Bu il “Şəhərsalma və Memarlıq İli” elan edilmişdir.
Azərbaycan son illərdə yalnız regionun deyil, dünyanın diqqət mərkəzində olan inkişaf modellərindən birini formalaşdırmışdır. Xüsusilə işğaldan azad edilmiş ərazilərdə həyata keçirilən genişmiqyaslı quruculuq və abadlıq işləri dövlətimizin gücünü, iqtisadi potensialını və gələcəyə hesablanmış strateji baxışını nümayiş etdirir. Məhz bu baxımdan ölkəmizdə “Şəhərsalma və Memarlıq İli”nin elan edilməsi xüsusi əhəmiyyət daşıyır. Bu qərar Prezident cənab İlham Əliyevin rəhbərliyi ilə həyata keçirilən müasir dövlət quruculuğu siyasətinin mühüm istiqamətlərindən biridir.
Bu gün Azərbaycan şəhərləri yeni inkişaf mərhələsinə qədəm qoyur. Müasir memarlıq üslubu, ekoloji tarazlıq, ağıllı idarəetmə və milli-mədəni irsin qorunması dövlət siyasətinin əsas prioritetlərinə çevrilmişdir. Prezident İlham Əliyevin təşəbbüsü ilə həyata keçirilən layihələr yalnız şəhərlərin yenilənməsinə deyil, həm də insanların daha rahat və təhlükəsiz yaşayışının təmin olunmasına xidmət edir.
İşğaldan azad edilmiş ərazilərdə aparılan bərpa-quruculuq işləri bu siyasətin ən mühüm nümunəsidir. Uzun illər erməni işğalı altında qalmış Ağdam, Zəngilan və Xankəndi şəhərləri bu gün tamamilə yeni simada qurulur. İşğal dövründə dağıdılmış yaşayış məntəqələri yenidən bərpa edilir, müasir infrastruktur yaradılır və şəhərlər beynəlxalq standartlara uyğun şəkildə inkişaf etdirilir.
Azərbaycanın BMT-nin Məskunlaşma Proqramı ilə əməkdaşlığı da ölkəmizin şəhərsalma sahəsində həyata keçirdiyi siyasətin beynəlxalq səviyyədə yüksək qiymətləndirildiyini göstərir. 2022-ci ildən etibarən Azərbaycanda keçirilən milli şəhərsalma forumları böyük əhəmiyyət daşıyır. Bu forumların məhz işğaldan azad edilmiş şəhərlərdə təşkil olunması xüsusi rəmzi məna daşıyır. Ağdam, Zəngilan və Xankəndidə keçirilən forumlar Azərbaycanın yalnız dağıntıları aradan qaldırmadığını, eyni zamanda gələcəyin müasir şəhərlərini qurduğunu nümayiş etdirir.
Prezident İlham Əliyevin həyata keçirdiyi siyasətin əsas istiqamətlərindən biri “ağıllı şəhər” və “ağıllı kənd” konsepsiyalarının tətbiqidir. Bu layihələr çərçivəsində rəqəmsal idarəetmə sistemləri, alternativ enerji mənbələri, ekoloji təhlükəsizlik və innovativ texnologiyalar ön plana çəkilir. Xüsusilə Zəngilan rayonunun Ağalı kəndində həyata keçirilən “ağıllı kənd” layihəsi dünyada böyük maraq doğurmuşdur. Bu layihə göstərir ki, Azərbaycan yalnız bərpa işləri aparmır, eyni zamanda gələcəyin yaşayış modelini formalaşdırır.
Şəhərsalma siyasətində tarixi və milli memarlıq irsinin qorunması da mühüm yer tutur. İşğal dövründə dağıdılmış məscidlərin, tarixi abidələrin və mədəniyyət ocaqlarının bərpası dövlət tərəfindən xüsusi diqqətdə saxlanılır. Qarabağ və Şərqi Zəngəzurda aparılan yenidənqurma işləri zamanı milli memarlıq ənənələri ilə müasir memarlıq üslubu harmonik şəkildə birləşdirilir. Bu isə Azərbaycanın zəngin mədəniyyətinin və milli kimliyinin qorunmasına xidmət edir.
Hazırda azad olunmuş ərazilərdə geniş avtomobil yolları, dəmir yolları, tunellər, hava limanları, məktəblər, xəstəxanalar və yaşayış kompleksləri tikilir. Görülən bütün işlər insanların doğma yurdlarına təhlükəsiz və rahat şəkildə qayıtmasını təmin etməyə yönəlib. “Böyük Qayıdış” proqramı çərçivəsində artıq minlərlə insan öz doğma torpaqlarına qayıdır və bölgədə həyat yenidən canlanır.
Prezident İlham Əliyevin rəhbərliyi ilə həyata keçirilən şəhərsalma siyasəti Azərbaycanın gələcək inkişaf strategiyasının mühüm tərkib hissəsidir. Bu siyasət yalnız yeni binaların tikilməsi deyil, həm də müasir, təhlükəsiz, ekoloji cəhətdən sağlam və innovativ şəhər mühitinin yaradılması deməkdir. Dövlət başçısının uzaqgörən siyasəti nəticəsində Azərbaycan bu gün regionun ən sürətlə inkişaf edən ölkələrindən birinə çevrilmişdir.
“Şəhərsalma və Memarlıq İli” çərçivəsində həyata keçirilən tədbirlər bir daha göstərir ki, Azərbaycan yalnız öz şəhərlərini yenidən qurmaqla kifayətlənmir, eyni zamanda beynəlxalq şəhərsalma təcrübəsinə mühüm töhfələr verir. Qarabağ və Şərqi Zəngəzurda yaradılan yeni şəhər modeli gələcək nəsillər üçün mühüm inkişaf nümunəsi olacaqdır.
Bu gün Azərbaycanın şəhərsalma siyasəti Prezident İlham Əliyevin rəhbərliyi ilə ölkənin gücünü, xalqın birliyini və dövlətimizin gələcəyə inamını əks etdirir. Qarabağda və Şərqi Zəngəzurda aparılan quruculuq işləri Azərbaycanın tarixində yeni inkişaf mərhələsinin başlanğıcıdır və bu proses ölkəmizin parlaq gələcəyinin əsas təminatlarından biridir.
Zərdab rayon Mədəniyyət Mərkəzinin direktoru Elyurə Məmmədova
