Bizim qələbələrimizin başlanğıc tarixi Yeni Azərbaycan Partiyasının təsis qurultayında baş verdi
Azərbaycanın müasir siyasi tarixində mühüm dönüş nöqtələrindən biri 1990-cı illərin əvvəllərində ölkədə yaranmış mürəkkəb ictimai-siyasi vəziyyət şəraitində milli iradənin və dövlətçilik düşüncəsinin yeni siyasi platformada ifadə olunması olmuşdur. Həmin dövrdə ölkənin qarşılaşdığı ağır problemlərin həlli, dövlət idarəçiliyinin bərpası və Azərbaycanın gələcək inkişafının təmin edilməsi cəmiyyətin qarşısında mühüm vəzifələr kimi dayanırdı. Belə bir tarixi şəraitdə cəmiyyətimizin cəsarətli insanları, mütərəqqi insanlar, Azərbaycan dövlətinin taleyini düşünən insanlar Ulu Öndər Heydər Əliyevin ətrafında birləşmişdilər. Bu birlik yalnız siyasi təşkilatlanma xarakteri daşımırdı. O, eyni zamanda, ölkənin düşdüyü ağır vəziyyətdən çıxarılması və dövlətçiliyin qorunması istiqamətində formalaşmış ictimai tələbin ifadəsi idi.
1992-ci ilin noyabrında Naxçıvanda keçirilmiş Yeni Azərbaycan Partiyasının təsis qurultayı faktiki olaraq qələbələrimizə yol açmışdır. Bu hadisə həmin dövrün ictimai-siyasi reallıqları baxımından qanunauyğun nəticə idi və cəmiyyətdə formalaşmış ictimai sifarişi əks etdirirdi. Çünki həmin vaxt Azərbaycan artıq idarəolunmaz vəziyyətə düşmüşdü. Dövlət idarəçiliyində yaranmış böhran, siyasi qeyri-sabitlik və ölkənin üzləşdiyi digər ciddi problemlər Azərbaycanın gələcəyi ilə bağlı narahatlıqları daha da artırmışdı. Müstəqilliyin bərpasından sonra, hətta bu mərhələyə qədər ölkəmiz böyük itkilərlə üzləşmişdi. Bir tərəfdən torpaqlarımız işğal olunur, digər tərəfdən isə ölkə daxilində gedən xoşagəlməz proseslər dövlət institutlarının fəaliyyətinə ciddi mənfi təsir göstərirdi. Nəticədə Azərbaycan getdikcə idarəetmə böhranının dərinləşdiyi və dövlətçilik əsaslarının zəiflədiyi bir vəziyyətə sürüklənirdi. Bir-birini əvəzləyən, faktiki olaraq dövlət idarəçiliyini həyata keçirmək iqtidarında olmayan rəhbərlər yaranmış vəziyyət qarşısında lazımi tədbirləri görə bilmirdilər. Hakimiyyətin iflic vəziyyətə düşməsi ölkənin təhlükəsizliyinə və ərazi bütövlüyünə birbaşa təsir göstərirdi. Bunun nəticəsində torpaqlarımız mərhələli şəkildə işğal olunmağa başlamış, ilk növbədə keçmiş Dağlıq Qarabağ Muxtar Vilayətində Azərbaycanın nəzarəti faktiki olaraq itirilmişdir.
Ardınca Şuşa və Laçın rayonları 1992-ci ilin may ayında işğal altına düşmüşdür. Bu hadisələr Azərbaycanın ərazi bütövlüyünə vurulan ağır zərbələr olmaqla yanaşı, həmin dövrdə ölkədə mövcud olan siyasi böhranın nəticələrini də açıq şəkildə nümayiş etdirirdi. Həmin dövrdə hakimiyyət uğrunda mübarizə aparan qüvvələrin öz siyasi məqsədlərinə çatmaq üçün ölkənin təhlükəsizliyi və ərazi bütövlüyü məsələlərindən siyasi vasitə kimi istifadə etməsi yolverilməz idi. Ovaxtkı hakimiyyəti devirmək və hakimiyyətə gəlmək məqsədilə həyata keçirilən təxribatlar nəticəsində Azərbaycan ağır itkilərlə üzləşmiş, faktiki olaraq torpaqlarımızın Ermənistana təhvil verilməsi ilə nəticələnən proseslərə yol verilmişdir. Bundan sonra ölkəmizin ərazi itkiləri daha da genişlənmişdir. 1993-cü ilin aprelində Kəlbəcərin işğalı isə vəziyyəti daha da ağırlaşdırdı. Kəlbəcərin işğalı nəticəsində Ermənistanla keçmiş Dağlıq Qarabağ Muxtar Vilayəti arasında geniş coğrafi əlaqə yaradıldı. Bu, Ermənistan ərazisindən Qarabağ istiqamətində daha böyük həcmdə canlı qüvvənin, silah-sursatın və hərbi texnikanın daşınmasına imkan verdi və Azərbaycanın hərbi-strateji vəziyyətini daha da mürəkkəbləşdirdi.
Məhz belə ağır şəraitdə Yeni Azərbaycan Partiyasının təsis qurultayının keçirilməsi və Ulu Öndər Heydər Əliyevin ətrafında cəmiyyətin mütərəqqi və dövlətçilik mövqeyindən çıxış edən təbəqələrinin birləşməsi Azərbaycanın siyasi həyatında yeni mərhələnin əsasını qoydu. Bu baxımdan, bizim qələbələrimizin başlanğıc tarixi Yeni Azərbaycan Partiyasının təsis qurultayında baş verdi. Həmin qurultay sonrakı dövrdə Azərbaycanın siyasi sabitliyinin, dövlətçilik ənənələrinin və milli inkişaf strategiyasının formalaşmasına yol açan mühüm tarixi hadisə kimi qiymətləndirilir.
Çinarə Pirməmmədova- Zərdab rayon Hüseynxanlı kənd körpələr evi-uşaq bağçasının müdiri
