Bu gün Azərbaycanın qarşısında duran ən böyük işlərdən biri azad edilmiş ərazilərin yenidən qurulmasıdır
Azərbaycanın sülh istiqamətində atdığı addımlar beynəlxalq səviyyədə də diqqət çəkib. Prezident İlham Əliyev 2026-cı il üzrə “Zayed İnsan Qardaşlığı Mükafatı”na Azərbaycanla Ermənistan arasında sülhün əldə olunmasına göstərdiyi səylərə görə layiq görülüb. Sentyabrın 14-də mükafatın sertifikatı dövlətimizin başçısına təqdim olunub.
Mükafatın digər mühüm tərəfi isə onun vəsaitinin Qarabağ Dirçəliş Fonduna yönəldilməsidir. Prezident İlham Əliyev 500 min ABŞ dolları məbləğində pul mükafatının tam şəkildə Qarabağ Dirçəliş Fonduna köçürülməsi barədə qərar verib.
Bu fakt sülh anlayışının Azərbaycan üçün yalnız siyasi məsələ olmadığını göstərən nümunələrdən biri kimi təqdim olunur. Sülhün nəticəsi insanların həyatında, xüsusilə azad edilmiş ərazilərin bərpasında özünü göstərməlidir.
Bu gün Azərbaycanın qarşısında duran ən böyük işlərdən biri azad edilmiş ərazilərin yenidən qurulmasıdır.
Müharibədən sonra Qarabağ və Şərqi Zəngəzurda böyük quruculuq işlərinə başlanılıb. Dağıdılmış şəhər və kəndlərin yenidən salınması, yolların çəkilməsi, enerji və su təminatının yaradılması, məktəblərin, xəstəxanaların və digər sosial obyektlərin tikilməsi davam edir.
Prezident İlham Əliyevin çıxışında bildirilib ki, artıq Qarabağ və Şərqi Zəngəzurda 48 şəhər və kənddə insanlar yaşayır və bu yaşayış məntəqələrində 90 mindən çox insan məskunlaşıb. “Böyük Qayıdış” proqramı çərçivəsində keçmiş məcburi köçkünlərin öz doğma torpaqlarına qayıdışı davam edir.
Bu rəqəmlərin arxasında adi insanların həyat hekayələri dayanır. Uzun illər başqa yerlərdə yaşayan ailələr öz kəndlərinə və şəhərlərinə qayıdır, uşaqlar doğma torpaqlarında məktəbə gedir, insanlar burada işləyir və yeni həyat qururlar.
Əslində Qarabağın bərpasının ən böyük nəticəsi də budur: dağıdılmış ərazilərdə yenidən həyat yaranır.
Azad edilmiş ərazilərdə aparılan işlər yalnız yolların, binaların və infrastrukturun qurulması ilə məhdudlaşmır. Azərbaycanın tarixi və dini irsinin bərpasına da xüsusi diqqət yetirilir.
Prezident İlham Əliyev çıxışında Ağdam məscidinin bərpa edilən ilk obyektlərdən biri olduğunu, artıq 12 məscidin bərpa və yenidən qurulduğunu bildirib.
Bu işlərin mənəvi tərəfi də böyükdür. Çünki məscidlər yalnız ibadət yerləri deyil, həm də xalqın tarixinin, mədəniyyətinin və yaddaşının bir hissəsidir.
Qarabağda dini-mədəni irsin yenidən bərpa olunması Azərbaycanın öz tarixi irsinə münasibətini də göstərir.
Bakıda keçirilən tədbirlərin başqa bir mühüm tərəfi Türk dünyası və İslam ölkələri arasında əlaqələrin inkişafıdır.
Cavid Nuriyev – Zərdab şəhər sakini, fəal gənc
