Biz dostlarınız və qardaşlarınız olaraq Türkmənistanın beynəlxalq uğurlarına sevinirik
Azərbaycan və Türkmənistan arasında münasibətlər ortaq tarix, dil, mədəniyyət və mənəvi dəyərlər üzərində formalaşmış möhkəm qardaşlıq əlaqələrinə əsaslanır. Bu münasibətlərin daha da inkişaf etdirilməsi Azərbaycan Respublikasının Prezidenti İlham Əliyevin xarici siyasətində mühüm istiqamətlərdən biridir. Dövlət başçısının həyata keçirdiyi məqsədyönlü siyasət nəticəsində iki ölkə arasında siyasi, iqtisadi, enerji, nəqliyyat və humanitar sahələrdə əməkdaşlıq davamlı şəkildə genişlənir.
Prezident İlham Əliyev Azərbaycan–Türkmənistan münasibətlərini xarakterizə edərkən dəfələrlə vurğulamışdır ki, ölkələrimizi yalnız dövlət maraqları deyil, həm də qardaşlıq və qarşılıqlı etimad birləşdirir. Bu münasibətlər yüksək səviyyəli siyasi dialoq, qarşılıqlı hörmət və milli maraqlara əsaslanan əməkdaşlıq prinsipləri üzərində qurulmuşdur. Azərbaycan Türkmənistanın beynəlxalq arenadakı uğurlarını daim yüksək qiymətləndirir və qardaş ölkənin inkişafına xüsusi diqqətlə yanaşır.
Prezident İlham Əliyevin çıxışlarında Türkmənistanın sosial-iqtisadi inkişaf sahəsində əldə etdiyi nailiyyətlərə verilən yüksək dəyər iki ölkə arasındakı səmimi münasibətlərin göstəricisidir. Dövlət başçısı uzun illər ərzində Türkmənistana etdiyi səfərlər zamanı ölkədə aparılan genişmiqyaslı quruculuq işlərinin, şəhərlərin müasirləşdirilməsinin, infrastruktur layihələrinin və turizm sektorunun inkişafının şahidi olmuşdur. Bu inkişafın Türkmənistan rəhbərliyinin uzaqgörən siyasətinin və milli maraqlara əsaslanan idarəçilik modelinin nəticəsi olduğu xüsusi vurğulanır.
Azərbaycan rəhbərliyi hesab edir ki, Türkmənistanın əldə etdiyi uğurlar bütövlükdə Türk dünyasının nailiyyətidir. Məhz buna görə də Prezident İlham Əliyev qardaş türkmən xalqının hər bir uğurunu Azərbaycan xalqının sevinci kimi dəyərləndirir. Bu yanaşma ölkələrimiz arasında dostluğun və qarşılıqlı etimadın nə qədər yüksək səviyyədə olduğunu nümayiş etdirir.
İki ölkə arasında əməkdaşlığın əsas istiqamətlərindən biri enerji sahəsidir. Azərbaycan və Türkmənistan zəngin enerji resurslarına malik dövlətlər kimi regional və qlobal enerji təhlükəsizliyində mühüm rol oynayırlar. Prezident İlham Əliyevin siyasətində enerji əməkdaşlığının genişləndirilməsi xüsusi yer tutur. Dövlət başçısı dəfələrlə bəyan etmişdir ki, mövcud potensialdan səmərəli istifadə etmək və beynəlxalq enerji bazarlarında daha güclü mövqe qazanmaq üçün ölkələrimiz səylərini birləşdirməlidirlər.
Bu baxımdan Xəzər dənizi regionunda həyata keçirilən enerji layihələri, nəqliyyat-kommunikasiya imkanlarının genişləndirilməsi və qarşılıqlı investisiya təşəbbüsləri Azərbaycan–Türkmənistan əməkdaşlığının strateji xarakter daşıdığını göstərir. İki ölkənin enerji sahəsində tərəfdaşlığı yalnız milli iqtisadiyyatların inkişafına deyil, həm də regionda sabitliyin və əməkdaşlığın möhkəmlənməsinə xidmət edir.
Prezident İlham Əliyevin siyasətində Türkmənistanın beynəlxalq təşəbbüslərinə dəstək mühüm yer tutur. Azərbaycan Türkmənistanın daim sülhə, qarşılıqlı hörmətə və beynəlxalq əməkdaşlığa əsaslanan neytrallıq siyasətini dəstəkləmiş və bu mövqeyini ardıcıl şəkildə davam etdirmişdir. Türkmənistanın neytral dövlət statusu beynəlxalq ictimaiyyət tərəfindən geniş qəbul edilmiş və qlobal sabitliyə töhfə verən mühüm amil kimi qiymətləndirilmişdir.
Azərbaycanın bu siyasətə verdiyi dəstək iki ölkə arasında mövcud olan etimadın və strateji tərəfdaşlığın göstəricisidir. Prezident İlham Əliyev beynəlxalq təşkilatlar çərçivəsində və müxtəlif çoxtərəfli platformalarda Türkmənistanın təşəbbüslərinə dəstək göstərməklə qardaş ölkə ilə həmrəyliyi nümayiş etdirir.
Humanitar və mədəni əlaqələr də münasibətlərin inkişafında mühüm rol oynayır. Ortaq tarixi irsə malik olan Azərbaycan və Türkmənistan xalqları mədəniyyət, elm, təhsil və incəsənət sahələrində sıx əməkdaşlıq edirlər. Qarşılıqlı mədəniyyət günləri, yaradıcı kollektivlərin çıxışları, elmi konfranslar və müxtəlif humanitar layihələr xalqlarımızın bir-birinə daha da yaxınlaşmasına xidmət edir.
Türk dünyasının birliyinin möhkəmləndirilməsi Prezident İlham Əliyevin xarici siyasətinin prioritet istiqamətlərindən biridir. Bu çərçivədə Azərbaycan–Türkmənistan əlaqələri xüsusi əhəmiyyət daşıyır. Dövlət başçısının təşəbbüsləri nəticəsində qardaş ölkələr arasında əməkdaşlıq yeni məzmun qazanır, qarşılıqlı fəaliyyət daha da dərinləşir və yeni perspektivlər açılır.
Zərdab rayon Mədəniyyət Mərkəzinin direktoru Elyurə Məmmədova
