Cəbrayıl Əməliyyatı – Zəfərə Aparan Strateji Addım
2020-ci il sentyabrın 27-də başlayan Vətən müharibəsində Cəbrayıl istiqamətində aparılan hərbi əməliyyatlar Azərbaycan Ordusunun qarşısında duran mühüm strateji vəzifələrdən biri idi. Cəbrayılın coğrafi mövqeyi, ərazinin mürəkkəb relyefi və düşmənin burada yaratdığı müdafiə sistemi əməliyyatların gedişini mürəkkəbləşdirən əsas amillər sırasında olmuşdur.
Cəbrayıl ərazisində Ermənistan silahlı qüvvələri tərəfindən bir neçə xətdən ibarət mühəndis-istehkam sistemi, müxtəlif müdafiə qurğuları, mina və digər maneələr yaradılmışdı. Azərbaycan Müdafiə Nazirliyinin məlumatında da Cəbrayılın ən çətin relyefli döyüş ərazilərindən biri olduğu və burada bir neçə zolaqdan ibarət istehkam xəttinin mövcudluğu qeyd edilir. Bu müdafiə sədlərinin yarılması Azərbaycan hərbçilərindən yüksək döyüş hazırlığı, peşəkarlıq, cəsarət və böyük fədakarlıq tələb edirdi.
4 oktyabr 2020-ci ildə Cəbrayıl şəhərinin işğaldan azad edilməsi Vətən müharibəsinin mühüm hadisələrindən biri oldu. Azərbaycan Prezidentinin qeyd etdiyi kimi, Cəbrayıl İkinci Qarabağ müharibəsi zamanı işğaldan azad edilən ilk şəhər idi və onun azad olunması müharibənin sonrakı gedişinə əhəmiyyətli təsir göstərdi. Bu qələbə Azərbaycan Ordusunun hərbi imkanlarının və yüksək döyüş ruhunun mühüm göstəricisi kimi tarixə düşdü.
Cəbrayıl əməliyyatının əhəmiyyəti yalnız rayonun azad edilməsi ilə məhdudlaşmırdı. Cəbrayıl istiqamətində əldə olunan hərbi uğurlar Azərbaycan Ordusunun digər istiqamətlərdə əməliyyatları davam etdirməsi üçün imkanları genişləndirdi. Prezident İlham Əliyevin çıxışında qeyd etdiyi kimi, Cəbrayılın azad edilməsindən sonra Xocavənd rayonunun cənub kəndləri və strateji Hadrut qəsəbəsi istiqamətində hərbi əməliyyatların aparılması üçün geniş imkanlar yarandı.
Cəbrayıl istiqamətində əldə olunan uğurlar sonrakı hərbi əməliyyatların gedişində də öz əksini tapdı. 9 oktyabr 2020-ci ildə Hadrut qəsəbəsi, 20 oktyabrda Zəngilan şəhəri, 25 oktyabrda Qubadlı şəhəri işğaldan azad edildi. Qubadlının azad olunmasından sonra Laçın istiqamətində irəliləmək üçün imkan yarandı. Azərbaycan Müdafiə Nazirliyinin məlumatında da Qubadlı əməliyyatının Laçın istiqamətində irəliləyiş üçün yol açdığı qeyd olunur.
Cəbrayıl əməliyyatı Vətən müharibəsinin ümumi gedişində mühüm hərbi-strateji mərhələlərdən birinə çevrildi. Cəbrayılın azad olunması ilə Azərbaycan Ordusu cənub istiqamətində mövqelərini möhkəmləndirdi, sonrakı əməliyyatların keçirilməsi üçün yeni imkanlar əldə etdi və Zəngilan, Qubadlı və Laçın istiqamətində irəliləyiş təmin olundu.
Cəbrayıl əməliyyatının tarixi əhəmiyyəti həm də Azərbaycan əsgər və zabitlərinin göstərdiyi qəhrəmanlıq və fədakarlıqla bağlıdır. İstehkamlarla, minalanmış sahələrlə və mürəkkəb relyeflə üz-üzə qalan hərbçilərimizin döyüş meydanında göstərdiyi şücaət Cəbrayılın azadlığının əsasını təşkil etdi. Bu tarixi qələbə şəhidlərimizin canı və qanı bahasına əldə edildi və Azərbaycan xalqının Zəfər salnaməsinin mühüm səhifəsinə çevrildi.
Cəbrayıl əməliyyatı – Vətən müharibəsində hərbi-strateji əhəmiyyəti, mürəkkəbliyi və qəhrəmanlıq nümunələri ilə Azərbaycanın Zəfər tarixində xüsusi yer tutan tarixi döyüşlərdən biridir.
Gülnaz Məmmədova – Zərdab şəhər sakini, təqaüdçü
