“Biz göstərdik ki, sülh bizim üçün artıq hiss olunan məfhumdur, onu hiss edə bilirik və sülh şəraitində yaşamağı öyrənirik”
Prezident İlham Əliyevin 2026-cı il iyulun 1-də Avropa Komissiyasının Prezidenti Ursula fon der Lyayen ilə keçirdiyi görüşdən sonra səsləndirdiyi “Biz göstərdik ki, sülh bizim üçün artıq hiss olunan məfhumdur, onu hiss edə bilirik və sülh şəraitində yaşamağı öyrənirik” fikri Azərbaycanın müharibədən sonrakı dövrdə həyata keçirdiyi siyasətin əsas mahiyyətini ifadə edir. Bu yanaşma sülhün yalnız diplomatik sənədlərdə əks olunan anlayış olmadığını, real həyatda təhlükəsizliyin, sabitliyin, iqtisadi inkişafın və regional əməkdaşlığın əsas şərti olduğunu göstərir. 2020-ci ildən sonra Azərbaycan regionda yeni siyasi reallıqların formalaşdığını bəyan etmiş və münasibətlərin beynəlxalq hüququn norma və prinsipləri əsasında qurulmasını təşviq etmişdir. Bu çərçivədə Ermənistanla sülh sazişinin hazırlanması təşəbbüsü Azərbaycan tərəfindən irəli sürülmüş, dövlətlərin suverenliyinin və ərazi bütövlüyünün qarşılıqlı tanınmasına əsaslanan beş baza prinsipi beynəlxalq ictimaiyyətə təqdim edilmişdir. Bu prinsiplər regionda uzunmüddətli sabitliyin hüquqi əsasını təşkil edir. Sülh siyasətinin praktik nəticələri artıq gündəlik həyatda özünü göstərməkdədir. İşğaldan azad edilmiş ərazilərdə genişmiqyaslı bərpa və yenidənqurma proqramları həyata keçirilir, yeni avtomobil yolları, dəmir yolları, hava limanları, məktəblər, xəstəxanalar və yaşayış məntəqələri inşa olunur. Keçmiş məcburi köçkünlərin mərhələli şəkildə doğma yurdlarına qayıdışı ölkədə sülhün real nəticələrinin ən mühüm göstəricilərindən biridir.
Azərbaycan eyni zamanda regional iqtisadi inteqrasiyanın tərəfdarı kimi çıxış edir. Orta Dəhlizin inkişafı, beynəlxalq nəqliyyat marşrutlarının genişləndirilməsi və enerji əməkdaşlığının gücləndirilməsi region ölkələri arasında qarşılıqlı etimadın artmasına xidmət edir. Avropa Komissiyası ilə enerji, nəqliyyat və rəqəmsal bağlantılar sahəsində əməkdaşlığın genişlənməsi də regionda sabitliyin iqtisadi əsaslarını möhkəmləndirir. Prezident İlham Əliyevin bəyan etdiyi kimi, sülhün gündəlik həyatda hiss olunması insanların təhlükəsizlik şəraitində yaşaması, iqtisadi imkanların genişlənməsi, sərmayələrin artması və beynəlxalq əməkdaşlığın inkişafı ilə ölçülür. Azərbaycanın həyata keçirdiyi siyasət göstərir ki, davamlı sülh yalnız siyasi razılaşmalarla deyil, real layihələr və qarşılıqlı faydalı əməkdaşlıq vasitəsilə möhkəmlənə bilər. Azərbaycanın son illərdə atdığı addımlar sübut edir ki, sülh artıq nəzəri anlayış deyil, iqtisadi inkişafı, sosial rifahı və regional sabitliyi təmin edən praktik reallıqdır. Prezident İlham Əliyevin bu fikri məhz həmin reallığın siyasi ifadəsi kimi qiymətləndirilməlidir.
Veteran müəllim Vəfadar Niftəliyev
