Biz dostlarınız və qardaşlarınız olaraq Türkmənistanın beynəlxalq uğurlarına sevinirik
Azərbaycan ilə Türkmənistan arasında münasibətlər tarixən dostluq, qardaşlıq və qarşılıqlı hörmət prinsiplərinə əsaslanmışdır. Bu münasibətlər əsrlər boyu formalaşmış ortaq tarixi köklər, mədəni dəyərlər və mənəvi bağlılıq üzərində qurulmuşdur. Azərbaycan Respublikasının Prezidenti İlham Əliyevin “Biz dostlarınız və qardaşlarınız olaraq Türkmənistanın beynəlxalq uğurlarına sevinirik” fikri iki ölkə arasındakı münasibətlərin mahiyyətini və səmimiyyətini aydın şəkildə ifadə edir. Bu fikir yalnız diplomatik nəzakətin ifadəsi deyil, həm də Azərbaycan xalqının Türkmənistan xalqına olan qardaş münasibətinin, onların nailiyyətlərinə verdiyi yüksək dəyərin göstəricisidir.
Azərbaycan və Türkmənistan eyni tarixi-mədəni köklərə malik olan iki qardaş dövlətdir. Hər iki xalq türk dünyasının ayrılmaz hissəsi kimi əsrlər boyu ortaq dəyərləri qoruyub saxlamış, bir-birinin uğurlarına sevinmiş, çətin günlərdə isə həmrəylik nümayiş etdirmişdir. Bu gün müstəqil dövlətlər kimi beynəlxalq münasibətlər sistemində öz layiqli yerlərini tutan Azərbaycan və Türkmənistan arasında mövcud olan əlaqələr strateji tərəfdaşlıq səviyyəsinə yüksəlmişdir. Müstəqillik əldə etdikdən sonra Türkmənistan beynəlxalq aləmdə öz mövqeyini möhkəmləndirmək istiqamətində mühüm addımlar atmışdır. Ölkənin həyata keçirdiyi xarici siyasətin əsas istiqamətlərindən biri beynəlxalq əməkdaşlığın genişləndirilməsi, sülhün və təhlükəsizliyin qorunmasına töhfə vermək olmuşdur. Türkmənistanın daimi neytral dövlət statusuna malik olması onun beynəlxalq nüfuzunu artıran mühüm amillərdən biridir. 1995-ci ildə Birləşmiş Millətlər Təşkilatı tərəfindən tanınan daimi neytrallıq statusu Türkmənistanın dünya siyasətində özünəməxsus yer tutmasına imkan yaratmışdır. Bu status ölkənin beynəlxalq münasibətlərdə balanslı və konstruktiv siyasət yürütməsinə şərait yaratmışdır. Son illər Türkmənistanın beynəlxalq təşkilatlarla əməkdaşlığı daha da genişlənmişdir. Birləşmiş Millətlər Təşkilatı, İqtisadi Əməkdaşlıq Təşkilatı, Müstəqil Dövlətlər Birliyi və digər beynəlxalq qurumlarla əməkdaşlıq çərçivəsində həyata keçirilən layihələr ölkənin beynəlxalq nüfuzunun artmasına xidmət etmişdir. Türkmənistan enerji təhlükəsizliyi, nəqliyyat-kommunikasiya əlaqələrinin inkişafı, ekoloji problemlərin həlli və humanitar əməkdaşlıq kimi mühüm məsələlərdə fəal təşəbbüslərlə çıxış edir. Bu təşəbbüslər beynəlxalq ictimaiyyət tərəfindən müsbət qarşılanır və ölkənin nüfuzunun daha da yüksəlməsinə səbəb olur. Azərbaycan Türkmənistanın əldə etdiyi bütün uğurları yüksək qiymətləndirir. Çünki iki ölkə arasında mövcud olan dostluq və qardaşlıq münasibətləri qarşılıqlı dəstək üzərində qurulmuşdur. Azərbaycan hər zaman Türkmənistanın beynəlxalq təşəbbüslərinə hörmətlə yanaşmış, beynəlxalq təşkilatlar çərçivəsində onun mövqeyini dəstəkləmişdir. Eyni zamanda Türkmənistan da Azərbaycanın ərazi bütövlüyü, suverenliyi və milli maraqları ilə bağlı məsələlərdə daim dost mövqe nümayiş etdirmişdir. Bu qarşılıqlı etimad və dəstək münasibətlərin ən mühüm xüsusiyyətlərindən biridir. Azərbaycan və Türkmənistan arasında əməkdaşlığın mühüm istiqamətlərindən biri iqtisadi sahədir. Hər iki ölkə zəngin enerji resurslarına malik olmaqla regionun enerji təhlükəsizliyində mühüm rol oynayır. Enerji sahəsində əməkdaşlıq imkanlarının genişlənməsi həm regional, həm də beynəlxalq səviyyədə əhəmiyyətli nəticələr verir. Bununla yanaşı, nəqliyyat və logistika sahəsində həyata keçirilən layihələr də ölkələr arasında iqtisadi əlaqələrin inkişafına təkan verir. Xəzər dənizi üzərindən yaradılan yeni nəqliyyat marşrutları Avropa ilə Asiyanı birləşdirən mühüm tranzit xəttinin formalaşmasına xidmət edir. Türkmənistanın beynəlxalq uğurlarının mühüm istiqamətlərindən biri də nəqliyyat və kommunikasiya layihələridir. Ölkə Şərqlə Qərbi, Şimalla Cənubu birləşdirən nəqliyyat dəhlizlərinin inkişafında fəal iştirak edir. Bu layihələr region dövlətləri arasında iqtisadi inteqrasiyanın güclənməsinə və beynəlxalq ticarətin genişlənməsinə şərait yaradır. Azərbaycan da bu təşəbbüslərin həyata keçirilməsində Türkmənistanla əməkdaşlığa böyük önəm verir. Çünki hər iki ölkənin strateji coğrafi mövqeyi regional əməkdaşlıq üçün geniş imkanlar yaradır. Azərbaycan və Türkmənistan arasındakı münasibətlərin inkişafında humanitar və mədəni əlaqələrin də xüsusi rolu vardır. Ortaq tarix, dil, din və mədəniyyət xalqlarımızı daha da yaxınlaşdırır. Mədəniyyət günləri, sərgilər, konsert proqramları, elmi konfranslar və təhsil layihələri xalqlar arasında dostluq münasibətlərinin möhkəmlənməsinə xidmət edir. Gənc nəslin milli-mənəvi dəyərlər ruhunda tərbiyə olunması və ortaq irsin qorunması istiqamətində həyata keçirilən tədbirlər gələcək əməkdaşlığın möhkəm əsaslarını formalaşdırır. Türk dünyasında birliyin və həmrəyliyin möhkəmləndirilməsi baxımından da Azərbaycan-Türkmənistan münasibətləri mühüm əhəmiyyət daşıyır. Hər iki ölkə türk xalqları arasında əməkdaşlığın inkişafına xüsusi diqqət yetirir. Türk dövlətləri arasında qarşılıqlı dəstək və həmrəylik regional sabitliyin möhkəmləndirilməsinə, ortaq maraqların qorunmasına xidmət edir. Bu baxımdan Türkmənistanın beynəlxalq nüfuzunun artması bütövlükdə türk dünyasının uğuru kimi qiymətləndirilir. Bu gün Azərbaycan və Türkmənistan arasındakı münasibətlər öz inkişafının ən yüksək mərhələlərindən birini yaşayır. Dövlət başçıları arasında mövcud olan qarşılıqlı etimad, xalqlar arasında qardaşlıq münasibətləri və ortaq maraqlar gələcək əməkdaşlığın daha da genişlənəcəyinə zəmin yaradır. Azərbaycan xalqı Türkmənistanın beynəlxalq aləmdə qazandığı nailiyyətləri böyük məmnunluq hissi ilə qarşılayır və bu uğurların davamlı olmasını arzulayır. “Biz dostlarınız və qardaşlarınız olaraq Türkmənistanın beynəlxalq uğurlarına sevinirik” fikri Azərbaycan-Türkmənistan münasibətlərinin ruhunu və məzmununu əks etdirən mühüm ifadədir. Bu sözlər iki qardaş xalq arasında mövcud olan səmimi dostluğun, qarşılıqlı hörmətin və etibarlı tərəfdaşlığın göstəricisidir. Türkmənistanın beynəlxalq nüfuzunun artması, əldə etdiyi siyasi, iqtisadi və humanitar uğurlar Azərbaycan tərəfindən böyük sevinc hissi ilə qarşılanır. Çünki qardaş ölkənin uğuru eyni zamanda dost Azərbaycanın da sevincidir və bu uğurlar gələcəkdə ölkələrimiz arasındakı münasibətlərin daha da möhkəmlənməsinə xidmət edəcəkdir.
Zərdab rayon Heydər Əliyev Mərkəzinin əməkdaşı İmanova Xanım
