Çex Respublikasının Baş Nazirinin Azərbaycana rəsmi səfəri iki ölkə arasında münasibətlərin inkişafında mühüm mərhələ kimi tarixə düşdü
Azərbaycan ilə Çex Respublikası arasında münasibətlər müasir beynəlxalq münasibətlər sistemində qarşılıqlı etimad, praqmatik əməkdaşlıq və davamlı siyasi dialoq əsasında inkişaf edən nümunəvi tərəfdaşlıqlardan biri kimi qiymətləndirilir. Hər iki ölkənin dövlət müstəqilliyini bərpa etməsindən sonra formalaşan bu əlaqələr zaman keçdikcə daha da dərinləşmiş, siyasi, iqtisadi, enerji, müdafiə sənayesi və humanitar sahələri əhatə edən geniş əməkdaşlıq platformasına çevrilmişdir. Azərbaycan Respublikasının Prezidenti İlham Əliyev ilə Çex Respublikasının Baş naziri Andrey Babiš arasında keçirilən görüşlər və aparılan müzakirələr bu əməkdaşlığın strateji mahiyyət daşıdığını bir daha təsdiqləyir. Xüsusilə Baş nazirin Azərbaycana rəsmi səfəri zamanı səsləndirilən fikirlər göstərdi ki, iki ölkə arasında siyasi dialoq artıq formalaşma mərhələsini keçərək fəal və məzmunlu mərhələyə daxil olub. Prezident İlham Əliyevin vurğuladığı kimi, “çox fəal siyasi dialoq” yalnız diplomatik münasibətlərin göstəricisi deyil, həm də qarşılıqlı etimadın, ortaq maraqların və gələcəyə hesablanmış əməkdaşlıq strategiyasının təzahürüdür. Bu dialoq çərçivəsində regional təhlükəsizlik, beynəlxalq münasibətlər sistemi, eləcə də ikitərəfli əməkdaşlığın perspektivləri geniş şəkildə müzakirə olunur. İkitərəfli münasibətlərin mühüm istiqamətlərindən biri iqtisadi sahədir. Son illərdə Azərbaycan və Çexiya arasında ticarət dövriyyəsinin artması, qarşılıqlı investisiya imkanlarının genişlənməsi bu sahədə real nəticələrin əldə olunduğunu göstərir. Çexiyadan Azərbaycana gələn iş adamlarından ibarət nümayəndə heyətinin iştirakı ilə keçirilən biznes forum əməkdaşlığın praktik müstəvidə inkişafına xidmət edən mühüm platforma kimi diqqət çəkir.
Azərbaycan tərəfi ticarət dövriyyəsinin daha balanslı və şaxələndirilmiş strukturda inkişaf etməsini prioritet hesab edir. Bu məqsədlə sənaye, kənd təsərrüfatı, texnologiya və nəqliyyat-logistika sahələrində yeni layihələrin reallaşdırılması üçün geniş imkanlar mövcuddur. Çexiyanın sənaye potensialı ilə Azərbaycanın strateji coğrafi mövqeyi və resurs imkanlarının birləşməsi qarşılıqlı faydalı əməkdaşlıq üçün əlverişli zəmin yaradır. Azərbaycan-Çexiya münasibətlərində enerji sahəsi xüsusi yer tutur. Azərbaycan uzun illərdir ki, Avropanın enerji təhlükəsizliyinin təmin olunmasında mühüm rol oynayan etibarlı tərəfdaş kimi çıxış edir. Azərbaycan neftinin Çexiyaya ixracı bu ölkənin enerji balansında əhəmiyyətli paya malikdir. Eyni zamanda, Azərbaycanın təbii qaz ixracı coğrafiyasının genişlənməsi Avropa bazarında ölkəmizin rolunu daha da gücləndirib. Hazırda Azərbaycan qazının bir sıra Avropa ölkələrinə çatdırılması regionda enerji təhlükəsizliyinin möhkəmlənməsinə xidmət edir. Bu kontekstdə Çexiya ilə əməkdaşlıq yalnız ikitərəfli deyil, həm də ümumavropa enerji təhlükəsizliyi baxımından strateji əhəmiyyət daşıyır. İkitərəfli münasibətlərin mühüm istiqamətlərindən biri də müdafiə sənayesi sahəsində əməkdaşlıqdır. Azərbaycan Çexiyadan müxtəlif hərbi təyinatlı məhsullar idxal edir və bu sahədə uzunmüddətli tərəfdaşlıq mövcuddur. Hazırda isə əməkdaşlıq yeni mərhələyə qədəm qoyaraq birgə istehsal layihələrinin müzakirəsi ilə davam etdirilir. Bu istiqamət Azərbaycanın yerli müdafiə sənayesinin inkişafı strategiyası ilə də uzlaşır. Çexiyanın bu sahədəki zəngin təcrübəsi və texnoloji imkanları Azərbaycanın milli istehsal potensialının artırılmasına mühüm töhfə verə bilər. Gələcəkdə birgə istehsalın genişlənməsi həm iqtisadi, həm də təhlükəsizlik baxımından əhəmiyyətli nəticələr vəd edir.
Rasim Hüseynov – Zərdab Rayon Ağsaqqallar Şurasının sədri
