Azərbaycanın Türkiyə ilə strateji müttəfiqliyi hər iki dövlətin iqtisadi inkişafına böyük təkan verir.
2021-ci ildə Şuşa şəhərində imzalanan “Azərbaycan Respublikası ilə Türkiyə Respublikası arasında müttəfiqlik münasibətləri haqqında Şuşa Bəyannaməsi” iki qardaş ölkə arasındakı münasibətlərin yeni mərhələyə yüksəlməsini təmin edən mühüm siyasi sənəd kimi tarixə düşdü. Bu Bəyannamə yalnız siyasi və hərbi əməkdaşlığın deyil, həm də iqtisadi, nəqliyyat, enerji və logistika sahələrində strateji tərəfdaşlığın inkişafı üçün geniş imkanlar yaratdı.
Azərbaycan və Türkiyə arasında formalaşmış müttəfiqlik münasibətləri qarşılıqlı etimada, ortaq tarixi köklərə və ümumi maraqlara əsaslanır. Bu əməkdaşlıq modeli regionun iqtisadi inkişafına, yeni nəqliyyat marşrutlarının formalaşmasına və beynəlxalq ticarət əlaqələrinin genişlənməsinə mühüm töhfələr verir. Xüsusilə son illərdə həyata keçirilən iri infrastruktur layihələri hər iki ölkənin iqtisadi potensialının daha səmərəli istifadəsinə şərait yaratmışdır.
Azərbaycan 44 günlük Vətən müharibəsində qələbə qazanaraq regionda yeni reallıqlar yaratdı. Bu reallıqlardan biri Bəyannamədə də qeyd edilən Zəngəzur dəhlizidir. Bu dəhliz Mərkəzi Asiya ilə Avropa arasındakı ticarəti genişləndirməklə yanaşı, siyasi əlaqələri də artırır və bu əlaqələrin formalaşmasında Türkiyə ilə Azərbaycan aparıcı rol oynayır. Orta Dəhlizin yeni nəfəsi olan Qars-İğdır-Naxçıvan dəmir yolu layihəsi uğurla həyata keçirilir. Həmin dəmir yolu layihəsi muxtar respublikanın nəqliyyat və iqtisadi potensialını artıracaq, eyni zamanda, beynəlxalq ticarətə yeni imkanlar yaradacaq. Zəngəzur dəhlizinin tərkib hissəsi olan Qars-İğdır-Aralıq-Dilucu-Sədərək-Naxçıvan-Culfa dəmir yolu xətti təkcə Türkiyə və Naxçıvanı Azərbaycanın əsas ərazisi ilə birləşdirmir, eyni zamanda daha qlobal xarakter daşıyır və Avropa ilə Asiyanın ticarət əlaqələri üçün olduqca əlverişlidir. Həmçinin dəmir yolu xəttinin Bakı-Tbilisi-Qars layihəsi ilə inteqrasiyası nəzərdə tutulur.
Şuşa Bəyannaməsində nəzərdə tutulan iqtisadi əməkdaşlıq istiqamətləri enerji təhlükəsizliyi, nəqliyyat-kommunikasiya layihələri, investisiya mühiti və ticarət əlaqələrinin daha da gücləndirilməsini əhatə edir. Azərbaycan və Türkiyənin birgə reallaşdırdığı enerji layihələri regionun enerji xəritəsini dəyişdirmiş, Avropanın enerji təhlükəsizliyinə mühüm töhfə vermişdir. Bu layihələr eyni zamanda hər iki ölkənin iqtisadi gəlirlərinin artmasına və beynəlxalq mövqelərinin möhkəmlənməsinə xidmət edir.
Nəqliyyat sahəsində əməkdaşlıq da strateji əhəmiyyət daşıyır. Orta Dəhlizin inkişafı, yeni logistika marşrutlarının yaradılması və mövcud infrastrukturun modernləşdirilməsi Azərbaycanı və Türkiyəni Avropa ilə Asiya arasında əsas tranzit mərkəzlərindən birinə çevirir. Bu isə ticarət dövriyyəsinin artmasına, yeni investisiyaların cəlb olunmasına və regional iqtisadi inteqrasiyanın dərinləşməsinə imkan yaradır.
Şuşa Bəyannaməsi göstərir ki, Azərbaycan-Türkiyə müttəfiqliyi yalnız iki dövlətin milli maraqlarına xidmət etmir, eyni zamanda regionun inkişafına və beynəlxalq əməkdaşlığın genişlənməsinə də mühüm töhfə verir. İqtisadi sahədə əldə olunan uğurlar və perspektiv layihələr bu strateji tərəfdaşlığın gələcəkdə daha böyük nəticələr verəcəyini göstərir. Beləliklə, Şuşa Bəyannaməsi əsasında möhkəmlənən Azərbaycan-Türkiyə müttəfiqliyi hər iki ölkənin davamlı inkişafının, iqtisadi tərəqqisinin və regional liderliyinin vacib təminatlarından biri kimi çıxış edir.
Şamil Babayev – Zərdab Gənclər evinin dərnək rəhbəri
