial-iqtisadi transformasiyanın mahiyyətini ifadə edən mühüm siyasi qiymətləndirmədir. Prezident qeyd edib ki, Daşkəndə hər səfərində şəhərin sürətli inkişafının şahidi olur və bu dinamika həm böyük layihələrdə, həm də şəhərin gündəlik həyatında özünü aydın göstərir. Bu inkişafın arxasında isə Özbəkistanın iqtisadi potensialının gücləndirilməsi, beynəlxalq mövqelərinin möhkəmləndirilməsi və ən mühüm sosial-iqtisadi məsələlərin həllinə yönəlmiş ardıcıl siyasət dayanır. Özbəkistanın son illərdəki iqtisadi göstəriciləri bu yüksəlişin real və genişmiqyaslı xarakter daşıdığını göstərir. 2025-ci ildə ölkənin real ÜDM-i 7,7 faiz artıb və iqtisadiyyatın həcmi cari qiymətlərlə 1 849,7 trilyon suma çatıb. Bu artım əvvəlki illərlə müqayisədə yüksək dinamikanı nümayiş etdirir. İqtisadi artımın əsas xüsusiyyətlərindən biri onun yalnız bir sektorla məhdudlaşmamasıdır. Sənaye, xidmətlər, tikinti, kənd təsərrüfatı, ticarət və investisiya sahələrində paralel inkişaf müşahidə olunub. 2025-ci ildə sənaye istehsalı 6,8 faiz, tikinti 14,2 faiz, bazar xidmətləri 14,7 faiz, pərakəndə ticarət 11,2 faiz artıb. İxracın 24 faiz yüksəlməsi isə Özbəkistan iqtisadiyyatının xarici bazarlara çıxış imkanlarının genişləndiyini göstərir. 2026-cı ilin ilk yarısında iqtisadi artım daha da sürətlənib. Yanvar-iyun aylarında ölkənin ÜDM-i 8,5 faiz artaraq 1 072,7 trilyon suma çatıb. Eyni dövrdə sənaye istehsalı 8 faiz, tikinti işləri 13,8 faiz artıb. İnvestisiya fəallığının yüksək səviyyəsi də diqqət çəkir: ilin ilk altı ayında əsas kapitala investisiyalar 17,5 faiz yüksəlib. Xidmətlər sektorunda da ciddi dinamika qeydə alınıb. Bu göstəricilər göstərir ki, Özbəkistanda iqtisadi yüksəliş yalnız makroiqtisadi göstəricilərin yaxşılaşması deyil, real istehsalın, infrastruktur quruculuğunun, xidmətlərin və investisiya proseslərinin genişlənməsi ilə müşayiət olunur. Ölkənin iqtisadi modelində baş verən dəyişikliklərin mühüm istiqamətlərindən biri iqtisadiyyatın şaxələndirilməsidir. Prezident İlham Əliyevin də bəyanatında xüsusi vurğuladığı kimi, son illərdə Özbəkistanda sənayenin inkişaf etdirilməsi, kənd təsərrüfatının daha müasir və çoxşaxəli əsasda qurulması, iqtisadiyyatın böyük potensiala malik sahələrinə investisiyaların cəlb edilməsi istiqamətində mühüm addımlar atılıb. Bu siyasətin nəticəsində ölkənin iqtisadi artımında sənaye və xidmət sektorlarının çəkisi artır, yeni istehsal sahələri yaradılır, özəl sektorun və investisiyaların iqtisadi inkişafda rolu genişlənir. Daşkənd isə bu transformasiyanın ən aydın göründüyü məkandır. Paytaxt sürətlə böyüyən iqtisadiyyatın, müasir şəhərsalmanın, yeni nəqliyyat və sosial infrastrukturun əsas mərkəzinə çevrilir. 2025-ci ildə Daşkənd şəhərinin ümumi regional məhsulu 367 trilyon sumdan çox olub və əvvəlki illə müqayisədə 11,3 faiz artıb. Bu göstərici paytaxtın ölkənin iqtisadi inkişafında xüsusi çəkisini və şəhərdə gedən fəal tikinti, xidmət, investisiya və biznes proseslərinin miqyasını nümayiş etdirir. Daşkəndin simasının dəyişməsində şəhərsalma layihələri xüsusi əhəmiyyət daşıyır. Prezident İlham Əliyevin səfəri zamanı tanış olduğu “Yeni Daşkənd” layihəsi Özbəkistanın gələcək şəhər inkişafı baxımından ən böyük və strateji təşəbbüslərdən biridir. Layihə paytaxtın urbanistik yükünün bölüşdürülməsi, yeni yaşayış və ictimai məkanların, sosial obyektlərin, nəqliyyat infrastrukturu və müasir şəhər mühitinin yaradılması baxımından mühüm əhəmiyyət daşıyır. Bu layihənin miqyası Özbəkistanda şəhərsalmanın artıq yalnız mövcud ərazilərin yenilənməsi ilə deyil, yeni urbanistik məkanların formalaşdırılması ilə müşayiət olunduğunu göstərir. 23 avqustda “Yeni Daşkənd” ərazisində “Azərbaycan” parkının təməlinin qoyulması isə iki qardaş ölkənin münasibətlərinin yalnız siyasi və iqtisadi əməkdaşlıqla məhdudlaşmadığını nümayiş etdirən mühüm hadisədir. Azərbaycan parkının yaradılması Azərbaycan–Özbəkistan qardaşlığının Daşkəndin müasir şəhər məkanında rəmzi ifadəsinə çevriləcək. Eyni səfər çərçivəsində Nizami Gəncəvi adına Milli Pedaqoji Universitetin açılışının keçirilməsi isə humanitar və təhsil əlaqələrinin də strateji tərəfdaşlığın mühüm istiqamətinə çevrildiyini göstərir. Özbəkistanın yüksəlişi nəqliyyat və energetika sahələrində həyata keçirilən layihələrlə də tamamlanır. Ölkənin Mərkəzi Asiyanın coğrafi mərkəzində yerləşməsi ona regional nəqliyyat bağlantılarının inkişafında mühüm üstünlük verir. Dəmir yollarının, avtomobil yollarının, logistika imkanlarının və hava nəqliyyatının inkişaf etdirilməsi Özbəkistanın regional ticarət və tranzit imkanlarını genişləndirir.
Zərdab rayon Nizami Gəncəvi adına Şəftəhal kənd tam orta ümumtəhsil məktəbin müəllimi Mirzəyeva Roza Rasim qızı.
