Azərbaycanın təşəbbüsü ilə irəli sürülən sülh gündəliyi regionda uzunmüddətli sabitliyin təmin olunmasına xidmət edir
Cənubi Qafqaz regionunda uzun illər davam edən münaqişənin başa çatması və davamlı sülhün təmin olunması beynəlxalq ictimaiyyətin diqqət mərkəzində olan əsas məsələlərdən biridir. Azərbaycan Respublikası hər zaman regionda sabitliyin, təhlükəsizliyin və qarşılıqlı əməkdaşlığın tərəfdarı olduğunu nümayiş etdirib. Xüsusilə Vətən müharibəsindən sonra yaranmış yeni reallıqlar sülh gündəliyinin formalaşmasına və Azərbaycan ilə Ermənistan arasında münasibətlərin normallaşdırılması istiqamətində mühüm addımların atılmasına şərait yaradıb.
Son illərdə aparılan danışıqlar nəticəsində iki ölkə arasında münasibətlərin normallaşdırılması prosesi əhəmiyyətli irəliləyiş əldə edib. Azərbaycanın təşəbbüsü ilə irəli sürülən sülh gündəliyi regionda uzunmüddətli sabitliyin təmin olunmasına xidmət edir. Rəsmi Bakı dəfələrlə bəyan edib ki, regionun inkişafı yalnız beynəlxalq hüququn prinsiplərinə, dövlətlərin suverenliyinə, ərazi bütövlüyünə və sərhədlərin toxunulmazlığına hörmət əsasında mümkündür.
Azərbaycan Respublikasının Prezidenti cənab İlham Əliyevin də vurğuladığı kimi, regional təhlükəsizlik məsələləri beynəlxalq tərəfdaşlarla keçirilən görüşlərin əsas mövzularından birini təşkil edir. Xüsusilə Azərbaycan ilə Ermənistan arasında normallaşma prosesi həm region ölkələri, həm də beynəlxalq təşkilatlar tərəfindən diqqətlə izlənilir. Çünki Cənubi Qafqazda davamlı sülh təkcə iki ölkə üçün deyil, bütövlükdə regionun iqtisadi və siyasi inkişafı baxımından mühüm əhəmiyyət daşıyır.Normallaşma prosesində mühüm hadisələrdən biri ötən ilin avqust ayında ABŞ-ın paytaxtı Vaşinqton şəhərində, Ağ Evdə keçirilən yüksək səviyyəli görüş olub. ABŞ Prezidenti Donald Trampın iştirakı ilə Azərbaycan və Ermənistan arasında Birgə Bəyannamə imzalanıb. Bundan əlavə, tərəflər sülh sazişinin mətnini paraflayıblar. Bu hadisə regionda uzun illər davam edən qarşıdurmanın aradan qaldırılması istiqamətində mühüm siyasi addım kimi qiymətləndirilir.Paraflanmış sülh sazişi tərəflərin gələcək münasibətlərinin hüquqi əsaslarının formalaşdırılması baxımından mühüm əhəmiyyət daşıyır. Bu sənəd göstərir ki, tərəflər qarşılıqlı münasibətlərin sülh və əməkdaşlıq əsasında qurulmasına sadiqlik nümayiş etdirirlər.
Prezident İlham Əliyevin ifadə etdiyi kimi, artıq de-fakto sülh mövcuddur və bunun müsbət nəticələri hiss olunmağa başlayıb.De-fakto sülh ilk növbədə sərhəd bölgələrində təhlükəsizlik mühitinin yaxşılaşmasına şərait yaradır. Hərbi gərginliyin azalması insanların daha təhlükəsiz şəraitdə yaşamasına, sərhədyanı yaşayış məntəqələrinin sosial-iqtisadi inkişafına müsbət təsir göstərir. Eyni zamanda dövlətlərin iqtisadi resurslarını hərbi xərclərdən daha çox inkişaf layihələrinə yönəltməsinə imkan yaradır.Sülhün iqtisadi faydaları da kifayət qədər genişdir.
Abdulbağı Fazilli – Zərdab şəhər sakini, fəal gənc
