Bugünkü dünyada ən önəmli amillərdən biri siyasi və iqtisadi sabitlikdir
Prezident İlham Əliyevin II Azərbaycan Beynəlxalq İnvestisiya Forumu çərçivəsində keçirilən tədbirdə vurğuladığı “Bugünkü dünyada ən önəmli amillərdən biri siyasi və iqtisadi sabitlikdir” fikri qlobal investisiya mühitində Azərbaycanın mövqeyini xarakterizə edən mühüm göstəricilərlə tamamlanır. Dövlət başçısı siyasi və iqtisadi sabitliyin Azərbaycanda 30 ildən artıqdır davam etdiyini qeyd edib və ölkənin investisiya cəlbediciliyinin əsas amilləri sırasında məhz sabitliklə yanaşı, güclü maliyyə sistemi, aşağı dövlət borcu, sabit milli valyuta, əlverişli investisiya mühiti və uzunmüddətli müqavilə öhdəliklərinə sadiqliyi göstərib. Prezidentin təqdim etdiyi məlumatlara əsasən, Azərbaycanın ümumi dövlət borcu ÜDM-in 20 faizini, xarici borcu isə cəmi 5,6 faizini təşkil edir; ölkənin valyuta ehtiyatları xarici borcu təxminən 20 dəfə üstələyir. Bu maliyyə göstəriciləri iqtisadi sabitliyin əsas dayaqlarından biri kimi təqdim olunur. Makroiqtisadi sabitliyin digər mühüm göstəricisi milli valyutanın məzənnəsidir. Prezidentin çıxışında bildirilib ki, 2017-ci ilin aprelindən etibarən ABŞ dollarının manata qarşı məzənnəsi dəyişməyib və 1 dollar 1,70 manat səviyyəsindədir. Dövlət başçısı bu sabitliyi ölkənin müsbət ticarət balansı ilə əlaqələndirib. Eyni zamanda, Azərbaycanın son 20 ildə 350 milyard ABŞ dollarından çox investisiya cəlb etməsi, bunun təxminən yarısının birbaşa xarici investisiyalardan ibarət olması ölkənin beynəlxalq investorlar üçün formalaşdırdığı uzunmüddətli iqtisadi tərəfdaşlıq mühitinin miqyasını göstərir. Siyasi sabitlik iqtisadi göstəricilərlə paralel olaraq ölkənin uzunmüddətli inkişaf strategiyasının mühüm şərtlərindən biri kimi çıxış edir. Azərbaycan 1990-cı illərin əvvəllərində iqtisadi tənəzzül, daxili siyasi böhran və Ermənistanın işğalı ilə bağlı ciddi çətinliklərlə üzləşsə də, sonrakı dövrdə dövlət institutlarının möhkəmləndirilməsi və iqtisadiyyatın bərpası istiqamətində ardıcıl siyasət həyata keçirib. Bu proses nəticəsində Azərbaycan bu gün beynəlxalq investisiya və biznes mühitində uzunmüddətli tərəfdaşlıq imkanlarını genişləndirməyə çalışır. Prezidentin forumdakı çıxışında da vurğulandığı kimi, proqnozlaşdırıla bilən mühit investorlar üçün mühüm şərtdir. Azərbaycanın iqtisadi dayanıqlığının formalaşmasında enerji sektorundan əldə olunan gəlirlərin iqtisadiyyatın digər sahələrinə yönəldilməsi də mühüm rol oynayır. 2025-ci ildə qeyri-neft-qaz sektorunun ÜDM-də payı 71 faiz olub. Dövlət Neft Fondunun aktivləri isə son 20 ildən artıq müddətdə 840 milyon dollardan 75 milyard dollara yüksəlib. Bu göstəricilər iqtisadiyyatın şaxələndirilməsi və maliyyə ehtiyatlarının formalaşdırılması baxımından ölkənin topladığı resursların miqyasını nümayiş etdirir. Beləliklə, siyasi və iqtisadi sabitlik anlayışı Azərbaycanın investisiya mühitində yalnız ümumi prinsip kimi deyil, aşağı xarici borc, böyük valyuta ehtiyatları, sabit məzənnə, yüksək investisiya həcmi, qeyri-neft sektorunun genişlənməsi və uzunmüddətli müqavilə öhdəliklərinə sadiqlik kimi konkret göstəricilərlə müşayiət olunur. II Azərbaycan Beynəlxalq İnvestisiya Forumunda səsləndirilən rəqəmlər göstərir ki, ölkənin qarşıya qoyduğu əsas məqsədlərdən biri mövcud sabitlik və maliyyə imkanları üzərində yeni investisiyalar cəlb etmək, iqtisadiyyatın şaxələndirilməsini sürətləndirmək və Azərbaycanı regional investisiya və logistika mərkəzlərindən birinə çevirməkdir.
Zərdab rayon Nizami Gəncəvi adına Şəftəhal kənd tam orta ümumtəhsil məktəbin müəllimi Mirzəyeva Roza Rasim qızı.
