Bakıda keçirilən İkinci Azərbaycan Beynəlxalq İnvestisiya Forumu ölkəmiz üçün mühüm əhəmiyyət daşıyır
Bu gün dünyada iqtisadi münasibətlərdə ciddi dəyişikliklər baş verir. Ölkələr arasında iqtisadi əlaqələrin yenidən qurulduğu, investisiya imkanları uğrunda rəqabətin artdığı bir vaxtda Bakıda keçirilən İkinci Azərbaycan Beynəlxalq İnvestisiya Forumu ölkəmiz üçün mühüm əhəmiyyət daşıyır. Prezident İlham Əliyevin himayəsi altında keçirilən Forum Azərbaycanın iqtisadi imkanlarının, investisiya potensialının və gələcək inkişaf istiqamətlərinin beynəlxalq investorlar qarşısında təqdim olunması baxımından mühüm platformadır. Tədbirdə müxtəlif ölkələrdən investorlar, iri şirkətlərin nümayəndələri və maliyyə qurumları iştirak edir. Bu da Azərbaycanın beynəlxalq biznes və investisiya mühitində diqqət çəkən ölkələrdən biri olduğunu göstərir.
Forum çərçivəsində ümumi dəyəri 10,8 milyard ABŞ dolları olan investisiya layihələri ilə bağlı 23 sənədin imzalanması xüsusilə diqqət çəkir. Bu rəqəm ölkəmizə olan investisiya marağının genişləndiyini göstərən mühüm göstəricilərdən biridir. Eyni zamanda bu layihələr Azərbaycanın iqtisadiyyatının yalnız neft və qaz sektoru ilə bağlı olmadığını, yeni və müxtəlif istiqamətlər üzrə investisiya imkanlarının yarandığını göstərir.
Forumda dünyanın böyük investisiya şirkətlərinin və institusional investorların təmsil olunması da mühüm məsələdir. Bu şirkətlərin idarə etdiyi aktivlərin ümumi həcminin təxminən 30 trilyon ABŞ dolları olması Azərbaycanın investisiya imkanlarının nə qədər geniş auditoriyaya təqdim edildiyini göstərir. Hər hansı ölkəyə investisiya qoymaq istəyən investor ilk növbədə həmin ölkədə sabitliyin olmasına, qanunların işləməsinə, biznes üçün normal şəraitin yaradılmasına və gələcək üçün aydın perspektivin mövcudluğuna diqqət edir.
Bununla yanaşı, müasir yolların, limanların, enerji sistemlərinin, rabitə və internet imkanlarının, logistika xidmətlərinin inkişafı da investor üçün böyük əhəmiyyət daşıyır. Azərbaycan son illərdə bu istiqamətlərdə mühüm işlər həyata keçirib. Ölkədə yollar, hava limanları, limanlar, enerji obyektləri və digər infrastruktur layihələri yaradılıb. Bu imkanlar Azərbaycanın həm regional, həm də beynəlxalq ticarətdə rolunu artırır.
Prezident cənab İlham Əliyev Forumda çıxışı zamanı müasir infrastrukturun əhəmiyyətinə xüsusi diqqət yetirib. Burada yalnız yol və limanların tikilməsi deyil, həmin infrastrukturun rəqəmsal imkanlarla tamamlanması da vacibdir. Çünki müasir dövrdə yükün bir ölkədən digərinə çatdırılması üçün təkcə yaxşı yolun olması kifayət etmir. Gömrük prosedurları, elektron xidmətlər və digər proseslər də sürətli və rahat olmalıdır. Bu baxımdan rəqəmsallaşma Azərbaycanın gələcək iqtisadi inkişafında mühüm rol oynaya bilər. Elektron xidmətlərin genişləndirilməsi, sənədləşmə proseslərinin sadələşdirilməsi və gömrük prosedurlarının müasir tələblərə uyğunlaşdırılması həm sahibkarların işini asanlaşdırır, həm də ölkəyə investisiya qoymaq istəyən xarici şirkətlər üçün əlavə imkanlar yaradır.
Nailə Əliyeva Zərdab rayon Mərkəzləşdirilmiş Kitabxana Sisteminin direktoru
