Bir çox Almaniya şirkətləri Azərbaycanda uğurla fəaliyyət göstərir
Müstəqil Azərbaycanın xarici siyasətində iqtisadi diplomatiya, qarşılıqlı faydalı əməkdaşlıq və strateji tərəfdaşlıqların inkişafı mühüm yer tutur. Prezident cənab İlham Əliyevin rəhbərliyi ilə həyata keçirilən məqsədyönlü siyasət nəticəsində Azərbaycan dünyanın bir çox dövlətləri ilə, xüsusilə də Almaniya ilə iqtisadi, ticari və enerji sahələrində möhkəm əlaqələr qurmuşdur. Almaniya Avropanın aparıcı iqtisadi gücü olmaqla yanaşı, Azərbaycanın Avropa İttifaqındakı əsas tərəfdaşlarından biri hesab edilir. Son illərdə dövlət başçısının həyata keçirdiyi uğurlu xarici siyasət bu münasibətlərin daha da dərinləşməsinə və yeni əməkdaşlıq imkanlarının yaranmasına şərait yaratmışdır.
Hazırda 200-dən artıq Almaniya şirkəti Azərbaycanda uğurla fəaliyyət göstərir. Bu şirkətlər sənaye, tikinti, nəqliyyat, logistika, informasiya texnologiyaları, kənd təsərrüfatı, enerji, xidmət və digər sahələrdə müxtəlif layihələrin həyata keçirilməsində iştirak edirlər. Alman şirkətlərinin ölkəmizdə fəaliyyəti həm qabaqcıl texnologiyaların tətbiqinə, həm də yeni iş yerlərinin yaradılmasına və iqtisadiyyatın inkişafına mühüm töhfə verir.
Prezident cənab İlham Əliyevin həyata keçirdiyi iqtisadi islahatlar, əlverişli investisiya mühiti, qanunvericiliyin təkmilləşdirilməsi və sahibkarlığın dəstəklənməsi xarici investorların Azərbaycana marağını əhəmiyyətli dərəcədə artırmışdır. Dövlət başçısı dəfələrlə qeyd etmişdir ki, Azərbaycan xarici sərmayədarlar üçün etibarlı və təhlükəsiz tərəfdaşdır. Məhz bunun nəticəsidir ki, Almaniya şirkətləri ölkəmizdə uzunmüddətli layihələr həyata keçirir, yeni investisiya imkanlarını araşdırır və iqtisadi əməkdaşlığın genişləndirilməsində maraqlı olduqlarını nümayiş etdirirlər.
Azərbaycan ilə Almaniya arasında qarşılıqlı sərmayələrin artırılması da əməkdaşlığın mühüm istiqamətlərindən biridir. Yüksək səviyyəli görüşlər zamanı investisiya layihələrinin genişləndirilməsi, sənaye parklarında əməkdaşlıq, innovasiya, rəqəmsal texnologiyalar və yaşıl iqtisadiyyat sahələrində yeni təşəbbüslər müzakirə olunur. Prezident İlham Əliyevin rəhbərliyi ilə həyata keçirilən iqtisadi siyasət ölkədə biznes mühitinin daha da yaxşılaşdırılmasına xidmət edir ki, bu da Almaniya şirkətlərinin fəaliyyət imkanlarını genişləndirən əsas amillərdəndir.
Azərbaycan–Almaniya münasibətlərində enerji əməkdaşlığı xüsusi yer tutur. Azərbaycan uzun illərdir Avropanın enerji təhlükəsizliyinin təmin olunmasında etibarlı tərəfdaş kimi çıxış edir. Prezident cənab İlham Əliyevin enerji strategiyası nəticəsində ölkəmiz zəngin enerji ehtiyatlarını dünya bazarlarına təhlükəsiz və davamlı şəkildə çatdıran mühüm dövlətə çevrilmişdir. Bu strategiyanın əsas məqsədi Azərbaycanın təbii sərvətlərindən səmərəli istifadə etməklə iqtisadi inkişafı sürətləndirmək və beynəlxalq enerji əməkdaşlığını daha da genişləndirməkdir.
Bu ildən etibarən Azərbaycanın təbii qazının Almaniyaya ixracına başlanılması iki ölkə arasında enerji sahəsində əməkdaşlığın yeni mərhələyə qədəm qoyduğunu göstərir. Hazırda Azərbaycan təbii qazını Avropa İttifaqına üzv olan on ölkəyə ixrac edir və bu göstərici ölkəmizin Avropanın enerji təhlükəsizliyində oynadığı mühüm rolu bir daha təsdiqləyir. Xüsusilə son illərdə enerji bazarında yaranmış dəyişikliklər fonunda Azərbaycanın etibarlı təchizatçı kimi nüfuzu daha da artmışdır.
Təbii qazla yanaşı, Azərbaycan Almaniyaya xam neft ixracını da davam etdirir. Bu əməkdaşlıq iki ölkə arasında iqtisadi əlaqələrin mühüm istiqamətlərindən biri olmaqla yanaşı, Avropa bazarlarının enerji resursları ilə sabit təmin olunmasına da töhfə verir. Prezident İlham Əliyevin uzaqgörən enerji siyasəti nəticəsində Azərbaycan həm neft, həm də qaz ixracında etibarlı tərəfdaş kimi beynəlxalq nüfuz qazanmışdır.
Müasir dövrdə enerji siyasətinin əsas istiqamətlərindən biri də bərpa olunan enerji mənbələrinin inkişafıdır. Prezident cənab İlham Əliyevin təşəbbüsü ilə Azərbaycanda yaşıl enerji layihələri geniş vüsət almışdır. Günəş, külək və digər alternativ enerji mənbələrinin inkişafı ölkənin enerji strategiyasının ayrılmaz hissəsinə çevrilmişdir. Azərbaycanın məqsədi gələcəkdə yaşıl enerjini də Avropa bazarına ixrac etmək və bu sahədə beynəlxalq əməkdaşlığı daha da genişləndirməkdir. Almaniyanın yaşıl texnologiyalar sahəsində zəngin təcrübəsi bu istiqamətdə əməkdaşlıq üçün yeni imkanlar yaradır.
Yaşıl enerji sahəsində tərəfdaşlığın inkişafı təkcə iqtisadi baxımdan deyil, həm də ekoloji təhlükəsizlik, iqlim dəyişiklikləri ilə mübarizə və dayanıqlı inkişaf məqsədlərinə nail olunması baxımından böyük əhəmiyyət daşıyır. Prezident İlham Əliyevin həyata keçirdiyi siyasət Azərbaycanın enerji sektorunun müasir tələblərə uyğun transformasiyasını təmin edir və ölkəmizi regionun yaşıl enerji mərkəzlərindən birinə çevirmək məqsədini qarşıya qoyur.
Azərbaycanın təşəbbüsü ilə həyata keçirilən beynəlxalq enerji layihələri ölkənin geosiyasi əhəmiyyətini daha da artırmışdır. Enerji marşrutlarının şaxələndirilməsi, yeni ixrac bazarlarının açılması və Avropa dövlətləri ilə strateji əməkdaşlığın genişləndirilməsi Prezident cənab İlham Əliyevin uğurlu enerji diplomatiyasının mühüm nəticələridir. Almaniya ilə inkişaf edən enerji əməkdaşlığı da bu siyasətin uğurlu davamı kimi qiymətləndirilə bilər.
Almaniya şirkətlərinin Azərbaycanda artan fəaliyyəti, qarşılıqlı investisiyaların genişlənməsi, təbii qaz və neft ixracı, eləcə də yaşıl enerji sahəsində perspektiv əməkdaşlıq iki ölkə arasında əlaqələrin davamlı inkişafını təmin edir. Bu siyasət Azərbaycanın beynəlxalq iqtisadi mövqeyini möhkəmləndirir, Avropanın enerji təhlükəsizliyinə mühüm töhfə verir və ölkəmizin dayanıqlı inkişaf strategiyasının uğurla həyata keçirildiyini bir daha nümayiş etdirir.
Zərdab rayon Mədəniyyət Mərkəzinin direktoru Elyurə Məmmədova
