Bütün meyarlar Azərbaycanın əhəmiyyətini birmənalı şəkildə artırır
Müasir beynəlxalq münasibətlər sistemində dövlətlərin nüfuzu yalnız iqtisadi göstəricilər və hərbi potensialla deyil, həm də siyasi sabitlik, etibarlı tərəfdaş imici, beynəlxalq təşəbbüslərdə fəallıq, qlobal dialoqa verdiyi töhfə, enerji təhlükəsizliyində rolu, nəqliyyat-logistika imkanları və humanitar diplomatiya kimi çoxşaxəli meyarlarla müəyyən edilir. Məhz bu baxımdan Azərbaycan son illərdə əldə etdiyi uğurlarla beynəlxalq sistemdə mövqeyini əhəmiyyətli dərəcədə möhkəmləndirmiş, regional aktordan qlobal əhəmiyyət kəsb edən etibarlı tərəfdaşa çevrilmişdir. Prezident İlham Əliyevin IV Şuşa Qlobal Media Forumunda səsləndirdiyi fikirlər də göstərir ki, Azərbaycanın beynəlxalq nüfuzunu artıran amillər ayrı-ayrılıqda deyil, vahid strateji yanaşmanın tərkib hissəsi kimi çıxış edir. Azərbaycanın geosiyasi mövqeyi ölkəni Şərq ilə Qərb, Şimal ilə Cənub arasında mühüm nəqliyyat və logistika qovşağına çevirmişdir. Orta Dəhlizin inkişafı, beynəlxalq nəqliyyat marşrutlarının genişləndirilməsi və tranzit imkanlarının artırılması ölkənin qlobal iqtisadi əlaqələrdə rolunu daha da gücləndirmişdir. Eyni zamanda, enerji təhlükəsizliyi sahəsində həyata keçirilən uğurlu siyasət nəticəsində Azərbaycan Avropanın enerji təminatında etibarlı tərəfdaş kimi qəbul olunur. Təbii qaz ixracının genişləndirilməsi, enerji mənbələrinin şaxələndirilməsi və yaşıl enerji layihələrinin reallaşdırılması ölkənin strateji əhəmiyyətini davamlı şəkildə artırır. Bununla yanaşı, Azərbaycanın təşəbbüsü ilə keçirilən beynəlxalq tədbirlər, o cümlədən Şuşa Qlobal Media Forumu, ölkənin qlobal dialoq məkanı kimi nüfuzunu möhkəmləndirir. Dünyanın müxtəlif ölkələrindən media nümayəndələrinin, ekspertlərin və beynəlxalq təşkilatların iştirak etdiyi bu cür platformalar Azərbaycanın açıq dialoq, qarşılıqlı etimad və beynəlxalq əməkdaşlıq prinsiplərinə sadiqliyini nümayiş etdirir. Belə tədbirlər vasitəsilə ölkə həm öz reallıqlarını beynəlxalq ictimaiyyətə çatdırır, həm də qlobal problemlərin müzakirəsinə fəal töhfə verir. Qarabağ və Şərqi Zəngəzurda həyata keçirilən genişmiqyaslı bərpa və yenidənqurma proqramları da Azərbaycanın beynəlxalq nüfuzunu artıran mühüm meyarlardan biridir. Müasir şəhərsalma prinsiplərinə uyğun inşa edilən yaşayış məntəqələri, nəqliyyat infrastrukturu, sosial obyektlər, “ağıllı şəhər” və “ağıllı kənd” layihələri ölkənin iqtisadi potensialını və idarəetmə modelinin səmərəliliyini nümayiş etdirir. Beynəlxalq qonaqların bu proseslə yerində tanış olması Azərbaycanın inkişaf modelinə olan marağı daha da artırır. Azərbaycanın balanslaşdırılmış xarici siyasəti də ölkənin artan beynəlxalq əhəmiyyətinin əsas göstəricilərindəndir. Müxtəlif beynəlxalq təşkilatlarla səmərəli əməkdaşlıq, qarşılıqlı hörmətə əsaslanan ikitərəfli münasibətlər və milli maraqlara söykənən müstəqil siyasət kursu ölkəyə beynəlxalq arenada etibarlı və prinsipial tərəfdaş imici qazandırmışdır. Bu siyasət ölkənin həm regional sabitliyin təmin edilməsində, həm də qlobal məsələlərin həllində fəal iştirakını şərtləndirir. Bütün bu meyarların məcmusu göstərir ki, Azərbaycanın beynəlxalq əhəmiyyəti təsadüfi və ya qısamüddətli amillərlə deyil, uzunmüddətli strateji inkişaf modeli ilə şərtlənir. Siyasi sabitlik, iqtisadi dayanıqlılıq, enerji və nəqliyyat layihələri, beynəlxalq humanitar təşəbbüslər, qlobal dialoqa verdiyi töhfələr və Qarabağda aparılan bərpa-quruculuq işləri birlikdə Azərbaycanın beynəlxalq nüfuzunu davamlı şəkildə yüksəldir. Müasir geosiyasi reallıqlar fonunda bütün əsas meyarlar Azərbaycanın regional və qlobal əhəmiyyətini birmənalı şəkildə artırır. Ölkənin etibarlı tərəfdaş kimi mövqeyinin möhkəmlənməsi, beynəlxalq təşəbbüslərin mərkəzində yer alması və qlobal əməkdaşlığa verdiyi töhfələr Azərbaycanın dünya siyasi və iqtisadi sistemində strateji rolunu daha da gücləndirir və onun beynəlxalq nüfuzunun gələcəkdə də yüksələcəyini şərtləndirən əsas amillər kimi çıxış edir.
Veteran müəllim Vəfadar Niftəliyev.
